Floyd Mayweather In Pathian Thei Dingin Thla Ka Cam Sak: Manny Pacquiao

10629594_743382575732328_3076501427906143353_nTufang ih leitlun Boxing thiam hminthang le nehnak co rerotu Floyd Mayweather cun, Philippine mi Manny Pacqouiao cu nautatnak tongkam cu Instagram ihsin September 26, 2014 ah a ngan. Mayweather cun, “Pac Man cun, paisa a ngah ding ni cu hngakhlap zetin a thlir, tufang ah Pac Man cu sumpai a nei lo a si” tiin a ngan. Cun, 2012 ih Pac Man in Juan Manuel Marquez a neh lo tumih a thlalak tha lo pawl khal a langter bet.

Pac Man cun, “A tongkam ruangah zianghman poi tinak ka nei lo. Amah ka zangfah sawn. Pathian a tihzah ih a theihnak ding hrang thlacamnak ka neihsak a si. Miin leitlun thil nei theh khal sehla, Pathian a neih lo ahcun ziangsi thahnem ( Matt 16:26 nak a sim )” tiin a sim.

September thlathar ih Interview an neihnak ah Pac Man cun Mayweather a thong lonak a sim ih, “Ziangvek minung a si timi cu a cangvaihnak ihsin theih a theih ko. Zirnak nei lo pawl cun an duhduh an tong, an duhduh in an um ih, an duhduh an tuah hluahhlo men. Curuangah kan thongawk lonak a si” tin a rak sim dah.

Pac Man hi Christian a sinak langterin, Boxing a lek tinten thlacamnak thawn a hlan theunak cun leitlun mipi thinlung a la zet. 2012 ah, Pastor Rick Warren ih nganmi “The Purpose Driven Life” timi a siarnak ihsin a nunnak cu thleng danglam in a um ih, Pathian Thu in thazang a la ringring.

Pastor Rick Warren cun, “Pac Man in The Purpose Driven Life cabu a siar theh ah in rak sim ih, Rick, na Cabu ka siar ih Jesuh Khrih ka cohlang. Bungkhat ka siar thehin ka mitthli a tla, a dang ka siar sal ih ka mitthli a tla thotho. Hi Cabu hi midang ka theihmi zaten ka pe theh. Siar ve hai seh ti duhsaknak ka nei. Group kan tuah hngal ih, Bible zohlo ngahin kan siar tlang ringring” tiin Pac Man in Cabu a siar thuhla thawn pehparin a rak sim dah.

(Visited 832 times, 1 visits today)

Comments

comments

Comments

%d bloggers like this: