Father’s Day (Pa Ni)! Ka Pai Hrang

Tuini Pai Ni ah Pa ngainak, sunlawinak le man ringringnak ih an nganmi thenkhat group mailing ta le facebook pawl ta laksawng in kan rawn tarlang a si.

Ka Pa

Ka pa, Ka fapa te hrangah tiin khawmnak ih an zem mi hman i (ei) tluh siang loin i rak sumtu.
Ka fapa, A tlawngkai a ra tlung ding tiin sapherh khal suang siang lotu.
Ka pa, ka nauhak at zet lai ihsin thutha tha i simtu.
Ka pa, Malte thu ka hun ruah thei deuh ihsin nuncan dan i simtu.
Ka pa, Mi paisa ruk (fir) cu sim hlah, mi paisa thlau mi hman la aw hlah i titu.
Ka pa, mi harsa, mibang lo pawl khal hi na biak mi na Pathian ih sersiam mi hokhaw i titu
Ka pa, Ka thih hnu khalle mi bangin hlawn le thil ka lo roh thei lo ding nan ka lo roh thei mi fimthiankak hi i titu,

Ka pa, Phun hra ka awn thei ding ti theih na duh tuk nan na nun laiah phun hra awng thei loin na thih kum ih phun hra ka awn cu lungawi le riahsia in ka khat ti cu…… Asinan i cah ta mi ka thih hnu khalle fimnak ka lo rohta cun i ti mi te ruangah ka lung a awi fangfang.

Ka pa, Mi ngaithiam theinak thinlung i neitirtu, Pathian ih duh zawng a si i titu.
Ka pa, Nangmai ruangah ka lungawi dan hi cu a sim le a rel khal ka thiam lo……….
Ka pa, Ka zar i zo ve man lo (Ka zar i to ve man lo, i sawr man lo) hi  cu aw………….

Pai duhdawtnak lehrul man lotu,
Alfred Paro,

Ka Pa

Pathian lamhruai nak in 2012 “father’s day” cu tu zarhpi ah hman a si lala ding. Leitlun ih pa pawl hmuahhmuah upat nak pe uh si.

Pa le damlai mi kan nei le, lungawithu sim uh si. Pa le damnawnlo mi kan si khal le Pathian in kum ziangmawzat sung pa in rak neitir ruangah lungawithu sim thiam thotho uh si.

A thupibik sawn cu, kan pa le an damnawmlo khal le pa hmuahhmuah lakih tthatbik le in duhdawtbik tu mit ih hmuh theilo mi Pa, Pathian kan nei ti thei cio uh si.

Tuttum “father’s day” ah kan fa le ih zohtthimtlak ding in thil pakhat tal tuahmi kan nei maw pa le pawl?

Pathian hmin sunlawi nak le leitlun ih pa hmuahhmuah (ka pa telin) upat pek nak ah kan dungkum ih ka ngan mi ca ka rak thlah sal…….

Ka Pa (My Father)

(By: Piangte)

Aw kaa hrang………………………………………………………………………ka pa
Ttawngkam thiamlo zet…………….………………………………………………ka pa
Thil sual tuah canih nun i simtu……………………………………………………ka pa
Fa le duh nacingin duhdawtnak langtir sianglo…………………………………….ka pa
Caa phunsang zir manlo hmangning, kan calai khaisangtu……………………….. ka pa
Theihtawk in Pathian riantu……………………………………………………..….ka pa
Miphun laina zettu………………………………………………………………….ka pa
Pa ralttha……………………………………….………………………………..….ka pa

Kumpi, kum 13 liam hmanning, na duhdawtnak aw kaa hrang ka hnaah a cam ……ka pa
Na hnukcat lai, na kiang um theilo hmanning na keneh thlun ding ka zuam……….ka pa
Na rianmi Cungmi mangbawi Pathian rian ka tum…………………………………..ka pa
Na lainatzet mi kan miphun hrang ttuan ka tumve……………………………………ka pa
Na khaisang duhduahdomi kan calai khaisang ka tumve…………………………….ka pa
Na seherhmi Lai miphun hrang mipakhat si ka zuam rero …………………………..ka pa
I tantami na aw kaa hrangte tiang ka run co ve, ka duhdawtmi………………………Pa pa
(1999 ih Falam ih in tansantu ka duhdawtzet mi ka pa Pu Ral Sai Lo hngilhlo nak ih ka nganmi a si) June 13, 2011…..

Ka Rohlu Papa

Duhdawttu Papa
Lainat tu Papa
Ka zawnruattu leh ngaisak theutu
Na hrang Biazai mawibik ka ngan
Ka cafung aiah ka mitthli
Ka caphek aiah ka thinlung
Cafang pawl aiah ka duhdawtnak thawn
Na thinlung in raksiar awla
Lungawi mitthli na biangah luangin
Lungawi hnihhmel na mitthmai ah a thleng ding,
Ka hrang tuan in na bang theu,
Ka hrang tuar in na harsa;
Kei mibang ve dingah taimak na suah
Na fahniang hrangih na pekawknak cu
Sam theih rual khal a silo
Na thlanhri cun ka nunlam in sialsak
Ka bah caanah in kaitho salih
Zuamsal dingin tha in pe,
Nundan mawi zirh in zindik in hmuh
Ka hrang thlacamsak in na caantha in pe
Na tangsung ah duatte’n in pom
Na hmin ceimawi tuleh lungawinak lo thlen theitu sive dingin Pathian hnen dilin ka ngen
Cungvan Pa in Mal lo sawm in
Damcahnak leh Nunsaunak thawn
Na nunlam tluan lo hruai hram seh,
Ka thinlung sungih a khat mi duhdawtnak
Papa na hnen ka lo Pe
Ka rohlu thabik duhdawt mi kapa
Zianghmuah hluan in ka hrang na sungbik hlei ee;

Hausum Fanu

Kei Ka Pa

Ka pa…..A tongkam a hro.
Ka pa…..A thawmvang a ring.
Ka pa…..A thin a tawi.

A langter thiam lo…I duhdawtzia.
Na pin i thawi…a fa ka si.
Thinhar in a um…rual ka banlo phang ah.
Theihthiam a har…a mizia.

Ram a hrang…Sa a kap.
Tlang hra ah…Kan sung hrang.
Than tlang ah…A thang e! Ka pa.

Sukso…A tawi a vak.
Lei a let…Cam A man.
A baang…loram riannak ah.

A hui-ha…A tar kuun zo.
In zoh san…A fahniang.
Thinhar in…Um siang hlang ee Kapa.

Ukte

“KAPA”

Innsang hrangih hnakhung tintian ttuantu Kapa,
Riaklang Va bang run replo ramlak ah na riak maw!
Fikfa rawlah a sur a sa cawllo’n rianhraang na ttuan,
Fahniang te tla mibang duh ah zonzaih phunkim na tuar.

Zinglam khawfing catin ttuanram na ti,
Sun niling ah tohmun hnattuan na ti. (khokheng na ser)
Zaanlam ninu liamin naupang lawm tal na ti. (ramlak na vak)
Um awl neilo’n zaan khaw tlai ah runinn na pan.

Sam thei tini um ve ing maw ka san sungah!
A cuih kahrang kapai’ duhdawtnak cu!
Khuanui’ malsawm dawngin,
Damcah hmuin nunkhua sau hramseh tin…
Nahrang fahniang thlaza cam ee Kapa.

Leitlun Pa hmuahhmuah tlunah Bawipai malsawm thleng hramseh tin thlaza ka cam.

By- Mai Dai Dim

“PAI’ DUHDAWTNAK”

Simphuan tumin thawpi ka suah,
A rak daihlo ka ttong thiam mi’n.
Ngan tim ka tuah biazai fingkhat,
Ngansuah theihlo ka ir-awm thu.
Ngansal ko ning cakuat talin,
Cem theilo mi ka lungsung thu.
Ziangte talin a daihlo maw,
Manglian kapai’ duhdawtnak thu.

Ronnie Thiang

” Papa “

In duhdawttu papa
Ka hngalsan cu Papa
Hi leitlun ih i semsuahtu Papa
I duhdawttu Papa
Ka duhdawt mi Papa
Nang cu ka hrang Papa

Ka ngai hleice Papa
Pa ; Pa ralt’ha ti’n ka suang Papa
Ka lo duhdawt tuk ka fa ti’n
Kaa in a sim t’heu lo hmanla
Tuahnak i a lang ter tu Papa
Nang cu ka duh Papa

Innsang hrang a suk a so
Nisa, ruahsur ti lo’n
Kan phur-rit hmuah phurtu
Kamkhat hman phunzai lo maw
A zuam innsang hrangah
Cucu Nang ka duh Papa

Ka sam cawklo, ka rel thiamlo
Ka hawl suak le a tam duehdueh
A thuk in duhnak kaa in ka rel zo lo
Ziangdang ka t’ullo i ti
Ka thu awih ih na um cun
Papa ka hrang a tawk ti tu
Aw….Papa kei ka lo duh!

Hnem Tawi

“KA PA KE NEH”

Par dang bang mawi thei lo hman nin, par bang par thei nak i pe tu athiang hlim mi thin lung nei tu ka pa ka lungawi…
ka pa na farah ko hman seh leitlung sumsaw ih lei thei lo mi duh dawt nak cu na nei….
caan khal hril lo asur asa tang ah hna khal hril lo ke zung pi par tiang thlang hri pi luang cu tuar in na fa leh kan hrang ruang ih zongzai na tuar mi cu kan san sun ah sa’am cawk ding a si lo….ka lungawi ka pa…

Duh mi lei siang lo, tak sa hrang ih a tul mi ei leh in hman ei siang lo ten ka fa leh mi lak ah an ning zak pang ding tih ruah nak anei lai tu ka pa na va sung lawi em…..

Na tha zang amel ih na tuan nak ih kawt leh vuiva nak na leh nau tat nak na tawng caan khal ah fa leh hrang tin tang dawr nak na nei thei lai….zam lam ni nem a rung thleng..na bang nak leh na cauh nak khui ah na thup ka thei lo…mit hmai pan ten fa leh uh tih hlah uh nan pa ka um lai tin in ti thei lai tu ka pa,na duh dawt nak leh na ke neh hi tluk in maw a rak thuk…

Ka pa ka lo uar,na ral that nak ah..
Ka pa ka lo ngai sang,khua khan thiam mi na si ruang ah…
Ka pa ka lo rin san,cawng tlak mi na si ruang ah…
Ka pa ka lo duh,siat nak nun i zirh dah lo ruah ah…

Ka pa nang tel lo in cun, na fa leh kan hrang ah pastor um lo mi biak in vek kan si e..ka lo khawp lo ka pa…

Ka pa na thu in cah ta mi khal kha tui ni tiang ka mang ringring lai ko so khaw…

Lei tlun sang kaa pi ih ra lut ve mi ka fa na hrang ah,lilawng pa khat te hman ka lo dawn sak thei lo…A si nan, kai lilawng cu ka lo tung ding sak ta..Na kai in na ttum thei..na kai tik maw na ttum tik khal le duh dawt nak leh ralthat nak thawn pa khat te ten in pal aw tin in sim tu ka pa na ropi…

Ka pa na kut thawn ka feh nak zin ih meifar vang tu a um nawn lo tik ah cun……
Ka sente lai ih ‘ papa’….rual leh pi ka kom thiam caan ah cun ‘pa’….sia leh tha ka thei ih kei kar tha ka nei tik ah cun ‘ka pa’….na va sung lawi em….

Paradies ah kan tawng aw leh ding maw…

By-Uite Busul

(Visited 215 times, 1 visits today)

Comments

comments

3 Comments

  1. a tha ka ti nasa.Ngan tu a thiam nasa.Pai dundawtnak a hlut zia tla a tar fiang ka ti tuk..

  2. Pa sunlawinak hrang an va tha em

  3. Elijah Lairam Vapual says:

    pa’i duhdawt nk a va sunglawi em..a hngan tu thiam tuk

Comments

%d bloggers like this: