Famkimnak ah Tthawn

April 18
Tlawngkai Nithum

Famkimnak ah Tthawn

Kei cu nan lakah a lo riantu vekin ka um a si.
– Luke 22:27

Bible Siar Ding: Hebru 6:1-20

Kanmai’ minung duhhiarnak kimter ding lawng kan duh, kan tumtah sung poh cu Thlarau Thianghlim thawn ziangtik hmanah kan khat thei dah lo ding. Duhhamnak cu kan siatbal a ttul. Jesuh cu a famkim, ziang hmuahhmuah ih cemnetnak a si. Pathian in cuih hmun ahcun kan zate’n in hruai thleng thluh ding. Cumi cu pek awknak, midang va bomnak, mi va duhdawtnak le midang hrangih ziangkim pek awknak in a si.

Ni nikhat ni cu a ra thleng lai dingih cuih ni ahcun kan ruah awk tluk hnakih ttha sawn le nasa sawn dinhmun ah kan um ding ti ka zum a si. Himi hi hniksaknak lamzin a si. Himi hi Pathian ih thla (wings) in na taksa pum a zate a lo tuam thluh ih lawngfangkheh na sinak lang loin a lo hupphennak a si. Himi cu na khuaruahnak sungih na suangtuah baan lomi, Pathian in mangbangza in a lo timtuah cianak a si. Ziangti’n cuih hmun ah na thleng thei ding? Khrih hrangih harsat tuarnak in. “Harnak ka tuar sung hmuahhmuah ah i umpitu cu nanmah nan si,” (Luka 22:28). Jesuh in harnak a tuar, hniksaknak a tong. Amah hnakih harsatnak tuartu zohman an um lo (Hebru 4:15).

Mino pakhat in sualforhnak tuar lo khop in a nun a thianghlimter thei asile amah cu thutthentu ah ziangtik hmanah tuah a si lo ding. Pathian in kannih zumtu pawl hi atu vek san siava le nun borhhlawh sungah dingfelnak le nun thianghlim ih nung theitu siter in duh. Ziangahtile a ralai dingmi Bawipa ih thutthennak ni ah midang pawl thutthentu dingih tuah in duh ruangah a si. Harsatnak na ton caan le sualforhnak na ton caan ah Jesuh in, “Harnak ka tuarnak sung hmuahhmuah ah i umpitu cu nanmah nan si,” (Luka 22:28) a timi hi ruat aw. Bawipai’ sungah zumnak hngetkhoh nei ringring aw. Cule Pathian in tukforhnak sungah himte in a lo kilkhawi ding.

Bawipa cu rin-umzet in thlun awla Amah sungah hrintharnak nun nei ringring aw. Nitin tein hrintharnak nun nei ringring awla thlarau nun ah tthanglian dingin um zuam aw. Nitinte kan nunnak ah hril dingmi kan nei ringring. Nitinte pumpek awknak thar neih ringring na ttul zia na hmu aw deuhdeuh ding. Bawipai’ hrangah na pum na pek awk deuhdeuh asile Pathian in hrintharnak sungah huham cahnak le thiltitheinak thawn a lo thuam deuhdeuh dingih A hmin sunlawinak ah a lo hmang sinsin ding.

Hniksak na si lo ahcun hrinthar na si ringring thei lo ding.

@ Smith Wigglesworth

(Visited 33 times, 1 visits today)

Comments

comments

Comments

%d bloggers like this: