Falam

FALAM

    Falam khua hi Tlaisun hrin pawl ih din mi khua a siih , Britist pawl an lut hlan ah Falam Council an nei zo a si.Council Member pawl cu Pu ConBik, Pu Khar Lian,Pu Mang Hlur, Pu Cong Khar le Pu Bawi Hmung te pawl tla an si ih , Pu Con Bik hi an ho tu pa bik a si.

An san lai ah veng rukin an tthen sal ih hotu an nei ttheh a si. Cumi pawl cu Phangpho vengah Pu Suak Khar , Khuathar vengah HnirCia ,Laika vengah Pu Mang Hlur, Butu vengah Pu Thatphi, Hliap vngah Pu ZaKual ,Lungung vengah Pu Bawi Hmung te pawl tla an si. Cu lai san ah Falam hi inn 500 lai an um ih Britist thleng hlan lam ih sin ukawknak dan felfai zet in an nei zo ruangah Chin History a ti ropi zet a si.

Kum 1892 March ni 13 ah Brist in Falam an lak ih Security Venhim nak lam a ttha sawn ding ih an ruat ruang ah , 1892 June thla ah Tu ih Falam um nak hmun sawn ah an tthawn ta a si. Falam khua hlun cu Tlaisun khua an ti ih tu san tiang a ko hlen a si.Culai san ah Falam bial ah mi 20,000 lai an um zo a si.

Ticun Chin Hills cu District pakhat ah an din i Superintendent a um ih, hmunpi bik ah an tuah a si.Kum 1940 hrawng ah inn 100 lai an um ih , Chinese le Kala sumdawng pawl tla an um a si.Tedim ram Vanteh Khawmi Cingkhahau le Lumbang Khawmi Pu Sun Aung te khal dawr tuah in an um ve a si.

Indopi Pahnih nak ah khan , Falam cu ni 12 November 1943 ah Col.Sakum hoha mi Japan ralkap pawl in an la a si.Falam khua cu Cap.Inadaan in a ukih Britist lam ttang hmuah hmuah an tthat siamso ruangah Kala Dawr kai pawl cu India lam ah an tlan hlo thluh ih , civil mi zo hman an um ngam lo. Japan pawl an uk sungah Pu Con Bik tupa Pu Lian Luai in Bial pumpi uk tu ah an ret.

Japan pawl cu Imphal raldonakah an cak lo ih , Kawlram ih sin an kir sal hnu ah , Lushai Brigade telin Bihar Regiment- pawl cun ni10 October 1944 ah Falam khua cu an la thei sal a si.

Falam khua cu kum reipi Chin hills ih kawpi bik a si ttheu nan Ralkap acozah 1965 kaihnu ih sin Halkha ah an tthawn sal a si.

Kum 1992 ah khan Falam khua cu Kum 100 kimnak ropi zet in an tuah ih , inn 1,000 hrawng le milai 10,000 leng lo um nak hmun a si.Kum 1906 ihsin Tlawng an din ih , tu ah cun Hight School 2 le ih khun 300 lai umnak Hopital khal a um ih, Kum 1953 ah Motor khal a lut thei a si.

Falam khua cu Fartthawk,tlanglo,Balai, Cinmual ti in veng dangdang a um ihTlaisun, Zahau,Hlawnceu, Sim, Zanniat,Ngawn,Khualsim, Lente, Matu ,Halkha,Tedim ,Kawl ,Kala Tuluk miphun pawl tla an um ih tlang ttong ah Laizo ( Falam) ttong an hmang a si. Falam Laizo ttong cu Chin State misenpi hrang ah All Myanmar Radio in thu puang nak ah an hmang a si.

Politician le Hla sak thiam lang sar zual pawl

Politician langsar pawl cu: Pu No Zam, Pu Za Hre Lian , Pu Thang Tin Lian, Pu Fung Dun, Pu Mang Bur,..Pu SiaKu,.. Pu Hlur Hmung , Pu Nun Thang, Pu Thang Zam , Pu Vum Thawng, Pu Nung Lian, Pu Hlawn Piang , Pu Kam Lian Buai le Pu Lian Ci paw tla an si. Chin State Council tiang hna celh tu pawl cu Ral kap Politician lam ih sin Lt.Col Pu Kap Cung Nung ( Duhmang, Zawlpi ) le Maj Pu Al Tlir – Khualsim tla an si. Ral bawi lang sar pawl cu Maj Pu Kap Cong ( DrNi Khuaipa) Lumte khua, Capt Pu Tai Tthio ( Pu Run Bik pa) Tlauhmun ,Lt.col Hrang Tthio -Thanhniar khua ,Maj Pu Tai Kual – Lumbang khua pawl tla an si.( Pention hrih lo pawl cu ngan telh a si hrih lo.) A kim lo khal a um hrih ding.

Hlasak thiam hming thang pawl cu Salai Za Hleih Lal, Salai Tuan Ling Thang, Salai ThangZa Mang, Salai Aung Mang, Salai Thuah Aung , Salai Tawna , Salai San Lal Lian ,Salai Phun Ngio , Salai Sun Ceu , Salai Lal Eng Lian ,Salai Van Lal sak , Salai Zung Ceu pawl tla an si. Nu nau lam ah Mai Far Men Par , Mai Tha Hlei Vang , Mai Lal Pek Cuai ,Mai Cuang Kim , Mai Lal Than Pui Hi pawl hi a lang sar deuh pawl an si.

Acozah hnattuan Officer Langsar Pawl cu Chin History bu sung ah ngan re ro lai a si.

Ngancawk khal a si lo ruangah  Malte lawng famkim lo zet in ka tarlang mi a si.

 Salai Bawi Sawn

( 2004 Lentlang Magazine sungta lak mi a si )

(Visited 128 times, 1 visits today)

Comments

comments

One Comment

  1. A tha tuk aw! Kan Falam khua Chin Hill ih Capitol rori cu aw…ruat ruat ah cu thin a naa tuk aw…Kim cang zet in kan Falam thu hi cabu rori’n suah thei leh seh la..ka lungawi….

Comments

%d bloggers like this: