Falam Youth Conference Aanka Pawl

 

fyc

1.   Salai Van Cung Lian (BEng., UK. GFYO vice President)

2011 Norway ah Chin mi tonkhawmawknak ah ka rak tel dah. Cumi ah theihmi tampi ka va nei ih netalam pehtlaihawknak hrangah thathnemnak tampi ka ngah. Cuvek in tuittum mino pawl tonkhawmawknak ihsin hmailam ah pakhat le pakhat bawmtu le bawmmi kan si ding tiah ka hmu. Cule hiti ih mino hitizat tonawk umtlangnak caan kan ngah hi a sunglawituk zo tin ka hmu. Mino pawl theiaw in hmailam ah pehtlaihawknak le bawmawtonnak kan nei ngah ding hi a thupi zet.

2.   Pu Zung Hlei Thang, Falam peng Amyota Hluttaw palai, CPP

Hitivek in a rak um dah hrihlo lawlaw mi cangsuak ko dingih a tawlreltu Organizer pawl le a ra teltu nan zate parah tampi ka lungawi. Hitivekih mino pawl a phunphun ih an thiamnak hmuahhmuah, an talent pawl an suah ih an hmangkhawm thei mi hi thil tha ngaingai asi. Hihi a miotazi hrangah a thupi zetmi conference asi. Hitivek in mino pawl in Falam peng sung ummi hnam 12 le midang pawl thawn ttang tlang in kan tuah tlang thok thei mi hi good beginning ngaingai si. Kan pehlanta vivo thei ding hi a thupi tuk.

3. Salai Min Kyaw Naing, FYC Organizer Falam

Kan ni a sau tuk ih….. Tuittum hi ramleng in an timtuahnak a reizo nan Falam khawsung ihsin caan kan laknak hi thla khat le hrek lawng a siih Falam dinhmun in cu mino le tlawngta kan mal ih hna tuantu ding le pehtlaihawk caan a mal. Cun tikcucaan lamah a ni kha Dec 27-Jan 2 tiang a siih khawte lamih sawm mi pawl tla an tel thei lo. A tikcu caan hi Falam khawsung pawl hrang lawng silo in khawte lam pawl hrang khal ruat in tahtthimnak ah lo hna tuan lo caan tivek, zate man tlang caan ah tuah thei sehla a tha ding.

4. Kianghrol, Klirlung

Conference a si tik ah mino pawl in kan hmuh daan kan sim ding ih Sayakyi Van Kyi kha thu rontlak ah ret in thu ron ding a sinaan… tucu Sayakyi Van Kyi nih thutawi simnak a neiih mino pawl in kan ngai men tikah conference sinak thawn a kaih aw tuk lo a bang.  Miphun tungding tu cu calai kan ti rero cing in hitluk ni rei le kan ruahsan zetmi tonkhawmnak ah calai lam dinhmun a co lo vek a siih  calai mi dinhmun in cu thin a na zet.

5. Dr. Aung Moo Myint, Falam Khayaing Ranvulh lam ih hotu 9 ေမြးျမဴေရးႏွင့္ကုသေရးဦးစီးဌာန၊ ဖလမ္းခရိုင္ ေမြးျမဴေရးဌါန၊ လက္ေထာက္ ညႊန္ၾကားေရးမွဴး)

An lung rual zet, an phur zet, hmailam hrangah Falam peng lawng silo in Chin ramkulh pi ih lungrualnak ih rahsuak a si tiah ka hmu.

Hitin an lungrual thei ringring asile ramkhelthu lam thlengawknak khalah hlawknak a suak ding, cun tuvek ih thlengawknak caan ah hitivek in mino pawl tonkhawmaw ruang ah Falam peng lawng hman silo in Chin ramkulh pi a thangso sinsin nak dingah tampi a bawm ding tiah ka hmu.

6. Salai Siampi, Conference Steward, Farthok Veng, Falam

Pum kan peknak hi a man hla lawlaw. Ziangruagah tile Kawlrawn siseh, Lai tlang siseh, ramdang siseh hmuawk dahlo, tongawk dahlo kan tongawkhawm theiih lungrualnak tla kan hmuaw ih kan duhdawtawk sinsin, hmuaw dahlo tla kan hmuawk ih ka caan pekmi hi a manhla lawlaw tiah ka ruat.

7. Mai Veronica Ni Siang Par, FYC Steering Committee

Hi ti vek tonkhawmawknak nei thei dingih ka sunmang hi a rak rei zet zo nan keimah pakhat lawng cun zianghman ka tuahsuak thei loih tuvek in rualpi pawl thawn kan vun beawkhawm. A bik in cu internet in kan biakawk ih tuahsuak ding thu kan reltlang ih kan tui tlang nasa, keimah tla ka lungawi nasa. Falam mino pawl tonawknak nei in mah le mah thinlung hmuhawknak kan neih hnuah lungrual takin kan ke kan kar thei ding timi ruahsannak le upa le mino karlak ah cap tumpi kan nei. Cumi pehzom sal thei nak ding ah tui’ Youth Conference kan tuah nak san asi.

8. Salai Cung Aung, Cung Music Academy Director, Yangon

Himi Falam Youth Conference hi a hmaisabiknak asi vekin ti baibahnak tete, remcanlonak tete cu a um men thei nan a tlangpithu in vun zoh sehla cu hitluk Kawlram sung hmuahhmuah le ramleng mino pawl tongaw thei hi a sunglawi ka ti. Hmai kum ah cu hihnak ih ttha, program pawl tla citlit zet in nei thei sehla cu duhthusam asi.

Ka ra thlenpek kha cu kan program pawl ka zoh tikah training pungsan vek in kha a rak um ih, ziang kan ti pei, mino hrangah a hnittarah um pei maw, training maw si conference saw ti kha thusuhnak tampi a suak. K arak thin nuamlo zet. Asinan a tuisun a netabik ni ah Falam Youth Network kan din thei, Statement tla kan suah thei ih a hnittarah um zet tiah ka hmu.

Awimawi lam thawn pehpar in cu ka lungkimlo law law. Ziangruangah tile karak beisei vek in himi Awnmawi lam thawn mino le mino kan pehtlaihawknak hi a thalo cu ka tilo nan ka aazah lo law law. Kum dang kan tuah leh le hihnak ih tha ih tuah thei ding cun ka bei sei.

9. Salai Nhgepi Thian Uk Thang, Secretary 3, CNP

Falam Youth Conference hi a hmaisabiknak a siih Vuankyi Chuk amah rori rak ra ding asinan tiah kei cun ka hmu.

Ramsung ramleng kut kaiaw ih hnatuannak a hmaisabiknak asi. Party pakhat dingfeknak dingih tuahmi vek silo in mino pawl in ramkhel hnatuannak ah ziangtluk in kan thupi, ramkhelh lamah mi dung ih tang lo ding in ruahnak kan pe thei hi Falam  fing rei a cat caan asi tiah ka hmu.

San thar le system thar ih tuah mi asi ih tufang ih new model, new system ih fehpimi thuhla pawl kan zirhawk ngah ruangah a thathnemnak tampi um ding tin ka hmu. Minung 300 leng lo tonkhawmawnak hi tangkainak a neilo kan tile nasazet in kan palh ding. A hlawhtling le tlinglo lamah cun kanmah tahfung le hmuhdaan cio a si ding.

10. Salai Ukte, Falam Mino Pawlkom Yangon

Tui ttum hi a zate huap in kan zoh asile a hlawhtling tiah ka ruat. Kan rak sohlam ahcun mipi  hotu lam ah cu lungkimlonak a um ko nan mino pawl tampi kha kan thinlung a tongaw ih cumi pawl kan phorhsuak thei ih hitin kan tongkhawmaw thei hi kan hlawhtling tin ka ruat.

 

 

 

(Visited 369 times, 1 visits today)

Comments

comments

Comments

%d bloggers like this: