Falam Senpi Inn Thuanthu


Salai Van Cung Lian (UK)

2017 ihsin, Falam khuapi ih Senpi inn cu kum 100 a kim thlang a si. Mirang san ahcun Drill Shed tiah an rak ko mi a si. 1892 March thla ihsin, Mirang in Chin ram zaten an mah rori in an uk thok. Falam khuapi khal cu 1892 kum ah dinsuak a si ih, 1892 kum June thla ihsin Mirang ralkap le ralbawi pawl an um thok. Falam ih Mirang officer țuan hmaisabik cu 39th Gharwal Rifles ihsin Major Browne (D.S.O) a si. Mirang pawl cun, ralkap pawl umnak ding inn (army barracks) pawl an rak sak thok. Drill Shed timi innpi khal cu 1917 kum ah Mirang Acozah ih Public Work Department in an sak1 . Drill Shed saknak dingah, Fort White (Thuklai) ih inn pawl an bal ih a thingrua pawl cu Falam ah phur in, Drill Shed an rak sak. Cumi san ahcun, ban țhuam (columns) pawl le canphio (metal corrugated roof) lawng a rak um ih, phar (wall) a rak um lo.

Drill Shed cu ralkap pawl training an tuahnak hmun, an hriamnam (weapons) le an ei-inn ding pawl an retnak hmun a si. Falam ih Drill Shed cu ralkap pawl tonkhawmnak (social club), aw suaklomi zuknung (silent movie) zohnak le Mirang Acozah bawi pawl le misenpi tonkhawmnak pawl ah an rak hmang. 1939 April ah, Governor of Burma ih Counsellor (Counseller of His Majesty the Governer of Burma) pa cu Chinram ah a ra tlawng ih, ralkap pawl in sunglawi zet in an rak hmuak. Drill Shed sung ah, Chin ram ih Miuk le tlangsuak upa pawl thawn khal, tonkhawm awknak an rak nei.

Chinram Hmailam hrang Lairel tu Chinram Senpi Inn

Hi inn pi cu Falam khuami pawl ih hman mi Senpi inn lawng a rak silo ih, Chin ram mipi ih Senpi inn khal a rak si. Chinram hmailam ke kan kaar dan ding khal lai relnak hmun a rak si. Leitlun ralpi voi 2 nak a cem in, Mirang pawl cun Kawlram uk daan ding policy an tuah mi “White Paper on Burma 1945” ah, tlangpar mi pawl tel loin, Kawlram pi cu zalennak pek ding. Sihmansehla, tlangpar mi pawl anmah ih Burma ram sungah kom an duh a si ah cun, an kom thei ti a si2 . Cutik ah a voikhat nak Panglong Conference (First Panglong Conference) cu Panglong khua ah an rak tuah ih Chinram ai-awh in Pu Hlur Hmung, Pu Pum Za Mang, Pu Kio Mang le țonglettu Pu Kawl Sum pawl an rak feh. First Panglong Conference cu, informal tonkhawmnak a rak si ruangah thu qhencatmi an rak nei lo.3 . Burma ram ihsin Palai pawl a si mi U Nu le U Saw te pawl cun, tlangparmi pawl Burma ram sungih umding ih sawmnak an raknei. Thurelcat mi ngaingai (resolutions) cu a um lo nan, tlangpar mi pawl hmailam ih hna an ṭuantlang theinak dingah tiah Frontier Areas Director, H.N.C Stevenson ih hohanak in “United Burma Culture Society” timi an rak din. Chinram hmailam fehdan ding rel a rak țul thlang. Cutikah, Chin ram ih Miuk hmuahhmuah le upa pawl cu, hi seenpi inn ah, Chin ram hmailam ke kaar dan ding 1946 October ah thurelnak an raknei4 . Hi tawk hmunih, an thu relcat mi pawl tla cu:

1. Chin Hills cu Mirang uknak tangah um hrih ding.

2. Tlangparmi unau dang Shan le Kachin pawl thawn hnaṭuan tlang ding.

3. 1946 Panglong ih din mi United Burma Culture Society ah telnak pehzom ding.

4. a) Chin mipi pawl fimthiamnak an nei ih (enlightened) anmahten an ding thei, anmah le dan ten an ukawk thei ding a si ahcun, British Cozah ih White Paper (စင္မလားစကၠျဖဴစီမံကိန္း) ah le Burma ram uktu pa in 1946 Panglong Conference ah a sim cia vek in, Burma ram thawn kom ding ah zianghman harsa nak a um lo ding.

b) Cutin a si lo ahcun, kan kom lo ding. Cumi hnu 1946 December thla ah General Aungsan cu London ah a va feh ih, Aungsan-Atlee Cachuk an va tuah. Cui, cachuk sungah tlangparmi pawl, Burma ram thawn zalennak laktlang an duh a si ahcun, an lak thei timi a um5 . Cutin, Burma le Chin rualremnak hrangah Aung San teih party Pha.Sa.Pa.La palai pawl a si mi Pu Vum Thu Maung, U Ba Saing le U Mg Gale khal cu, Chinram mipi thawn hi tawk hmun ah tonkhawmnak an rak nei ih, Chinram cu Burma ram thawn, hmunkhatte ah zalennak lakding ih, thusimnak an rak nei6 . Cutin, 1947 ih tuahmi Panglong Conference ah, Chinram cu Burma ram thawn hmunkhat ah zalennak lak dingin lungkim a rak si. Panglong Conference ih palai pawl lungkimmi hi, Chin mipi pawl ih duhnak a si taktak maw timi zingzoinak an rak nei cih ih cucu Frontier Areas Commission of Enquiry tiah an ko. Himi zingzoinak ah, Chinram cu Burma ram thawn an kom duh a si tiah thu an țhen ih, ziangvek dinhmun in an kom ding timi cu, parliament in thu țhensakseh tiah thuțhennak an rak nei 7 . Cutin, 1948 January ni 4 niah, Chinram cu Burma ram pi thawn zalennak hmunkhat ah kan lak tlang ih, 1947 Daanhrampi vek in, Chin Special Division, Chin Affairs Council le Chin Affairs Ministry pawl a rak suak.

Chin National Day Cangsuaknak Hmun

Chin Affairs Council ih hnațuan hmaisabik cu Chin ram ukdaan kha Miuk daan ihsin Democracy daan ah thleng ding a rak si. Cumi hrangah, Enquiry Committee tla an rak din ih Chin ram ah feh in, mipi ih duhnak an zingzoi vivo. Burma ram pi zalennak kan ngah mi hrang puaipi khal Chin ram khualipi Falam ih tuahding in timtuahnak an rak nei. Zalennak cu January ni 4 niah kan ngah mi a si ko nan, rampi President tiang tel ding a si ruangah February 19-22 tiang tuahding ah timtuahnak an rak nei. Himi puaipi hrangah kumpi Acozah in Budget Rupees 21,000 a rak pek ih, Chinram ihsin mitamzet sawm an rak si8 . Rampi President Sao Shwe Taik khal Falam ah a rak ra ih, thusimnak a rak nei. Cumi, Zalennak ngahmi sunloihnak puaipi an tuah laifang ah, Chin ram uknak thlengding ih a zingzoitu pawl Falam an thleng thawn a deng aw. Cutikah, thurelnak an rak nei cih ih Chin ram uknak cu Miuk daan ihsin, Democracy daan thleng dingah lungkimnak cu February ni 20 ah an raknei. Cui Falam khualipi ih um Senpi inn ih Chinram hrang ah Democracy daan hmang ding in an lungkim ni ‘February 20’ cu Chin Affairs Council in October 9, 1950 ih tuahmi meeting ah, Chin National Day siseh tiah, nemhngetnak a rak nei sak ih, tuni tiang February 20 a kim tinten, Chin National Day tiah sunglawizet ih kan hman ringring a si. Burma ramsung ih um, Chin miphun kan sinak a lang tertu, Miphun pakhat kan si, kanmahte nunphung le calai kan nei a si tiah kan au theinak khal hi, Falam khuapi ih um, Senpi inn ihsin a thok mi a si.

Santhar Senpi Inn

Zalennak kan ngah hnu ahcun, Drill Shed tiih rak ko mi cu, țhaten rem dingin, țuanvo neitu pawl in timtuahnak an rak nei. Chin Special Division ih Deputy Commissioner Pu Kiam Si ih hohanak in Acozah paisa le misenpi ih thawhmi paisa thawn, 1953-1954 kum ah thinginn thawn mawi zet in an rak sak9 . Senpi inn cu, tu hlan vek thotho ih bawi hmuaknak, mikhual riaknak, rawl khawlnak, puai tuahnak, meeting tuahnak, stage show pawl tuahnak ah a phunphun in Chin miphun, a hleice in Falam khuami pawl kum tam zet a rak rian. Cui, thing innpi cu a siat phah thlang tikah, State Peace and Development Council uk laiah, a thar in tlakrawh thawn țhazet in 1996 kumah an rem/sak sal ih, 1997 kum ah ṭheh suak a si ih, tuni tiang Falam Senpi inn tiah hmang rero lai a si.

Thunetnak

Falam ih Senpi inn cu kum 100 a kim thlang. Kum 100 sung a ke kaar dan kan zoh a si ahcun, inn pakhat men si lo in, thuanthu ropi nei mi innpi a si timi kan hmu thei. Falam khuapi lawng si loin, Chinram riantu innpi a si. Chinram hmailam ke kan kaar theinak ding hrang lairelnak hmun a rak si. Hitawk hmun ih, thurelnak ruangah kan nih Chin mi zaten, tuvek dinhmun kan thlengnak a si. Cuhleiah, leitlun ah Chinmi pakhat kan sinak kan langter theinak, Chinmi tiah “identity” pakhat kan nei theinak, hlan san ih kan hmang mi Miuk daan ihsin, santhar daan a si mi Democracy daan kan hmang thok theinak, Chinram mipi hmuahhmuah hi tawk hmun ah komkhawm in thurel tlangnak kan neihnak thawngin Chinmi pawl kan lungrual daan a lang theinak hrampi cu Falam Senpi inn hi a si.

++++++++++++++++++++++++++++++

Photo Descriptions:

Photo 1. 1939, April ah Burma ram uktu ih Counsellor (Counseller of His Majesty the Governer of Burma) Chin ram a ra tlawng ih, Drill Shed (Falam Senpi Inn) hmai ih sin, Chin Hills Battalion ih upat nak thawn an hmuak lai.

Photo 2. 1939, April ah Burma ram uktu ih Counsellor (Counseller of His Majesty the Governer of Burma) Chin ram a ra tlawng ih, Drill Shed (Falam Senpi Inn) ah thu a sim lai fang a si. Chin ram ih miuk le tlangsuak upa hmuah hmuah khal in an rak hmuak.

Rawnmi;
1 The Chin Hills Battalion Records, British Library Reference: MSS EUR E250
2 Part II of White Paper 1945
3 ဦးေဖခင္, ကိုယ္ေတြ႔ပင္လံု
4 Tinker, Hugh, Burma The Struggle For Independence, pg. 97
5 Paragraph 8 of “Aung San – Atlee Accord”
6 British Library Reference, B/F&FA 1294, 1947. Pg. 68
7 Report of the Frontier Areas Committee of Enquiry, 1947
8 Pu R. Tuang Hmung (Deputy Commissioner, Chin Special Division), Annual Report of 1948 9 Lawrence T. Htawng, Falam Khuapi Uar A Um Khuahlan ih sin, Falam Centenary Megazine

 

(Visited 269 times, 3 visits today)

Comments

comments

Comments

%d bloggers like this: