Falam Run Inn Tlun Kum Ah Sawm Na Si Ve Maw?

Leitlun hring minung lakah “Falam” timi kan lungthlitum tling ko in, a simfiang theitu an um ding maw!

-Uk Lian

Falam timi simfiang tum le duhdawtnak timi simfiang tum hi a harsat daan a bangaw ding ka zum. Ziangah tile, Falam timi tongfang tawite ahhin miphun pakhat sinak, khua le ram mi sinak pawl a tel cih ringring ruangah a si. Bet kherkher cu a tul lonan, Falam timi ah thisen tiang in a tel a si.

“Falam Run Inn Tlun Kum” ruangah zovek an si Falam timi ruah lo a theihlo. Falam puai cu Falam ih suak pawl hrangah a sunglawi hleice ding, an suahnak khua rori a si. Asinan, ni khat le zan khat hman Falam a thleng dahlo pawl hrangah teh an sunlawih daan a deem cuang ding maw si, ziangruangah kan deem ter ding timi ruah a tul.

Falam timi cu Pu Hrang Thio le Pu Con Bik pawl ta lawng a silo. Falam mi sinak neitu pawl le inn teek ngaingai ka sive ti awtu pawl lakah Kawl le Vai pawl tiang an rak tel ruangah, Falam timi hin a huap kau ih pomrem theilo miphun khal a nei thiang lo a si. Cucu a si Falam mi pawlih hamthatnak le mawinak famkim cu!

Tui tum ih Falam khua ih puai hman ding mi hi Falam kum 125 kimnak puai, Falam sizung kum 100 kimnak puai le senpi inn pawl kum 100 kimnak puai men asilo, tui tum puai kan hman ding mi cu Falam timi ruangah leitlun ah mi pakhat kan sinak, puai sunglawi sawn a si ti’n thlir a theih. Curuangah, Falam tong ih awkam a sem awtu pawl hrang ahcun kan puai hman ding mi hi zo in a hngakhlap lo ding!

Falam bazar tong hmang pawl lawng ih puai a silo, Falam ih rak um dah pawl lawng ih puai a silo, “a si ko ual” timi tong hmang pawl lawng ih puai a si theilo


Falam khua ih suak pawl lawng ih puai a silo, Falam bazar tong hmang pawl lawng ih puai a silo, Falam ih rak um dah pawl lawng ih puai a silo, “a si ko ual” timi tong hmang pawl lawng ih puai a si theilo. Kan unau peng dang pawl, Falam ih tlawng a rak kai dahtu pawl, Falam ih a rak pitling tu pawl hrang khalih puai sunglawi a si ve. Tui tum puai hi kan unau peng dang pawlih an sunlawih ngam ding khalin sawmnak le hmuahnak awkam tam ter sinsin ding kan si.

Leitlun miphun kip in, khua an nei cio ih, khawpibik timi khal an nei sin theu. Falam khua hi, zo pawl ih khawpibik a si timi simfiang a tul nawnlo. Falam khua ah ni khat hman a thleng dahlo pawl hrang khalah Falam khua cu upat a phu hrimhrim a si. Tui tum ah zo pawlin, puai an hruaikai ding timi hnakin tui tum Falam puai ah ziang vekin na thinlung na innteek aw ngam ve ding timi parah ziangvekin Falam na duhdawt timi a lang ding.

Ram leng ihsin run-inn le Falam khua pan in, an tlung thok rero thlang. Ram sung khalin, puai hmang tum lemlo khal an tok aw rero thlang. Sim zo bangin, Falam puai hmang ding men kan silo, miphun pakhat, Falam tong hmang pakhat, tui’h mi pakhat na sinak langternak puai a si ruangah tuitum puai hi upat a phu hliahhliah a si. Falam khua ihsin ahleice in tlung dingah sawmnak cakuat, na ngah hnakin na thisen ih neitu na sinak kha, na innteeknak sawn cu a si.

Comments

comments

Comments

%d bloggers like this: