Falam Puaipi Hlapi “FALAM” Tuah Fel A Si Ta!!


Falam puaipi hrang ih hlapi “FALAM”, Salai John LSL ih phuah mi, Chin awnmawi khawvel ih milar, Myanmar rampum huap ih hminnei, Mai Sung Tin Par, Mai Ma Kim, Dika, Israel VSL, David Lai pawl ih sak mi, Desert Rose Band ih awnmawi tum mi cu zatlang mipi pawl ih zoh theih dingin thehfel a si ta! Thaisun ah Chinland Today YouTube Channel, Facebook Page ihsin tlangthan a si ding.

Zuknung pawl hi Falam mawinak zuk pawl telh cih in le Falam mino leng le vaal pawl ih can mi pawl telh cih in Hlasaaktu pawl ih hlasak lai pawl thawn rem khawm mi a si.

“Caan bicilh zet lakah kan tuah ih duhthusam ngaingai vekcun a si thei lo. Asinan kan caan nei mi zat sung ih kan tuah mi par ahcun ka lung hmui zet ih kan lungawi tawk zet, kan theitawp kan zuam ih di a riam zet” tiin Desert Rose Band ih
Guitarlist le Falam Puaipi hrang ih Awnmawi tuanvo latu Salai Cung Awng cun a sim.

Hi hla hrang ih director hi Ukte@Thingkuang a siih, zuknung can mi pawl cu Falam khawsung, khawkiang pawl ih zuk mi pawl tla an si.

Falam puaipi hi Feb 21-22 tiang a si dingih himi hlanah Chin’s Got Talent zuamawknak Feb 16-18 tiang a um ding. Feb 20 Chin National Day siar cihin ni 5 sung Falam ah puai ropi zet hman a si ding.#

Comments

comments

Comments

%d bloggers like this: