Falam Puaipi Hla “FALAM” A Hlafang Tepsungnak

Falam puaipi; Falam kum 125 kim, Falam senpi inn kum 100 kim, Sizung kum 100 kim, Ruun Inn tlun kum, February 21-22, hrang ih “Falam” timi hla cu Myanmar rampi hminnei le Chin mi hlasak thiam rinsan mi pa 5 pawl in Rangoon khawpi ih Promise Land Studio Phachy le CMA Studio ah an thun rero zo. Mipi hnenah tlangthan dingin tawlrel rero lai a si.

Hi hlafing khat te hi, hlacaang tampi um a silonan danglamnak tamzet a nei.

A thoknak ah a chorus ih cemnak in fiangriahro te in an sak. Cutin awnmawi rualrem zet ih remkhawm miin a thlun ih a caang khatnak an sak thok cih.

A Chorus luh hlan te ah, mipiih sak nuam ding awthluk rem zet in, cafang sullam neile thuuk pawl remkhawm mi a si. Mipi zaran hrang ih saknuam si dingin a Chorus cu awnmawiin a rak thlun cih.

A netnak caang, aw tisannak zawnte ih a hlafang pawl khal awnmawi thawn a va kaihaw em!

A hla phuahtu Salai John Lsl cun hi a hla thuthawn pehpar ih Chinland Today Media ih a thusuhnaka ah “Falam ah na suak lo thei. Falam ah na thanglian lo thei. Falam na thleng dah lo men thei. Sinan Falam timi thlahnuai tangah Falam sinak na nei ve. Falam ka si kan ti awk theinak dingah ram le peng le hmin neimi kan si. Vaivuan ih vakvai rero men kan si lo. Pumcawmawknak ruangah hmun dangdangah cun kan thleng ding. Nan mi vaivuan men kan si lo. Miphun le ram timi then a theih lo zia langter ka duh. Hla thoknak ah tla minung lakah minung pakhat sinak in neitertu ti a si” tiah a ti..

A hlathu pawl ahcun Falam ih a muril le Falam sinak, a mipi pawl ih an Duhdawtnak, an seherhnak pawl a phumtel.

“FALAM”

Phuah : John LSL

Sancem tiang hmunseh, Duhdawt mi Falam.
Hrinhniang na fa za in, Thlaza kan cam Maw Falam.

Minung lakah, minung pakhat sinak i nei tertu,
Hih leitlun ah, dinhmun pakhat i pek, i co tertu

Pre chorus:
Rinumnak, Dingfelnak thlasuah cotu na si,
Thleidangnak iksiknak hmuahhmuah dotu na si.

Chorus:
Maw Falam!
Ruun inn nuam ah tonsalnak ding caan tha,
Na tefa rual in kan hngakhlap ee
Maw Falam;
Duhdawtnak hla lungrualten kan sak ding,
Na na na na, na na na, na na na…
Sancem tiang hmunseh, hringtu nu Falam,
Hrinhniang na fa zain, Thlaza kan cam Maw Falam!

Bridge:
A liamzo mi kan suulhnu hei cuan sal tikah,
Rinumnak, dingfelnak, ralthatnak thawn;
Pupa pawl ih thisen le mitthli thawn an humhim.
Sancem tiang hmunseh, Duhdawt mi Falam.
Hrinhniang na fa zain, Thlaza kan cam Maw Falam.
##

(Visited 325 times, 1 visits today)

Comments

comments

Comments

%d bloggers like this: