Falam Pawl Ih “Pu”

1743594_681110941952954_1971898787_n

Falam Pawl Ih “Pu”

Van Bawi Lian

Zovek miphun khalin biakawk dan, pawlkomawk dan, rawl ei dan, hnipuan hruhdan ti pawl mah le cin dan an nei cio. Cumi lakah Falam pawl ih an cin le dan lakih ka uar zet mi cu “Pu” tiih an kawhawk mi awkam te a si.

Kum reinawn, Falam khawpi sung ih ṭhanglian ngaingai mi thawn pawlkom aw tuk lemloin ka um. India ram lamah Falam, Hakha, Tedim, Mindat, Matupi pengdang pawl thawn kan tlangleng tlang khawm ih kan ṭong hman mi le kan um tlanlen zia khal a rak cawhpolh aw thluh.

Internet san kan thleng ih cutin mail in siseh facebook, social network phunphun in rualpi tete, nauhak laiih rualṭha tete thawn kan sar aw vivo. Internet zar kan rak co ve. Cutin rualpi hlun, nauhak laiih rualṭha pawl thaw cun pawlkomawknak le biakawknak kan nei ṭheu. Cawhpolh tuk ih karak ṭongnak a rei ruangah a can ahcun ka rel mi tla an rak theithiam cuca lo ih hnihsuak ah a cangzik te ṭheu. Chin mi pawl cu ṭong lamah kan lian ih kan lennak lawngte kan hmangthiam deuh hrihlo.

Falam mino pawl kawmawknak ih danglam zet pakhat cu thuhla picang le thungai thurel ding ah, capoh thunuam rel hmaisa in pakhat le pakhat soiawk hi an titi kamkeunak a si ṭheu. Hi hi Falam mino pawl ih thin lungthiang zia tilangtu le minuamaw paih mi an sinak tilangtu a si in ka thei.

Nu le Pa, u le nau pawl kawhawknak ahcun danglam cu a um hlei cuanglo. Nu lam ih pa, pa lam ih nu le pa, nu ih nau le pawl khal Falam pengpi ih kawhdan kelten, pite, pute, pu, pi, ni, rang, mo.. tvp in an hmang ve thluh ko.

Asinan rualṭha ngaingai le kawmngaih capoh, hnihsuah saipi, soiawkngam cin ih an ngaihmi pawl an kawh dan lawngte cu pengdang pawl leh midang pawl ih kawhawknak vek siloin a hleice in cuangmuar zetin “Pu” timi ṭongfang te an hmang.
Hi cafang hin a kotu in a kawhmi parih a lainatnak le a komngaihnak a tilang a si. Ṭahtimnak ah rual le pawl tiih an hmannak asiahcun Falam mino, Falam peng sungsuak sitho siin rualpi pawl le hmelthei komngaihmi pawl relnak lam a khih hmuh. Pu le pawl ti ṭongfang an hman veten rualpi menlawng silo, komngaih aw ngaingai mi, nitin rak tlangleng tlang dah, thuhla rak hlawmaw ringring ṭheu mi, laicinawknak neicuang silo ih sungkhatawknak an relnak a si ti a khih hmuh a si.

Falam khawsungsuak, ṭhanglian mino tete pawl ih lungput hi Falam peng dang ih um pawl thawn tampi a rak tan aw. Ka hnak I do zet tu le ka helhkam zet ṭheu mi lakah Falam pengṭhen unau dang pawl ih Falam khawpi tlaihsannak an neih maltuk vek ih a lang ṭheu mi hi a si. Lairawn ih a ṭhanglian mi mino, leng le val tampi ih uarmi khawpi, tlaihsanmi khawpi a si ding hi Falam khawpi ṭhansohnak dingih a thupi zet mi a si.

Falam mino pawl ih ṭongfang tamzet, uar um mi le duhnung tete pawl lakah “Pu” timi te hin Falam khawpi ih ṭhanglian mino pawl ih duhdawtawknak le pakhat le pakhat lainatawknak, laicinawknak hi a lang ter a si.#

Comments

comments

One Comment

  1. Kan ‘Pu’ ttongfang mawite kan hman vivo nak dingah
    cun Kan Ttong in kan kir/tonawk a ttul, kan ttongih kan
    tonawk cun kan lungrual vivo ding.

Comments

%d bloggers like this: