Falam le Keimah (2)

Zingpit sung cu lung aa ciaci in Falam khaw sung cu ka cuan rero. Canphio (rangva) inn malte lawng umnak khua ihsin canphio inn le tlakrawh inn hlir umnak ah ka vun thleng thutthi cu ka ruahnak an vavai. Falam ahhin di inn teh a um ve pei maw, ti lamlam tla ka ruat. Ka hrang ahcun Falam cu a rak ropi riai!

Tawkfang nawn ihsin thil rim danglam pakhat ka thei. Coka lam ihsin a ra. Ziangmi rim a si nan zum? Falam pawl in duat zet in Rahsin kan timi buh rim a si. Falam zingpit zilthli thiang zet lakih a ra tel mi Rahsin rim te kha tuini tiang in ka hngilh thei lo.

Falam ih phun riat ka kai tiang ka ei leh ding mi Rahsin buh rim ka theih hmaisabik ttum a si ih, cumi lai ahcun buh rim khal a bang ka ti lo. Kan vun ei tik ah tla cun a rim a tak nawn bet ih ka ei thei mumal lo lawk. Asinan can a rung rei ih Rahsin rim kha buh rim ah a rung cang kan ti ding maw, buh rim kha Rahsin rim ah a cang kan ti ding maw, a rim siatnak tla thei nawn lo’n thaw ti zet in kan rak ei thei.

Keimah Falam ih tlawng ka kai hnu ah, kan innsang ah Falam ih tlawngkai minung pali kan rak um. Ka pa le ka pate khawte ah tlawng saya an si ih, tlangpar ram harsa hrangah cozah in somdawlnak a pek mi ration fang an rak ngah. (Rahsin timi hi ration ihsin a ra mi a si ti hman hi lehhnu pi lawng ah ka run thei sapbai).

Ka pa le ka pate in an ngah mi Rahsin fang cu khua lam ah tlun lo in, kan unau li ei ding ah an tanta ttheu. Cumi um lo sehla ei ding kan nei lo ding ih, tlawng kai thei lo ding kan si. Nu le pa, pi le pu khal in cumi Rahsin fang rinsan ih tlawng in thlah mi kan si. Curuangah kan hrang ahcun Rahsin hi kan nun hmailam can tthumawknak pakhat a rak si.

Rahsin buh hi cozah in lothlo pawl hnen ihsin a khonkhawm mi buh a si ih, ruahpi ih ciah mi, fang phunphun rawikhawm mi, reipi ret zo mi, tivek a si ruangah rim a neih cuangnak a si. Falam khaw sung khal ah mi neinung pawl cun an ei lo. Vok rawl ah an hmang. Mi tthenkhat cun ei nuam deuh seh tiah cet thawn an rial sal.

Asinan kannih cun rial bet lo’n a khawlh lawng khawlh in kan ei. A rial betnak ding paisa khal kan harsa. Rial bet cun a heu cuang fawn ruangah tlawngkai sung kan daihawk lo khal kan phang. Cuti’n mi rethei ti na fam cun, rah sin cu a hringhran in kan ei bupbo mai. Hnihsuak saithiam tthenkhat in, “Falam pawl cu farah ding hrimhrim kan si, kan ei mi buh rori khal farah ti men hman si lo’n rahsin a si si,” an timi tla ka vun mangsuak sal. A hmin thawn an kaihkop thiam ka ti zet!

Khatlam ah, tlawng pit can ah khua kan tlung ih kut thawn sum ih den mi fangcang kan vun ei cuh,a rim a hmui in a hnang ttha fawn si, fangtlor ei vek khi a si. Ei pek ahcun a har lala. Asinan malte kan um ih kan zongsang sal. Cuti’n Falam ah Rahsin kan vung ei sal cu, a tir ih a rim te kha a rak nam lala lawk. Curuangah kannih hrang ahcun Rahsin rim hi Falam ih rim khal a si ih, lung a ti leng cuang.

Mikhual kan neih tam deuh can tivek ahcun kan Rahsin fang in in daih lo ih a leng ihta kan lei tawk khal a rak tam. Cumi can khal ah fang lakih a man ol bik tete kan rak lei ttheu. Hmeh le tihang ding kan neih thei lo khal ah, ei ding fang kan neih cun tlawngkai suah ttentto kan rak tum mi kha vun ruat sal ahhin ka lung a zur ttheu!

Falam ih fang a har cengmang len thil ol-ai a si lo. Fur can ih lamzin a siat can ah, Kawl lam ihsin Pu Ral Ling ih fang phurtu mawttaw lamzin ah an tan cang a um ttheu. Cuvek can ahcun Falam khaw pumpi ih thinhar a si bik. Kan zate deuhthaw in Pu Ral Ling tei’ cawm mi tluk kan si ti a theih hial ding. A cancan ah tla cun Vankau ihsin Lumbang, Parte lam ah lamzin leimin a um maw ti hung zoh tla an rak um.

Hminsin tlak zet mi cu, cuvek in lamzin sia ruangih fang a har can khal ah Pu Ral Ling in fang man kaiter lo in, Falam khaw sung minung pawl lakah paisa neih ruangih lei tam hleice thei tivek um lo dingte’n, semsem damdam ih in rak zawrh ttheu mi kha a si. A sunglawi hleice tuk. Kan dunglam tilian le leimin ruangih Falam khawpi a harsat tiang khal ah an innsang in cuvek thotho in an run tuah ti kan thei ih ngaisan an um ngaingai.

Sianglianuk Kianghrol

Comments

comments

Comments

%d bloggers like this: