Falam le Keimah (1)

Paradise RiakLangz

Kei hi khawte fa, Aikawn tlang liam Darteti ih suak ka si ih phun li ka kai thok tiang ah Falam ka hmu hrih lo. Asinan ka u le ka pate pawl Falam ah inn hlang in tlawng an kai ttheu ih an hung tlun ah thil in sum ttheu ruangah “Falam ihsin hung tlung” timi hi kan a rak sunglawi zet. Falam ih tlawngkai ve tla cu ka rak cak ttiattia.

Tlawngpit ah khua hung tlung in khua ih nauhak pawl mutthai sum ciamco ih sunlawizia hi khawpi um pawl in an theih ve lo mi nun pakhat cu a si ve.

Phun li ka kai kum ah Vankau veng ah inn kan lei ih inn thar apnak ih telter ve ding, le a hmai kum ihsin Falam ih tlawngkai ve ding ka si ruangih Falam i hmuh ciater duh thawn, ka pa in Falam ah i hruai.

Kan khua ihsin Aikawn tlang ah kan so, cuisin Rih zin zawh in Tlauhmun ah kan suk, Cerhmun ah kan so sal ih Tlairawn va ah kan suk sal, cutawk ihsin Zathlir Bangla le Surbung ah kan so lala ih, Laimual ah phei sal in, ke rori’n kan feh. Kan khua le Falam hi peng 27 ih hla a si.

Zingpit in kan pok. Cerhmun ah suncaw kan ei. Zathlir Bangla so cin cun ka ke kar a sawt thei nawn lo. Surbung kan thlen cun ka ke an thling liailiai. Cop le cop ah cawlh ka dil. Ka pa amah lawng si sehla khawthim hlan ih Falam thleng ding kha Laimua kan thlen ah khua a thim.

Kan feh vivo ih Hakha zin pial kan thleng. Cumi cin cun mawttaw ton ding an um phahphah. Rih zin ih jeep bak hmu dah lo khawte fa hrang ahcun mawttaw danglam taktak hun hmuh cu bang a reh sualso thei. Diesel phur mawttaw hman hi a rak ropi em! Asinan mawttaw an liam cun ke na cu amah kel ah a cang lala!

Falam kan run naih vivo ih Lampa, Matubuk tluan le khawtaw lam tthenkhat an rung lang. Inn tin an tleu serser! Khawte ih zinan meifar lawng rak hmu ttheu ka hrang ahcun an mawi tuk! Hi rori hi maw khawpi an ti! Ti tlak a si!

Khaw sung kan rung lut. Thirleng an vak rero. Tlawng cabu sung lawng ih ka hmuh dah mi kha a tak in ka hmu. To theih ti ka thei cia ko nan ke hnih lawng nei mi tlu lo ih an to thiam cu mak ka rak ti thotho.

Ka pa in thirleng ih in pahlonak ding ah ka kut in i kai. Taktak ahcun ka ke na tuk ih ka feh cak thei lo mi i hnuk phah khal a si. Ziangah a lo paw lo in ti men thei.

A ngah lo. Kannih khawte mi Falam ih tlawng rengreng cu inn lam hrangih thil ttul leinak ding ah Falam ih zuar ding mi thilri phurh thei ceu ih phurh ringring a si. Ka pa khal thla cem ih tlawng saya hlawh a suah khalle cuti’n thil a phur thotho.

Tlunta zin in kan feh vivo ih Awmpui vakua kan thlen in tlunlam ah kan kaiso. Cuti’n minute malte sungah kan inn cu kan thleng.

Zan cu ka bang tuk ih thuah hnih-thum lai in ka itthat ding ka zum. A thaizing ka hung tho. Inn sawmnga khua bak hmu dah lo keimah khawte fa cun kan tukvirh ihsin mitberh hnul phahte’n Falam cu ka vun cuan ih . . . .

“Maw Falam. . . na dam maw?”

-Sianglianuk Kianghrol

Comments

comments

Comments

%d bloggers like this: