Falam khawpi sungih Laikumthar hman daan

Fung Za Hlawn Khar | Falam, October 24, 2008

Falam khuapi Lai Kumthar puai cu Falam Khuanu/pa hohatnak le ramsung ramleng ih Falam mi le sa pawl ih ttan laknak in 18 October,2008 (Sat) ni 8:00 z.g. ihsin thok Falam Town Hall pi ah tuah a si. Uktu lam in U Zaw Win, District Police Officer le TPDC Chairman pawl in thu tawi cahnak an nei ih Falam Khuanu/pa Pu Hrang Lawm in Lai Kumthar thu simnak a nei.

Falam Veng tin ihsin Salai le Mai pawl in Lai thuam dawh phuntling thawn

Khuangcawi Laam,
Ttial Sungnu Laam,
Sangvut Laam,
Kuhcangpa le Sawmfaangte Laam,
Sakah Laam,
Ce-re Tlawh Laam,
Raal Neh Laam,
Saar Lam,
Vasir Laam pawl zoh khawh ih khop thei lo in an laam. Zing 11:00 ah zinglam program an ttiak. Tui kum cu hrin le hnam zawng in siloin Veng pawl in camcawhfung zuuk in mai ngah mi laam ciar lungawi ten an laam. Cun, an laam tik khal ah announcer in hrin le hnam hmin pakhat hman a saal lo. Cumi cu tuihttum Lai Kumthar ih a thawt hleicetnak a si ih mipi khal an hna a tlaak zet. Leitlun hmunkip ih Falam mi le sa pawl khal in tuih thil umdaan hi cawn cio ding ruahsan in ttuanvo neitu pawl in an tuahmi a si.

Zaan 7:00 ah Town Hall pi thotho ah Ramhla phuah le sak zuamawknak le modern Chin fashion zuam awknak, Lai thuam thildawh hmuhnak pawl ropi zet in tuah beet a si mipi in man pek ttul lo ten an zoh thei. Ramhla phuah zuam awknak ih lawmman a cotu pawl tla cu:

Salai Biak Zam          1st (Phuah/sak)
Salai Ngun Hoe Lian  2nd (Phuah/sak)
Salai Lawm Cin         3rd  (Phuah/sak) pawl tla an si.

Modern Chin fashion zuamawknak ih lawmman ngahtu pawl:

Mai Elizabeth Bawi Nuam Kim 1st
Mai Khin Khin Aye                  2nd
Mai Cer Len Mawi                   3rd

Tui ttum Lai Kumthar cu mipi an lung a awi thluh cio. Hmai kum ih Chin Phunpi ni ah siseh, Lai Kumthar Puai khal siseh hi hnak ih ropi sawn le ttha sawn ih tuah thei ding in mipi in an bei sei.

Comments

comments

One Comment

  1. Semnak kanlairam khawpi Falam Fanger puai ttum ah um ve se la ka duh zet nan,

Comments

%d bloggers like this: