Falam Khawpi Karhnak Dingah Laizo Khua An Tel Duhlo; Thuhla Zirin Daan Celek Ding Zum Um

Falam khawpi karhnak dinghrang vengthar le hmunthar ah Laizo khua cun khuapi sungah lut tel loin Laizo khua dinhmun ih an um duh thu June 5 ni ah an Laizo khuami pawl in ca thun luhnak an nei. Falam Khawpi karhnak ding hrang lungkim lonak cacu Pa Van Nei Piang le mipum 94 pawl in hminkhen in ca an thunlut tiah thu kan dong.

An duhlonak ca ih an ngan mi ah ‘Laizo miphun hlo lonak ding siseh, pipu pawl ih kilhimmi Laizo leiram humhualnak ding hrang pawl ruangah ti a si’. Cuih ca cu Laizo bial khawbawi hnen ah kuat a siih Falam zipeng bawi, vuanthok bawi, municipal hotu, Chin ramkulh cozah le municipal minister hnen pawl khalah an kuat sawng cih. Hi tiih ṭuanvo neitu pawl hnenih kuat a si ruangah June 9 ni ah acozah zung ṭuanvo neitu pawl, Falam khua nu/pa, biaknak lam pastor pawl, Laizo bial sungih Thanhniar le Zalai khua ih palai pawl ko khawm in thurelnak an nei.

Laizo khuabawi khal meeting an ko na’n rat ding a el ruangah ṭuanvo ṭha lo tiin khuabawi ihsin an cawl ter tum titla in thu hla a um. Hih ca thu ah Falam zipeng bawi U Moe Zaw Soe cun, “Mipum 94 ih hminkhen pawl an zohfel tikah mi 2-3 ih tuahmi tiah kan ruat. Curuangah hminkhen cazin ih a teltu pawl pakhat fingfing suhfelnak kan nei dingih a dik lo a si ahcun an hotu Pa Van Nei Piang cu daan vekin kan tawlrel ding” tiah a sim.

Falam khua nu/pa, Falam municipal committee, leiram tah zung le ṭuanvo nei upa pawl cu June 13 ah Laizo khua ah feh in khua mipi hnen ah Falam khuapi karhnak ding a thupit zia, Falam hmailam caan le khuami pawl ih duhnak pawl relkhawmnak an nei pi. Falam khuapi karhnak ding hrangah acres 8227 tumtah a siih June 7, 2017 ni ah Zalai veng, Laizo veng, Lungpi veng le Lailun veng tiin veng 4 um ding khal nemhnget a rak si zo.

Asinan Laizo khua in khuapi sungih tel duh saal lonak ca an thunlut tikah khuapi karh project fehpinak hnaṭuan a ti laklawh zet tiah ṭuanvo nei pakhat cun a sim. A tiir ahcun Laizo khua in tel ding an rak duh na’n khualak ih titi thuleeng vaak mi ihsi theih a si mi cu Falam zipeng bawi le leiram zung ṭuanvo neitu pawl in innhmun an duhduh in an rak zuar ruangah hivek in tu ah an tel duh nawn lo’ tivek ih rel hnuaihni mi tla a um.

Hih thu thawn pehpar in June 13 ni ah acozah lam in zingzoinak tuah dingin an relcat ih zipeng bawi in eiruuknak a tuah a si ahcun zipeng bawi in a tuar ding, leiram tah zung in eiruuknak a nei ahcun leiram tah zung in a tuar ding tiah Falam DC U Moe Zaw Soe cun a sim. Chin ramkulh sungah khuapi karh ding in Falam, Hakha le Paletwa in project an diil ih adang khua 2 cu a tluang na’n Falam ahcun tawlrel ṭulmi thu tete a taang hrih tiah theih a si.

-Sirhsan – Chinland Herald

(Visited 535 times, 1 visits today)

Comments

comments

Comments

%d bloggers like this: