Falam ah ESSI Training Tuah

Strait Memorial Foundation-SMF le FBC CSSDD ih hohatnak in Elementary Student Subsidiary Initiative-ESSI training cu YCC hall ah an tuah rero laifang a si tiah theih a si. Hih training cu tlawngta nauhak tuition kai theilo pawl hrang zirhsin dingah July 3-5 tiang training an pekmi a si.

Training ih an zirmi pawl cu Bible, Mirang ca le math pawl an siih Bible cu textbook ah hmang in nauhak pawl cazirh daan an zirmi a si. Training ah mipum 30 kiangkap an kai thei ih cutawk ah Kanpalet in pakhat le Mindat in pakhat tla an ra tel thei tin kan thei.

Zirhtu ah USA ihsin Strait Memorial Foundation ih Mr. Daniel le a nupi Anna an ra. Atui’ training program cu Rev. Chester U Strait ih tu le pawl in an pu hngilh lonak ah a missionary hnaṭuan cia mi pehzom ding hrang Strait Memorial Foundation- SMF ti’n an dinmi a si.

Rev. Chester U Strait cu Falam ih CCIT bible tlawng rak dintu a siih 1928 May 1 ni, Hakha khua ah Chin Hills Bible School tiah a rak din thoktu khal a si. Tuhlan kum 5 ihsin Strait Memorial Foundation cu rak din a siih Hakha Baptist Association (HBA) le Chin Baptist Association (CBA) thawn hna an rak ṭuan tlang zo. 2017 ihsin Falam khal ah ṭuan thokmi program a si tiah kan thei.#

Comments

comments

Comments

%d bloggers like this: