FALA IH MAWINAK

FALA IH MAWINAK

By: Hniangsinpa

Mipa tam sawn cun fala kan hmuh tikah an hmaifang kan zoh ih, cuisin an ruangrai kan zoh. A tawbawr a tha maw, a kekar a mawi maw? A san lam teh ka duh zawng a si maw? tiin a phunphun in kan mah le kan mah kan sutaw ih, cuisin cui fala cu kan lung a kim a si le ngah ko kan zuam. Ngah an har deuh a si le kan mit ah an mawi sinsin ih, ngah an ol asile an mawinak in kan thinlung ah rei a daih thei lo. Cu hmuahhmuah cu kan ruat a si le, nunau ih mawinak cu an mahah si lo in, mipa thinlung sawn ah a rak si ti kan thei thei ding.

Veikhat cu ka pate in, nupi ding hawl in khualkhua ah kan fehih, mawi zeizei pakhat kan vung hmu, tawkfang kan len hnuah kan khawlam panin kan tlung kir ih, lamzin ahcun ka thinlungin, a mawi ko … nan tuizan ka hung itthat dingih, thaizingah ka ruat lai asile, ka duh tinak, cun ka nei ding a tiih, a thaizing a hung tho cu a thinlungah a rak ruat nawn lo a si cek kei cu, ka nute thawn an neiaw daih. Curuangah, mi tampi cun kan thinlung rawn lo in, fala mithmai ah kan thinlung cu hnget ko ret kan tum sawn theu. Mawinak cu mi nehnak a si ko nan, mi mawi hmuahhmuah in mi an neh theh cuang lo, a neh ding mi thinlungah a mawi a tul sawn.

Mawi cu fala hmuahhmuah in an duh ih, angki le hnipuan hrang khalah an neih sumsaw tam sawn cu an hmang theu, nan zawi mitih mawi ding an si ti an thei aw lo. A rak zohtu ding mit ih a mawi ih, a thinlung a neh thei lawngah mi mawi ngaingai a si thei ding ti ruataw lo in, a mai thinlung in mawi a ti mi cu a thlun sawn theu. Fala thuruat thei cun, an mai thinlung hnak in, a rak zohtu dingih thinlung milin an thuamaw sawn theu. Thufin cun, Nunau mawinak cu Pathian an tihzahnak ah a um a ti bangin, Pathian tihzah cu fimnak ih hram a si a ti lala ih, curuangah, mi mawi cun Pathian an tihzah ih, cui  an tihzahnak cun Fimnak ah a thlenih, Cui an Fimnak cun Mawinak ah a thlen sawn theu. Fala ruangrai tha zuarzi fawn, a behbeh tuk kan hmu theu ko ding, kha pawl kha mipa thinlung ih cam rei thei lo, mawinak famkim lo neitu an si theu. Mawinak neitu cu mipa hrang si tha bik le kumkhaw daih mi ro sunglawi a si.

Mipa tam sawn cun, a lenglam silo, a sunglam a thupi kan ti theu, a parih ka sim mi mawinak neitu pawl cu a lenglam khal in zoh an rak mawi ngaingai. Mi mawi lo hnakin, mi mawi pawl khi an sunglam khal a rak tha cingcing. Fala mawi le fim cun a mi sual pohpoh tiin a kawk men lo ih, tuahthat theinak lamzin a hawl sak sawn theu. A innsungsang khal ah, mi in thil an ti sual pang tik khalah, ngaithiamtu si dingin a ong aw ringring. Tlangval pawl, nupi neih cu zetzet kan um ko ding, a parih ka sim mi pawl na thlun thei ahcun, Pathian thlawsuah robawm na sar a si bik ko.

Cu pawl ka ruah hnuah, keimai hmuh tawnmi pakhat dang a rung um, cumi cu, “Fala hin rei daih theinak ding hin an mah ah pahnih a um, pakhat cu; an rim a rak si” timi ka hmu suak. Cumi thu ka ruah suahnak cu, Laitlang zin sukso, khu vutvo ah, rim bangaw lo celcel thawn kan to ih, lamzin a thatlo ruangah, zankhat khawte pakhat ah kan riak. An in kha a kau lemlo ih, cunah nunau mipa ti um lawn, saphaw parh kan it.

Zan Lai fangah ka thang dukdi ih, ka sir ka vun her cu, ka hngilh thei nawn lo ding mi rim in I zem!!! Cui ka sir ih rak it nunau cu, sunvu kan to khawm lai ahkhan, mawi tinak ziang hman ka nei lo ih, zoh khal ka zoh ciamco lo nan, a thai zing mawtaw ih kan to hnu cun, a rim khan a mah a ti mawi a si bik ding, ka zosh leuhleuh a si cu~!!! Curaungah, an rim hin anmah mawinak a pe ti ka sar suak.

(Visited 117 times, 1 visits today)

Comments

comments

One Comment

  1. Faizong par says:

    Na ca ngan atha nasa ih tha zang khal ka ngah zet nan ‘mi mawi lo hnakin,mi mawi pawl khi an sunglam a rak tha cingcing’ ti na ngan mi cu na pacang lo nasa, lai pacang thinlung abang lo.

Comments

%d bloggers like this: