Fala Hmel Tha Mariana Bridi Da Cosfa A thi

January 26,2009.
by-Khuang Lian Sum
 
Fala Hmel Tha  Mariana Bridi Da Cosfa A thi
 
Brasil ramih fala hmelttha duh umzet an thlir ning theilo mi, Mariana Bridi Da Costa kum 20 micu natnak khirhkhanzet a tuar ruangih a kut leh a ke an tansak hnuah  tui zarhte niah khan a thi. Hi fala hmelmawizet kum20 mite hin natnak khirhkhanzet, Necrosis   thisen Septic anti mi  Septismia a tuarih.  Da Costa hi kan dung December thlacem zawngah khan a zoh awter ih a tirah cun zun in thalo tiah hmuh asi. A natnak diktak an hmuhsuak hnuah cun rundam theiding ci a rak si nawnlo.
 
A kut leh a ke an tansak hnu ah a pumpi khal zaisak asiih. A liamcia thlakhat hman a rei hlanah hi fala hmelmawizet Da Costa hin leitlun mawinak hmang ve ih lar leh hminthan khal a tumzet lai ah  natnak khirhkhan  cun a taksa mawinak leh a hmelmawi nak leh a hminthan nak duhum tak cu a ei sia ih hi leitlkun cu a liamsan ta asi.
 
Da Costa hi nikum China ramih  Miss Bikini International Competition ah khan 6 nak asiih, tidai leuh nak hnipuan hruh mawi ah 1 nak asi. Nikum ah khan Miss World hrilnak ih telding Brasil ram aiawh ih hrilmi ah  4 nak a raksi. 
 
Sri Lanka Ralkap Leh  LTTE
 
Sri Lanka cozah ralkap pawlcun LTTE pawl ih tawmruk nak hmun pawlcu an siim vivo ih. Mizan sun ah khan LTTE pawlih tawmkhawm nak hmunpibik Mulaitivu khal an laksak ngahzo. Sri Lanka ralkap pawlcun LTTE pawlih umnak tangsun an ram saklam ih ram kilthum nei deuh Peng 115 vuakvel ih kaucu an panlai rero tiah an sim. Sri Lanka ralkap hotu Lt General Sarath Fonseka cun LTTE pawl nuai cimit nak dingah kanhna 95% cu kan tthehzo a ti.  Himi thuah LTTE lamcun ziangthu hman an rello ih  an mahlam tantu Tamilnet Website cun  Srl Lanka ralkap pawlcu  LTTE pawl lawng silo in mipi vangtlang khal an that ciamco tiah an tarlang.
 
Lawng Pil
 
Vietnam ram laifang Quang Binh bialih Gianh tivapi ah lawng a pil ih minung 40 an thi . Quang Binh Police hotu Phan Thanh Ha in a simnak ah  Hi lawnghi minung 12 lawng tothei nakih tuahmi asi nan  minung 80 anto ih lawng in a tuarlo asi ati. Hi lawng pil ihsin minung 35 cu runsuak an siih  minung 5 cu an hlo. Hi lawng Capt, hi thusuh dingah kaih asi.
 
Hamas Leh Israel
 
Palestinian  Tapung Hamas pawl hotu pakhat Ayman Taha cun Cairo khawpi ih Thuthangca latu pawl hnenah Israel thawi rualrem awknak Ceasefire an tuahmi Israel in Kumkhat leh a hrek leh Gaza pannak lamzin a hrek lawng awng dingih a timi cu. Hamas pawlin an pawmlo thu a sim. Hamas pawlcun Israel thawi an tuahmi rualrem nak Ceasefire derdai zetcu hngetkhohzet ih a um theinak dingah  Israel in Gaza Strip pannak lamzin a khar micu a zatei awng dingin a nawrih cuihlei ah Israel in rualremnak ceasefire kumkhat leh a hrek ati mi cu kumkhat lawng si dingah an duhthu an sim.  Tu ah hin Hamas pawlih ai awhtu leh Israel  ai awhtu pawlcu  Amos Gilad in  Cairo khawpi ah  rualremnak thuthlung hngetkhoh tuahthei dingah a buaipi rero lai ih . Egypt Intelligence hotupa Omar Suleiman ih hoha nakin  rualrem nak thuleh thildang tulmi khal tawlrel rero lai asi. Israel cun Hamas pawlin ramdangih sin a thuptei ralthuam an lak ringring asi ah cun Israel cun Hamas pawlcu a kapsal ding a ti.
 
Monmahan Singh Damcak
 
India ram Prime Minister Monmahan Singh cu  lunglam natnak ruangah tui kandung zarte ni zinglam nazi 8:45 ihsin zai asiih  zanlam 8:55 ah Operation room ihsin nawrsuak asi. PM hi an zaihnu ah thatlam a pancak zetih  tu ah cun harsat nak dang zianghman a neilo ih zumhnak in a cakzet tiah a mai bulpak Doctor K, Srinath Reddy cun asim. Dr K, Srinath cun PM hin a thei vetei hna tuanmai a duhthu a sim ringring tiah a simbet. A lung lamhna ttuannak khal a thacak zetih tuvekih a that vivo ah cun tuikar cem zawng lamah cun Siisung ihsin a suak menthei tiah asi.
 
Prime Minister Monmahan Singh hin damcak ih suahmai a duh naksan bik cu  Parliament Session hi Feb, 12 ih tan ding asi ruangah le  India rampi Lok Sabha hril awknak ding thusuah  March thla ni 7 hrawngih suahter a ttul ruangah asiih. Lok Sabha hril awkding hi April 18 ihsin May 20  karlak hrawngah an tuah zum asi. PM hin mizan sun khalah a sungkhat pawl a bia ih. A mah tuamhlawmtun Doctor pawl hnen khalah  lungawi thu sim’n Aiims sizung hi cu sizung tha leh rintlak asi tikhal simin mitin kimih pantlak asi ati.
 
US President Barack Obama khalin tuisun ah  Prime Minister Monmahan Singh hi a damzang dingih a duhsak thu a kuatih.  India ram Republic Day lawmpi nak thucah khal a kuatcih ih Obama cun  America mipi pawlin India mipi pawl hnakih  rualpi tha leh duhsak mi an nei cuanglo ti an thei dingih a duhthu khal a kuattel.
 
British Prime Minister Gordon Brawn  leh Pakistan President Asif Ali Zardari khalin  PM Monmahan Singh cu a damcah zamrang an beisei nakthu an kuatve.  Pakistan Prime Minister Yousuf Raza Gilini leh Bhutan Lal, Jigme Khesor leh Prime Minister Jigmi Y Thinley khalin duhsak nak thu an run kuat ve.
 
US Vice President Joe Biden In Thuduh Tumlo
 
 
US Vice President Joe Biden cun  President Barack Obama ih thurawn petu leh a mirinsan zetmi si lawng a tumthu a sim. Joe Biden cun CBS News Programme Face the Nation ih a sim nakah  Dy President vekih a ruah awklo thu leh. President ih thutluk nak a tuah mi hmuahhmuah ih rawlawk a tumlo thu khal a sim.Asinan President Obama ih a rawnmi thu ah rin umtak leh rinsan tlakzet ih um a tumthu  asimbet.
 
President Bush hnuai ih Vice President Dick Cheney kha  ram thil ziang tinkim ih rawlh aw paihtuk ah ruah asi ih. A thilti fuhlo mi tumbik cu  Iraq ramih do awknak thuhla, Misual ih zummi pawl hrem leh thu zawihnit dan, leh Spy Programme pawlkha  Dick Cheney ih tuahmi thluh ih ruah a si.  US Vice President thar Joe Biden hi  1942 kumah Pennsyvania ah a suakih  Kum 1972 ihsin Delaware Senator a sizo. A mahhi Cozah hmaisa ha khan  America Cozah ih Committee pawimawh bik pakhat, Seneta Foreign Relations Commttee Chairman asi.
 
Mipi ih rinsan tlak si dingah cun  Hotu cun mipi zohthim tlak ih diknak nun neih a pawimawh.
 
(Visited 46 times, 1 visits today)

Comments

comments

Comments

%d bloggers like this: