Facebook In Ka Lung I Kuai Ve Ta!

Facebook “Hmaibu” In Ka Lung I Kuai Thlang

Uk Lianfb_icon_325x325

Facebook kan ti celcel mi cu ka hmang ve thlang. Facebook ka hman thok ih harsatnak ka tawn mi le buainak tete ka tawn mi pawl tla a tlangpithu in ka tarlang. Culawngsiloin ka hmuh tonmi hrek khat pawl tla tarlangnak ka nei ih a sau deuh tikah caan lak ih siar a tul men ding ka zum. Kimcanglozetin ka duhnak tete ka ngan. 

Facebook Ka Hman Thok Daan

Ka rual DL Senling le Chin Youth Counseling unaupawl cun Facebook hi “Hmaibu” tiah an ko. Rualpipawl in facebook (hmaibu) hmang dingah in sim ringring theu nan hmannak caang ka rak thiam dah lo. Kan dung baihte ahkhan New Delhi ih Salai Thian Za Thang (Thang Kolh) ih facebook tham lai ka hmu ngelcel. Cutin, tumlopin Account thar ka tuah. Ka hminpum Uk Lian tiin tuah ka duh nan a ngah lo ih Ukte Thengre ti lamlam ah a ra suak. Mirang hmin hnakin ka duh thotho. E-mail thiam lo thawn ka lungkim mai.

Facebook Hman Ka Zir

Mino tampi in sunzan facebook cawl lo ih tham ding an hmuh lai ah keicun tham ding mumal hmuh lo in ka um. Curuangah Facebook ih thupitnak le nuam an tibiknak pawl hmusuak dingah ka theitawk ka suah. Midang pawl ih cangvaih daan pawl le facebook innpi duangdan pawl ka zohhliah tikah tuah ding tamzet ka hmu ve thlang. “Profile” ih zuk tar dan, zuk “upload” daan, zuk “tag” daan, rualpi “pork” pek daan, “comment” tawite pek daan, zuk uar-mi le ca duhzawng “Like” pek daan, rualpi “search” daan le a dangdang pawl ka zir so ciamco. Cuvek sungah nazi 3 sung lai a rak kim man.  Comment tampi ngan ka tum theu ih enter ka hmet pang theu. Enter hmet zawng ah a rak suak theu. Curuangah “status” ih cangan ka thiam hmaisabik ah “Ka hrangah thiam tul mi, zir ding mi a tam tuk” tiah ka tar rori.

Facebook Ih Ka Hmuh Tam Bik Pawl

Facebook ih ka hmuh tam bikmi cu zuk pakhat an tar ih cucu tawitete ih comment pek celcel hi a si. Ahleicein fala pawlin comment an ngah tam cuang. Culole, catluan tawite ngan ih cumi comment pek celcel tivek an uar zet in ka hmu. Cun thuthang, video tivek pawl a “link” pek khal an uar zet lala. Zuk hnihsuak tar, Lairam zuk a phunphun tar tivek ih comment tawi tete pekawk celcel hi ka hmu tamzet. Minit pakhat daan ah ka “keyboard” ih “F5” ka hmeh tinten zuk thar tarlang mi ka hmu deuh ringring. Mithen khat phei cun an profile zuk hi nikhat veikhat an thleng mi tla ka hmu.

Facebook ih Falam Group Pawl Ka Leng

Group mailing ah mino pawlin ca an ngan nawnlo ka ti rero lai ah facebook ih Group pawl thung ahcun siarcawk le cawk lo in an rak ngan. Facebook ah Falam tong hmang ih Group tampi ka hmu ih a diriam um zet. Group tuah cu a har lo nan, nung ringring ding ih “maintenance” tuah a har. Pawlkom khal ah maintenance kan tlasam theu. Facebook Group siarcawklo lakah ka lentheu nak Group pawl cu thupi fun le nuamnak tinkim ka timi “Falam” lunglen canah “Mitthli Biazai” thusuh le counseling ka duh can ah Chin Youth Counseling. Pathian thu ka siar duh caan ah Nitin Thlarau Rawl. Cun, news siar ka duh caan ah Leitlun Chin Thuthang cule hnih ka duh caan ah Capoh Hnihsuak. Cun, ka thlah theilo mi Calai Nonawn Calai Titi ti pawl hi kan Falam Facebook Group ka len theu mi pawl cu an si.

Facebook Ih Kan Tlaksam Mi Pawl

Fellowship/Kawhhran le Hnam le Miphun zawng khalin group tampi kan nei. Cun, kanmah le tawkten Biazai, Capoh, ca nepnawi tamzet siar ding khal kan nei tamzet. Asinan, Politics lam hi kan tlasamzet lai in ka hmu. Kan mino politics ih phur pawlin politics-lam update thei ringring sehla a duh umzet. Cun, thuthang langsar cuang pawl tla website lawng siloin facebook khalah Falam tong ih siar ding a um lo tluk a si. Cahram le thusuhnak pawl kan ngan tikah analysis tuah tlak le research tlak tawifamkim tivek nganmi tete kan tlasamzet lai a si. Cuvek cu thil harsatzet tla a sinan kan tuah theimi thil a si ruangah kan tlaksamnak silhkhah vivo ka duhzet a si.

Facebook Hman Nak A Phunphun

Mino tamzet ih hmannak “facebook site” a sivekin thlarauhlo duhdawttu thenkhat pawl cun thuthangtha simnakah an hmang. Mithen cun an unau sungkhat hmuh nawnlo pawl hmuhsal ding beisei nak thawn hawlawknak ah an hmang. Politics lam ih kekarpawl ve thung cun campaign-nak hrangah nasazeten an hmang.  Company neipawl le sumdawng pawl cun an thilri pholang ih zuarnak ah an hmang ve lala. Thuthangca ngan pawl khalin an thuthang mitampi ih siar a si theinak dingah theitawp suah in an pholang vivo.

Mino thenkhat lala pawlin an kumkhua hrang nupipasal hawlnak dingah an rak hmang. Cutin, phun dangdang in facebook hi mah le rem tidan le phur daan khalin bulpak cun an rak hmang ve. Kan Laimi teh hin ziangtivekin facebook kan hmang ti theithiamtu tamzet kan um ding ka zum. Facebook hman daan kan thiamzet ih umzia nei sinsin ih hman daan tla kan zir vivo hrih thei lai a si.

Facebook Ih Zuk Kan Uar Nak San

Facebook hi February 2004, ahkhan Mark Zuckerberg le a rualpi Eduardo SaverinDustin Moskovitz le Chris Hughes pawl thawn an tlawngkai phah ih rak tuah mi a si. An rualpi 5 pawl thawn cun zuk makmak tar an rak zuam aw. Curuangah si ding Laimi pawl khalin zuk makmak tar kan zuamawk ti tla in ka ruat. Zuk mawizet le zuk thenkhat pawl cun message tamzet a nei ngai. Tong rero le simfiang rero tul lo in zuk pakhat hin thu tamzet a rel thei tikah zuk tla hi a thupizet a si. Kan Laimi mino tamzet cun facebook hi zuk retnak hmun pi ah kan hmang rero thlang.

Facebook Ah Thuruat Thiam UPa Pawl Kan Tul

Santiluan hin a fen rorin in fen. A luang menmen lo a si.  Information Technology a sang deuhdeuh. Mino tamsawn ih tikcucaan hmannak cu facebook a si ruangah kan upa thluakfim le rinsanmi pawl hin mino tampi nun remnak ah caan pe thei sehla thathnemnak tampi a um ding. Kan Laimi upa facebook tham le cangan theu hi kutzung siar theih kan si hrih. Tam deuh in kan tul hrih. Rev. Hre Mang, Rev. RunCung MangLevi Sap Nei Thang, Mikezung Ceu pawl tla facebook ah biak awlzet in an um ih ka hngangam sinsin. Upa pawl hin mino pawl thapek tlak ah in tuah hram uhla mino pawl khalin hmasawnnak kan nei sinsin thei ding ka zum.

Facebook Hin Laimi Pawl Lung In Kuai Ve

Umhar lunglen caan ah FB kan tham kan ti FB kan tham lo caan ah umhar kan ti lala. Rualpi biak awlsambiknak a si fawn ih FB cun kan lung in kuai cio a si! Mithen cun biakinn sung tiangtiang facebook kan keng lut muarmo. Culai ah kan nulepa thenkhat cun Facebook nan ti reromi hi ziang a si? Rak titu tla an um. Asinan, culakah mino tamsawn cun zuk kan zuk veten facebook ih post dingah kan ti theh thlang. Cazir le thlacam hnakin facebook ah caan sau deuh a hmang thei sawn kan tam vivo thlang. “Ziangkim hi a hman daan thiam sehla a tha” ti phah cingten hmangthiamlobik ah kan cang lala fawn.

Aw! facebook kan buai a si.
In run bawm aw Facebook.

(Visited 148 times, 1 visits today)

Comments

comments

17 Comments

  1. Politics lam ah cun kan tlasam zet ngai. Hlasak,Lemcan cun a thupi zetmi Pathian thu lam ah cun kan thangso zet vek ngai naan. Politics lam ca share ring2 tu tampi um sinsin sehla a tha tuk ngai ding. Na run ngan tha riai.

    Zuk taar lam cu kan luar sin sin ka zum. Mark Zuckerberg in FB ih feature a tithat tum rero mi lak ah photo sharing hi hman a nuam vivo theiding hi thupi bik ah ret in a zuam ring2 fawn si ii. Tu lai FB ih rung langthar Time Line tla hi Photo sharing nuam deuh seh ti ih FB lam ih run zuam naak pakhat asisii. Buaithlak rak titu thawn ttha rak titu thawn kan cawkrawi awk rero ding asihi.

  2. Haha…Rual Ukte na va ngan thiam lawmamve. A hmantuk ka duh hai nasa…Keikhal kha vek thotho ka si. Facebook hmanthiam ka tum le ka hmang thiam lo deuhdeuh 😀

  3. Ukte Thengre says:

    Ka facebook hmin in aw…

    Mai Mawi Mawi, comment that in pe ih ka lungawi.
    Asi, zuk hi cu kan thlah thei hrimhrim ding ka zum lo.
    Si, timeline thu tla ka ngan ngah lo….nangmah in na tarlang ih ka lungawi.

    Rual THT,

    I comment ih ka lungawizet.
    Facebook ah zanlai patum ah kan tawngaw theu ih ti aw.
    Hnangam thei zet…

    Ukte Thengre

  4. Siangte Senhri says:

    Ukte Thengre,a ai ngeng ngo hi cun lung a leng,…..na ngan tha nasa…..hehe….ka lunglai in rak kuai ve sokhaw aw!!!!…..ka like top si ….(like)6 rori si….ti tha ee

  5. Ukte Thengre says:

    Siangte Senhri,

    I rak comment ih ka lungawi.
    Senhri tla Lairam ah an mawi cuang so khaw….
    Kei tla Laimi pawl hrangah ka ai ringring duh ve…

    Like 6 ka ngah ih ka lungawi zet.

  6. Ukte Thengre,

    Nganthiam ual…..
    Ka hni phahphah…..
    Na cangan siar nuam thei nasa…

  7. Asi, kan upa pawl facebook hmangthiam malte lawng an um.
    Group mail ahcun ti aw ter takin ca an hei ngan bet lai…

    Leitlun a tlancakzia an thei lo si ding…

    Tlangval tha tampi tla in facebook hmangthiamlo an um lai.

  8. Rebecca Siangte says:

    A siar nuam.
    Like 7 ka pek ve.

  9. Kei tla zuk ka tar theu….ningzak um in.

  10. Dear Ukte,

    Na ca nganmi cu ka rak siar ih a tawp tiang in na ca in ka theih lo lai ah in rak hruai.
    A siar a nuam tuk. A hlan vek in zawi ngan a si ti ka thei cih thei nawn lo. Na hmin a um ruangah ka lo thei fang. Na thiam tuk. Na ca nganmi le an dik thei fawn. Himi catluan te hi ka duh zet : “Ziangkim hi a hman daan thiam sehla a tha” ti phah cingten hmangthiamlobik ah kan cang lala fawn. A dik tuk lawmmam aw. Na cangan rak siartheutu;

  11. Ukte Thengre says:

    Salai Zilthli,

    Ngai na um nasa.
    CT lam ah na thli thiangte rak hrang ter theu awla.
    Tufangte khuiah na um?

    Ka canganmi in rak siarsak ih ka lungawi.
    Ca siar cu na thlah thei hrihlo ti aw.

  12. Mai Phiangte says:

    Na nganthiam.

  13. Zodai Zilthli says:

    Cangan thiampawlin ca nan nganmi vawn siar tikah a cem lai khal theihman a si lo.
    Himi http://chinlandtoday.info/2011/02/milian-fanu-kan-leng/ tla siar nuam ka timi a si.

  14. Ukte Thengre says:

    Rual Zodai Zilthli,

    Ka cangan mi na rak siarih ka lungawi.
    Mi thazang pek na thiam ih ka lungawi sinsin.

    Milian Fanu Kan Leng timi kha a taktak ka nganmi a siih thilcang ngaingai mi ngan cu siar tik khalah a muril a rak um theu.

    Na rak siar ngah ih ka lungawi.

    Hivekih lawmawk le fakawk kan thiam vivo ahcun cangan kan huam sinsin ding.

  15. Mai Zungte (US) says:

    Salai Ukte Thengre,

    Zianglo, mino pawlin facebook ah an crazy timi tla ngan sal aw.
    Kan fa le te pawl facebook ah an aa theh zik thlang.
    Ca khal an zoh peih nawn lo.

    Bible siar aicun facebook siar an duh sawn cuh.
    Cuvek tla kha rak ngan aw.

    Na ngan thiam em.

  16. U Ukte
    Na ngan tha nasa
    FB in kan caan tam tuk in fir lo maw
    kan buai cio ko hih!

  17. Ukte Thengre says:

    Sinte,

    Nangmah rori in i comment ve ih lungawi nasa.
    Theicing theicing in caan tampi in rak fir sak ngaingai theu.
    Kawlram khalah facebook a cakzet thotho hmang.

Comments

%d bloggers like this: