EVANGELIST ROPI BILLY GRAHAM (Nunthuanthu-Cahram)

billy graham

EVANGELIST ROPI BILLY GRAHAM

Billy Graham-ih rawngbawlnak thuhla hi cipciar leh kim fel zetih ngan ding cun sau zet ih ngan a tul ding ruangah tui ttum ah cun ka run ngan thluh cawk lo ding. Tu hrih ah cun a tlangpi thu lawng ka run thai lang tum hnik ke. Billy Graham hi leitlun ram dangdang ah rawngbawl nak nei dingin sawm theu a si. Cold War lai khalah khan US ram bakah Europe leh Soviet Union-ih ram dang dangah rawngbawlnak neiin remawk nak leh daihnak thuhla a ausuah pi nasa a si. Billy Graham- ih rawngbawlnak hi mipiin an hlawkpi in piangthar khal an tam thei nasa, a mah tlukih Evangelist lar hi an tam lem lo a zum um.  A  lar tuk ruangah a mah sunloih nakah Oct 15, 1989 ah khan Billy Graham-i hmin hi zuknung leh awnmawi lamih milar pawl hmin ngannak Hollywood Walk of Fame-ah ngan luh a siih, Rawngbawltu lakah Hollywood Walk of Fame-ih hmin lang ban um sun a si ding.

Crusade lar zual pawl: Billy Graham hin rawngbawl nak a neih sungah hin ram 185 leh tih ah hin minung maktaduai 215  hnenah Pathian thucah a phuang suak, maktaduai dang ziang maw zat in a thu cah mi hi TV, Radio, Video, internet, thuthang caa leh cabu ihsin an rak thei, amah tlukih evangelist lar hi an piang leh kher zik lo. Crusade vawi 417 lai a neih ihsin mi maktaduai 3.2 leh tiin rundamnak an ngah ti a si.

Rel zo bangin Billy Graham hin Sept 13-21, 1947 ihsin Crusade a nei ttan ih, Los Angeles khawlipi ah kum 1949-ah thla ruk sung rori Christ for Greater Los Angeles Campaign aneih ihsin tla cun ram pum theih a hlawh  zual phah a si kha. Leitlun huapih rawngbawlnak a neih hmasak bik cu March 1, 1954 ah khan London khawlipi ah thla thum sung rori a neiih, hinah hin a thu thangtha simmi ngai dingin maktaduai 2 hnakih tam mipi an ra khawm a si. Billy Graham hin Africa Continent hi a luhcilh nasa zetih, kum 1960 January- March sungah khan  Africa ih khawpi deuhdeuh 25 ah leh khua 75-ah Bawi Zisu dungthlun hi thlamuannak tlamtling a si thu a rak tlang au pi nasa a si.

Rawngbawl nak a neih mi lakah Crusade tum bikih an rel mi cu kum 1973-ih Yoido Plaza, Seoul, South Korea-ih a neih kha a si. Hi crusade-ah hin vawikhat khawmah mipi maktaduai khat cuang an khawm ttheu. North America-ih a crusade neih tum bik cu September 22, 1989 ah The Great Lawn, New York Central Park-ah a si, hi ttum ah hin mipi 2,50,000 hrawng an khawm aw ttheu tih a si.

Billy Graham hin crusade lawng si lo thusim nak hi mi pawimawh tak tak pawl, US president leh ram hruaitu dangdang tong aw khawm pawl hmaiah a nei ttheu, hivekih kum upa zet cingin leh  bang zetih Pathian rawngbawl nak a neih hnuah hin June 24-26, 2005-ah a Crusade netabik cu  New York khawlipi ih Flushing Meadows-ah a nei. Asinan himi hnu March 11-12, 2006 ah a fapa Franklin Graham ttawiawm in  Hurricane Katrina (Thlipi na zet) in a nuai siat mi  New Orleans khawpi ah crusade “Festival of Hope” an tuah a si. Himi hnu khalah crusade tuah dingih sawm a si ringring laiih asinan thusim men ti lo cu crusade pi vek ngaingaiin Billy Graham hin caan a hmang nawn lo a si.

US President pawl leh Billy Graham: Billy Grahama hi US President pawl hin an ngaina in an duh zetih, harsatnak an tawn caan leh thlarau lamih thuam awk thar an duh cangih an kawh bik mi cu Billy Graham hi a si. US President lakah hin Harry S. Truman tih loh cu a hnu lamih President pawl hi cu a kawm ngaih thluh a si. (Truman-in Graham hi leng dingah a sawm ih, himi ttumah hin Billy Graham-in North Korea thuhla ih Truman a nawr thu a lehhnu ih a relsuah ruangah Truman-hi Graham parah a thinheng ih, be aw thei nawn lo in reipi an um. Himi hnu ihsin Billy Graham khalin President pawl thawn an thurel mi rengreng cu a phuang suak nawn lo.)

Dwight D. Eisenhower leh Billy Graham khal hi kawm aw ngaih zet an si, ziangvek thu pi pa a tuah zik khalah Graham hin thurawn a pe ttheu. Eisenhower hi damlo bese zetin Walter Reed Hospital-ah a um ih, a thih zikah Billy Graham cu a ko ih rundamnak thuhla an rel tlan hnuah thlacamnak an nei, cuisin Eisenhower khalin thlamuang takih thi dingih a ralrin thu a rel suak a si.

John F. Kennedy President- sinak celh dingih an lakluh hlan deuh ah khan Kennedy in Billy Graham- hi Palm Beach ah thurel pi dingin a sawm, Abraham Lincoln ih convertible car var in khawpi sungah vakin reipi caan an hmang tlang.

Lyndon B Johnson hi President dang hnakin Billy Graham thawn hin an kawm aw ngaih zet, an sungkua tonawk khawm um tinten Johnson hin Billy Graham hi caan hmang dingin a ko ring ring ttheu, US President sinak a celh sungah Billy Graham hin zan 20 lai White House-ah caan a hmanpi.

Richard Nixon hi US president vawi 37 nak a siih (1969-74). Billy Graham thawn hin President a si hlanpi kum 1950 hrawng ihsin an rak thei aw zo, Richard hin adviser vekin Billy Graham hi a hmangih a leh hnu ah tla cun Israel-ih US Ambassador si dingin a sawm, asinan Graham hin hi sawmnak hi a hnawl a si. Kum 1993-ah Richard Nixon-ih nupi Patt Nixon a thih ah Billy Graham in vuinak caan a kaihruai ih, a hnakum kum 1994 ah Richard Nixon a thih khalah a mah tho tho in a vui a si.

Gerald R. Ford, Jimmy Carter, Ronald Regan, George Bush Sr. Bill Clinton, George W Bush Jr. leh Barack Obama pawl khalin Billy Graham hi thlarau lam thil ih thurawn petu (Spiritual Advisers) vekin an zohih, White House-ih leng dingin an sawm ringring ttheu. Caan harsa an tawn caan leh thlacam an duh tikih an kawh bik ttheu cu Billy Graham hi a si. Kum 1991 ih Gulf War do awk a suah zan ah khan President Bush leh a nupi Barbara cu  thlacam sak nak a nei, George W. Bush Sr- hi Billy Graham in US President lakih thlarau mi bik leh Pathian thu relpi nuam bik a si tiah a rel.

President Barack Obama khalin April 2010 ah khan Billy Graham hi a inn Montreat, North Carolina-ah a va leng, Obama hi US President lakih Billy Graham ih inn rori ih va palih va leng tu um sun a si. Himi ttumah hin Billy Graham in ram hrangah leh an sungkaw hrangah thlacam sak nak a nei.

“Billy graham-ih mi thawng tampi thlarau nun hlo a kaih thawh mi leh a thleng danglam mi lakih pakhat ka si ve.” – Jimmy Carter

“Billy Graham hi ka thlarau nun in kaihruai ih in ticaktu a si.” _George H.W. Bush

“Kum 12 mi te ka sih laiah  Billy Graham-ih crusade Little Rock, Arkansas-ah ka tel ve ih, Billy Graham hin hi crusade ih thu ra ngaitu pawl hnam dang dang hi Khrihah pumkhat kan si, hnam leh ci zawng in kan thliar hran aw ding a si lo tiah a rel. Hi thu hin ka nunnak ah thu nasa zetih a rel a si.”— Bill Clinton

A caan neta lam leh a natnak: Kum 50 sung rori rawngbawl ih leitlun hmun dang dang a vah kual sungah hin thlarau hlo tampi a kaiih, Evangelist ropi tak a si thu hi leitlun cun an pawm a si. Hivek rawng a bawl lai ihsin natnak dangdangin a tibuaiih, a kum a upa vivo thawn Evangelist vekih vah ih crusade tuah vivo cu a tlin nawn lo ruangah a rawngbawlnak cu cawlhsan a tum. Jun 24-25, 2005-ih Flushing meadows-Corona Park, New York-ah rawngbawlnak a neih cu a rawngbawlnak neta bik si ding thu a puang.

Billy Graham leh a cabu nganmi: Thusim ih rawngbawlnak lawng si lo in Billy Graham ih rawngbawlnak pakhat pawimawh zet cu thu leh hla ngan ih rawngbawlnak hi a si. Kum 1952-ah BGEA hnuaiah“My Answer” tih thuthang caa a suah ih, kum 1953-ah a cabu ngan hmaisa bik “Peace with God” tih cu a ngan ttheh. Hi vekih crusade ropi tak tak a buatsaih kar lakah cabu ttha tak tak a ngan so vivo. Cabu 30 lai a ngan man. Hi a cabu ngan pawl hi a khawng ttha thei nasa, thu leh hla nganih a rawngbawlnak tla hi a hlawhtling zet a si. A hlawhtling zual lakah ‘The Jesus Generation’ kum 1971-ih a ngan mi kha a si, a tihsuah ihsi  zarh hnih nakah copies 2,00,000 hnakih tam an khawng man, ‘Angels: God’s Secret Agent’ tih mi a cabu khal thla thum sungah copies maktaduai 1 a khawng man ih, ‘How to be born again’  cabu tla cu an suah tam nasa copies 8,00,000 hi vawikhat print ah an print cih. Vawi khat nakih leitlun cabu print tambik a si. Kum 2007 ih a cabu a suah mi,  ran vulhtu dinhmun ihsi leitlun mi hlawhtling lakih mi langsar a si thei dan “Just as I Am”, cabu tla cu leitlun mipiin an duh nasa.

A nupi in a thihsan: Billy Graham ih nupi Ruth Bell Graham hi Wheaton College-ih a kai laiih a ngaihzawng a si. Ruth hi China ramih Presbyterian Missionary Dr L Nelson Bell-ih fanu a siih, China ramih piang a si. Khristian sungkua ihsin tthang lian a sivek in Ruth-hi nu special zet, a pasal Billy graham hi ziangvek khalah ttawiawm thei zet tu a si. Billy Graham ih rawngbawlnak hi a tuipiin cabu khal a mai hmin in cabu 14 lai a suah ve a si. Cabu ngan leh rawngbawlnak dangdang ih a pasal a ttawiawm lawng si lo in  ‘Ruth and Billy Graham Children’s Health Center’ cu Asheville, North Carolina-ah a din ih, hi centre hi a thih ni tiangin a enkawl a si.

Nupa thurual aw zet leh duhdaw aw zet an si, asinan cu ti duhdaw aw zet leh ngaina aw zet ih an um laiah Ruth Graham cu natnak dangdang in a tlakbuak ih, natnak a tuar mi lakah Meningitis leh Pneumonia cu a tuar nasa zual, cutin June 14, 2007 ah Ruth Graham cun Pathian kawhnak aw nem cu saangin leitlun harnak cu a suahsan. A ruak hi an nupa ih phum an duhnak hmun Billy Graham Library, Charlotte, North Carolina-ah phum a siih, Billy graham-khal hi a thih tikah hi hmunah hin an phum ve ding a si.

Cawimawi nak leh upatnak: Hi tlukih mi ropi, leitlun in thlarau lamih pa vekih an zoh mi Billy Graham hin cawimawinak tam tak a rak dawng zo ih, a zate cun kan rel thluh thei lo ding.  Cawimawinak a dawn mi lakih hminsin tlak deuh zual malte ka run thai lang ding.

Billy Graham hi pawl dangdangin Survey an neih ah American mi damlai lakih ropi bik ah vawi tampi hril a si ttheu. Hivek lam buaipitu lar tak Gallup leitlun mipa ngaihsan um bik (Ten Most Admired Men in the World) a thlan suah mi 10 lakah kum 1948 ihsin khan ttum 56 rori Billy Graham-ih hmin hi a lang, amah khum thei tu an um hrih lo.

Kum 1967 ah protestant lakih a hmaisa bik si dingin Belmont Abbey College (Roman Catholic kohhran ta) cun Honorary Doctorate degree a hlan ih, nauhak pawl hrangih a hnatuan that ruangah Big brother of the Year Award hlan a rak si zo fawn. Ram leh hnam leh kohhran hrangih a tuan that tuk ruangah Templeton Foundation Prize for Progress in Religion (1982) leh Sylvanus Thayer Award (1972) pawl a rak dawng zo fawn.

Kum 1989 Oct 15 ah khan Film star leh hlasak thiam lar zual pawl hmin ngannak Hollywood Walk of Fame-ah a hmin ngan luh a rak si zo, hi hmunih Pathian rawngbawltu hmin an ngan luh um sun a si. Cun, a crusade nakih singer a hman mi pawl hrangah platform ttha tak a tuah sak ruangah kum 1999 ah Gospel Music Association (GMA) cun Gospel Music Hall of Fame-ah Billy Graham-i hmin hi an ngan lut.

Kum 2001 ah khan kum 60 sungih a rawngbawlnak ah hlawhtlinnak a rak neih zo ruangah leh mi tam tak nun a ttha lam ih a thleng danglam sak ruangah Honorary Knight Commander of the order of the British Empire (KBE) cu  Queen Elizabeth ih aiawh in Sir Christopher Meyer (British Ambassador) cun a hlan . Hi award hi British mi si lo, ramdang mi pawl cawimawinak a siih hi award dawng tu pawl hin British mi vekin “Sir” tih hin an hmin ah an bet thei lo ih, asinan an hmin tawpah cun KBE tih cu an ret thei a si.

A Caan neta lam leh a harhdamnak: Billy Graham hin Pathian thlawsuah a dawng nasa zetih, November 7, 2013 ah khan a suahcam lawm phahin BGEA in ram dangdang ih rawngbawlnak an neih theu My Hope kharnak caan an nei.

Billy Graham hi Parkinson’s disease natnak hi kum 15 sunglai a rak tuar zo. A kum a rak tam vivo thawn natnak dangdang Hydrocephalus, Bronchitis, Pneumonia etc khal a tuar . Nov 2011 ah tla kha cun Pneumonia ruangah zato tla a luh phah a si. Kum 2012 ah tla khan Bronchitis ruangah zato a rak lut zo fawn.

Himi hnu ih sin mipi hmaiah thusim nak cu a nei phah phah nan, a kum upat vivo cun a khaw hmuh khal a fiang nawn lo ih a hna theih nak tla a ttha lo vivo ruangah mipi hmaiah hin a lan aw nawn tuk lo ih, a rawngbawlnak cu a fapa Franklin Graham leh a tupa Will Graham leh BGEA hmangin peh vivo a si.

Kum 60 sung rori rawngbawlnak a neih sungah ram dang dang 185-ah minung maktaduai 215 cuangin a rawngbawlnak hi an ngaiih, a rawngbawlnak ih thlarau hlo a kaih mi leh piangthar hi maktaduai 3.2 tluk rori a si tiah an hminsin. Hivek ih Pathian rawngbawlak ih a tthat lai caan hmang thluh tu, mi ropi Billy Graham hi Kum 95 a siin tu ah cun Montreat, North Carolina, USA-ah a um.

*Zumtu U le Nau, Nu leh Pa, kan nih teh kan tthat lai caan hi Pathian hrangah maw leitlun hrangah saw kan caan kan hman???

Source :- Biography, Wheaten.

Comments

comments

2 Comments

  1. atha tk thazang ka ngah nasa.pathian in rem a ti len
    run peh thei uh la a va duh um ve.lungawi tuk.

  2. BILLY GRAHAM CU MI LAM PI PATHIAN TLUK IN AN RUAT . PATHIAN MI HMAN MI BIK AH KA NGAI NA..
    SIHMANSEHLA A THU SIM MI PAWL HI BIBLE THU TAK A SI LE SI LO KAN ZOH SAL ASI LE BIBLE THAWN A MIL LO TI HI THEI A THEIH.
    ZIANGAH TILE BIBLE SUNG AH AN TU SIM MI PAWL KHI NGAI UH LA BIBLE THU THAWN A MIL LE MIL LO, BIBLE SUNG AH A UM LE UM LO TI KHA TAH HNIK UH.LE BIBLE SUNG AH A UM LO ASI LEN AN THLARAU MIT A VANG LO RUANG AH ASI TI AH BIBLE IH A TI … SIAR DING BIBLE… ISAIAH 8:20.. MIRANG KJV AH THA TEN ZOH UH LAI AH CUN HI VEK IN A LET LO DING

    A DIK LO NAK. PAWL..
    1. BIBLE AH PATHIAN PAKHAT LAWNG A UM TI ASI..
    SIKHALSEHLA BILLY GRAHAM IN PATHIAN TAM PI UM IN A REL..MUSLIM PAWL PATHIAN, HINDU
    PATHIAN, LE BUDDHIST PAWL IH BIAK MI PATHIAN TLA BANG THEH TIN ASIM..

    2. JESU CU PATHIAN FAPA MEN2 AH A REL IH PATHIAN TAK2 ASI TI A RAK ZUM LO
    PA LE FAPA LE THIANG THLARAU PATHUM KOM PAKHAT PATHIAN ( TRINITY) HMING UM LO
    PATHIAN ASI TI AH THU A SIM THEU.. PA +FAPA+THIANGHLARAU= PATHIAN(GOD) AN TI IH HMING UM
    LO PATHIAN AN ZUM..

    3. JESU DUNG THLUN TU PAWL LE CHRISTIAN HMAISA PAWL IH ZUM DAN LE FEH DAN LE POM DAN
    (DOCTRINE) PAWL HNONG TA HRAT IH AD325 IH CATHOLIC COUNCIL OF NICEA IH CONSTANTINE
    HOHAT NAK IH PHUAH COP MI DOCTRINE SAWN A THLUN IH A HMANG.

    4. DUNGTHLUN TU PAWL LE CHRISTIAN HMAISA PAWL IH HMAN MI BAPTISMA CU JESU HMING LAWNG
    IN AN TUAH MI KHA HNONG IN PATHUM KOM PATHIAN (TRINITY)TI IN PA LE FAPA LE
    THIANGTHLARAU HMING TI IN HMING NEI LO PATHIAN HMING IN TI HNIM NAK AN HMANG.

    5. A KA LAWNG IN JESU HMING CU A SIM RERO KO NAN JESU CU ZO BIK SI TI A THEI LO. A MAH
    LAWNG HI RUN DAM NAK PE TU LE IN RUN DAM THEI TU, ZIANG ZONGZA SERSIAM TU PATHIAN DIK
    TAK ASI TI A THEI LO, ZUM TLA A ZUM LO..

    A THLARAU MIT A CAW TER SATAN PA NIH CU RUANG AH JESU HI PATHIAN ASI ZIA A RAK HMU THEI
    LO NAK SAN ASI.

    NOTE…. TU NI AH UNAU NANG LE KEI TLA KAN ZUM MI PATHIAN DIK TAK HI KAN THEI FIANG ZO MAW?
    JESU NA NEI ZO MAW TI KAN AU RERO KO NAN JESU CU PATHIAN ASI TI KAN THEI CUANG LO
    PATHIAN DANG2 UM LAI DING AH KAN RUANG A POI NA SA. CURUANG AH TUNI AH JESU SIAR
    LO PATHIAN DANG A UM LO TI THEI THLANG AW UNAU..

    A MAH LAWNG HI PATHIAN A SI.A PATHIAN SI NAK IH SIN LEI TLUN MI SUAL PAWL RUN THEI
    NAK DING AH MI NUNG TI SA SI NAK A RAK HMANG OR ACANG TA IH LEI TLUN AH KUM 33
    SUNG MINUNGNANG LE KEI MAH VEK IN A TLANG LENG IH NANG LE KEI LE LEI TLUN MI SUAL
    PAWL RUN SUAK THEI NAK DING AH KROSS AH A MI NUNG TISA SI NAK KHA A THAH TA IH CU
    TIN A MINUNGSI NAK KHA AHLO CIH LA. CU CU PATHIAN FAPA TI AH A KO.

    SIHMANSEHLA A PATHIAN SI NAK CU ZIANG TIK LAI KHAL AH A THI THEI LO MI PATHIAN, ASI IH
    LEI LE VAN LE A SUNG IH THIL UM HMUAH2 SER SIAM TU ASI. CU CU PA TI AH A KO A MI NUNG
    SI NAK IN KA PA TI AH AKO MI SI.

    CURUANG AH JESU NIH A DUNGTHLUN TU PAWL HNEN AH PA LE FAPA LE THIANGTHLARAU
    HMING IN TI HNIM NAK PEK UH TI AH THU A CAH MI KHA CUIH HMING KHA A MAH JESU ASI TI
    AN THEI THEI NAK DING AH AN THLARAU MIT KHA A RAK ON SAK TIK AH JESU HMING LAWNG IN
    BAPTISMA AN PEK TI HI ACTS 2:37-40 TIANG SIAR UH LA A FIANG THEI NA SA,

    HMIN SIN DING DANG;- PATHIAN HI PAKHAT LAWNG A UM IH A HMING CU JESU ASI.
    JESU NIH SINAK PAHNIH A NEI IH MINUNG SI NAK LE PATHIAN
    SINAK ASI

    A PATHIAN SI NAK CU PA PATHIAN ( GOD THE FATHER) TI A SI.
    A MINUNG SI NAK CU PATHIAN FAPA (GOD THE SON) TI ASI
    PATHIAN CU THLARAU ASI..

    JESU SIAR LO PATHIAN DANG A UM HRIM2 LO.. A UM TI AH NA ZUM ASI LEN SATAN KA ZUM NA TI NAK ASI…

Comments

%d bloggers like this: