Evan. Hrin Sai Lo thawn hmaitonnak

Kan Falam Unau lak ih Pathian mi hman rerro lai, Evangelist Hrin Sai Lo thawn hmaiton thusuhnak kan nei/tuah thei hi, kan Chinlantoday
thlawsuah pakhat ah kan pom. Amah hi Laitlang le Kawlrawn, Mizoram le Hakha tiang ih Pathian in a hman rero lai mi a si. Kan tonawk
sungih kan thusuhawknak tlangpi pawl cu: (Nb: Chinlandtoday = CT, Hrin Sai Lo = HR)

CT: Na suah kum na suahnak nu le pa, Khua, na unau pawlih hmin in sim thei kemmaw?
HR: Thlangcing khua ah 03.09.1977 ah ka suak ih, Pa Thang Cung Nung (L) le Nu Run Men Cuai fa, 11 lakah a 5 nak ka siih, pathum in mual
in liam san zo. Tui damlai pawl cu, Ngun Nei Kai (Haikhawl), No Hlei Kheng (Aizawl),Lal Biak Hlem (Falam), Sui Nei Khum (Aizawl), Hrin Sai Lo (Kalay Cicai), Bawi Ven Kim (Kalay Cicai), Lal Lian Par (Kalay Cicai), Za Ruat Lian (Aizawl) pawl an si.

CT: Nupi fanau neiin maw na um?
HR: Tutiang lawmmam cun nei ve thlang kei cu maw.

CT: Fanau ziangzat na nei ih, an hmin pawl in sim thei kemmaw?
HR: Fanau hi Mipa 3 le nunau pakhat an si. Van Nei Kim, No Tin Sawn, Van Lian Uk le Lal Hmasa pawl tla an si.

CT: Leitlun fimthiamnak lam ah ziangzat na thleng?
HR: Kawlram ah Phun 4 tiang lawng ka kai. Harsatnak ruangah ka peh thei nawn lo. Hmailam can ah Pathian in rem a ti ahcun Bible tlawng cu kai thei sehla tiah ruahsannak ka nei.

CT: Ziangtik kum ah na hmusuak/piangthar ih, na hmusuak/piangthar nak Bible bung cang le a hmun in sim thei kemmaw?
HR: Kum 1998 ah Aizawl, Agape Capaign Center ah ka hmu suakaw ih, KOl. 3:3 “Ziangah tile, nan thi zo ih, nan nunnak taktak cu Khrih thawn Pathian sungah thuh in a um a si” hmang in a si.

CT: Na hmuhsuahawk veten maw rawngbawlnak na luh? Asilole, a kum in sim thei kemmaw?
HR: Ka pianthar veten cun a si lo, innsungsang ei le in hawlin khual ka tlawn rero lai 2005 Dec.1 ah, Johan 8:32 “Thutak cu nan thei dingih, cui thutak cun a lo luat ter ding”, tiah a ti, timi hmangin, Champhai, Mizoram ka um laiah rawngbawl dingih kawhnak ka co ih, cumi ni ihsin tuini tiang cu Pathian in lam in hruai a si hi.

CT: Na rawngbawl thok hmaisabik ah, Kohhhran sawmnak maw, nangmah in Kohhran na va dil so, a hmun khui tawk so in sim thei kemmaw?
HR: Sim thei e, keimah Rih Baptist ah ka dilah ka dil ih, Pathian aw ah in cohlan sak in siang zet in an Biak in khal in on sakih, zarh khat sung Crusade nak kan nei.

CT: Cuimi hnu ah teh, kawhnak in maw na dil vivo?
HR: Dil lo, Pathian zaangfahnak in kan mai khua, Kalay Cicai ah Home Crusade dingin sawmnak ka dawng ih, cumi theh ah, Rihkhawdar ah, khawtlang campaign dingin in sawm ih, zarhkhat dingih sawm ka si nan, Pathian in a thu mal a sawm ih, zarh thum sung Camp kan neih hnu ah, a zarh linakah follow up in kan peh.

CT: Tong Ziangzat in Pathian thu na sim thei ih, ziang tong pawl ha an si?
HR: Tong Phunhnih in ka sim thei Falam le Mizo an si.

CT: Tu hi hmun ziangzat hrawngah ha rawngbawlnak na neih zo? Colh caan teh na nei phahphah maw?
HR: E… a hmun cun siar cawk a si ding ka zum lo, Crusade le Camp lawng hmanah 80 lenglo a si ta in ka thei ih, cumi lo cu khawmpi ih
Speaker hi vei 30 lenglo a si ding ka zum. Pathian in in thlawsuah ih, hruaitu pawl duhsaknak co in, vei tampi sermon le zirhnak in pe
theu.

CT: Midung thlun in na thlun dah maw?
HR: Saya Evan. Dr. S Tha Nei Fai dungthlun ih zarhhnih ka feh lo cu midang dung ka thlun lai ka thei lo.

CT: Tui 2012 sung ahhin khaw ziangzat ah ha na tuah zo ih, tuah lai ding ziang zat na nei lai?
HR: Tui dinhmun tiang ahcun khaw 17 a siih, hmun 7 hrawngah a um cia cu a um ih, hmansehla zarh ziat ti zawng cun ka sim thei lo.

CT: Pathian thu na hmuh dan tlangpi in sim thei kemmaw?
HR: Rel thiam a har zet nan, 1) Tluksiatnak thu ahcun BUM siin ka hmu 2) Sual thu ahcun Se linglet, thatnak nei lo siin ka hmu aw 3) Rundamnak khalah kan tuahtuan silo, zaangfahnak siin ka hmu 4) Rundamnak cu reilo silo in, kumkhaw catuan daih siin ka hmu 5) Khristian nitin nunnak khalah Thlarau Thianghlim hruainak/Bawmnak zianghman ti thei mi kan nei cuang lo, kan ti thei kan timi khal Thlarau Thianghlim zarah a si. 6) Cui Thlarau Thianghlim cun kam dangsung lawng silo in, Vanram tiang in hruai thleng ding. Himi a tlangpi ih ka hmuh mi a si … a dang tam zet a um ko nan ka duh tawk hrih ding.

CT: Tui kan ram Khristian nun na hmuh dan tlangpi?
HR: Relthiam hi a har zet in ka thei, kan thuthang tha dawn mi a tha zet nan, Khrih nun neih ruangih Khristian hnak in, Sakhuanak sawn ih Khristian kan tam ih, mi hrekkhat Sunday Khristian khal an um vivo. Cun, nun ih Bawipa lungawi ter hnak in, peknak ih lungawiter tum khal tam zet in ka thei. Asinan, mi hrekkhat thlacam le nun ngai nei ih nung khal an karh vivo in ka theiih, himi Thlarau lam ih kan ram in thlawsuah kan dawn mi si khal in ka theiih, Pathian ka thangthat ngaingai a si.

CT: Thanau can na nei dingih, ziangtik caan ah ha na tha a nau theu bik?
HR: Thanau caan cu zo khalin ka nei cio in ka thei, ka thanau theu caan cu ‘Santlailo ka si ti ka theih tin ten ka tha a nau’.

CT: Na Phur/Lungawi bik caan in sim thei kemmaw?
HR: Ka parih Pathian that zia ka theih suah tinten ka lungawi in ka phur nasa.

CT: Bible bung cang ah teh duh hleice na nei maw?
HR: A Bible pumpi hi ka duh cu a si ko e… nan a hleice vun ti cun, Matthai 11:28 “Thilrit a phur mi le zohzaih a tuar mi pawl, ka hnenah ra uh, colhdamnak ka lo pe ding”.

CT: Hmailam caan hrang ziang mi tumtahnak na nei?
HR: Pathian ih rem a ti sung hmuahhmuah a hnatuan peh vivo hleilo ih tumtah dang ka neih ka thei lo.

CT: Ramsung ram leng ih um kan Laimi hnenah cah duh mi na nei maw?
HR: Kan umnak hmun cio ah, kut za kaiin, Pathian tihzah le taangdawrnak nun thawn hmailam pan ih lungrualza ih kekar vivo hi ka duhthusam bik a si.

CT: Lo contact duh hrang ziang tin ha si ding?

HR: Hmunkhat ih um ringring lo kan si vek in, Email hi a ol bik ding. hrinsailo12@gmail.com

CT: Pathian in na hmailam can lo on sak vivo hram seh. Caan tha in pek ruangah kan lungawi.
HR: Kei khal ka lungawi.

(Visited 89 times, 1 visits today)

Comments

comments

4 Comments

  1. Saya Hrin Sai Lo

    Pathian in lo hmang vivo hramseh, thlarau hlo tampi
    kai in Pathian na riannak ah rin um zet le taima zet in
    um hram kei ci.

  2. A ro pi tuk. Pathian in lo hmang sinsin hramse!!!!!!

  3. ee! Hrin Sai Lo ci rawngbawltu a rak si maw.

  4. Kan Falammi PT ih mihman tamsinsin sehlaw…

Comments

%d bloggers like this: