Erin Hnen Ihsin Zirnak

July 26

Tlawngkai Nikhat 

Erin Hnen Ihsin Zirnak 

Siar:

1 Korin. 12:21-25 

Bawipa cu a tumlian ih, nasazet ih thangtthat ding a si. Maktara a si ih theih ban ding a si lo.    – Saam 145:8 

Kumkhat Sung Baibal:

–   Saam 40-42

–   Tirhthlah 27: 1-26 

Erin cu kum 8 a si mi nauhak tampi thawn an danglam awzet. Midang nauhak pawl cu an lek, an tlan ih ice-cream an ei rero lai ah Erin cu ihkhun parah pipe thawn rawl an pek. A tleuzetmi lawng a hmu thei ih a thangzetmi aw lawng a thei thei. A dam lonak le mi kim lo a sinak ruangah a nunnak cu siidawtnak tthimte thawn siizung saya/ma hnen fehnak lawngin a caan a liam.

 Erin cu sungkhat unau pawl in zawnruahnak thawn an kilkhawi. A nunnak cu mi ih duhdawtnak thawn a khat. Erin cu a kum 9 kimnak suahni kim hlan te ah a thi. Amah hi kamkhat khal a ttong thei lo, zuksuai khal thiam lo le hla khal sak dah lo a si. Asinan a nu le pa in, “Erin in zawnruahnak, duhdawtnak le thil fate parih lungawi thiamnak nun in zirh a si,” an ti.           

Nauhakte Erin in hih leilung cu mifamkim, milian le mithiam hrang lawngah a si lo ti in theihter. Taksa, thinlung le ruahnak kim le kim lo kan zate’n Pathian hmuihmel keng ih sersiammi kan si (Seem 1:26-27) ih kan nunnak man neih daan a bang aw ttheh. Kan Bawipa cu mi derdai, thinlung kekkuaimi le sersiammi zate tlunah zawnruahnak a nei (Saam 145:8-9). Erin ih nunnak ihsin na zir ngahmi a um maw?    – Cindy Hess Kasper 

Leilung mi in zianghman man nei lo le,

Milai hrangah phur rittertu men tiih an ruahmi;

Pathian ih sunlawinak huham thawn zirh aw,

 Hlawnthil mankhung bangin a duhdawt mi an si. 

Thlarau pakhat ih man kha a mal in ruat hrimhrim hlah.

Comments

comments

One Comment

  1. a tha nan ti cun a tha ka ti ve ko

Comments

%d bloggers like this: