England Ram Siangpahrang Tupa Nupi Nei Cing Ding

England ram Siangpahrang Queen Elizabeth ih tupa Prince William cun kum 8 sung a rak kawp zomi Catherine Elizabeth Middleton thawi hnakumih an  neihawk dingthu a puang felta. Prince William leh a nupi ding Catherine Elizabeth Middleton ih neih awk ding thuhin leitlun a dengsuak cak nasa ih, England ram Siangpahrang tohkham luahtu ding Prince William leh a nupi ding Catherine Elizabeth Middleton hi kum 28 mi veve an si.

Himi te pahnih hi tuikum October thla ah khan Kenya ramih  colh hahdam an hman nakah hamawk nak an tuahih, an neihawk ding thuhla an puansuah ihsin ram dangdang hruaitu upa leh mi pawimawh ziangmaw zatin lungawipi nak leh lawmnak an kuatih cumi pawl lakah Canada Prime Minister, Stephen Harper, Australia Prime Minister,  Julia Gillard leh British Prime Minister, David Cameron pawl khal an tel.

Prince William hin a nupi ding Catherine Elizabeth Middleton hamnak ih zunghruk a pek mihi a suahnak pa Prince Charles in a nu Diana a rakpek mi kherkher a siih, Prince William in himi a nui zunghruk kherkher a nupi ding  hamnak ih a peknak sancu kum 1997 ih France ram khawpi Paris ih Motor cangsual nakih thi a nu Diana cin ringring nak leh a nu Diana cu  tu ah an hnenah umlo hman sehla an thinlung ah a um ringring timi langter nakih a pek mi a si thu a sim.

Prince William leh a nupi ding Catherine Elizabeth Middleton tei pahnih hi St, Andreus University ih tlawng an kaitlang nak ihsi thei aw  an siih, relzo vekin kum 8 an thlunawk hnu ah an nei aw ding a si. Siangpahrang lalnu Queen Elizabeth khalin an tupa in nupi a neih dinghi a  thinlung taktakih a lungawipi thu a sim. William leh a nupi Kate tei pahnih neihawk dinghi leitlunih neihawk nak ropi bik leh sunglawi bikih ruahmi a nule a pa Prince Charles leh Diana tei neihawk nak hnakih ropi sawn dingih ruah a si.

(Visited 39 times, 1 visits today)

Comments

comments

Comments

%d bloggers like this: