Elizabeth II Ih X’mas Thusim Cu 3D In Thlahsuah Ding

Siangpahrang bawinu Elizabeth II hi UK siangpahrang pawl lakah 3D thawn X’mas thusimnak nei hmaisabiktu ah a cang ding. 

Kumtin X’mas ni ih a sim ṭheumi X’mas message cu tukum hrangah a tim a tuah tikah danglam hleice dingah 3D thawn zuknung a tuah ih thu a sim.

“A sungih tel dingmi pawl cu thil picang deuh lawng an si ding. Ziangahtile santhar fimthiamnak technology neihṭhatzia pawl langternak ding ruangah a si,” ti’n Daily Mail thuthangca in a tarlang. Himi X’mas thusimnak hi X’mas ni ah thlahsuah lai ding a si.

Cumi 3D thawn tuahmi thusimnak sungah a hmaisa ah siangpahrang hmai ih performance hmuh ṭheutu Daniel Craig ih Jame Bond ih performence le, cuṭheh ah London 2012 Olympic puaipi onnak special video pawl cu langter ding a si. Christmas message thusimnak zuknung cu BSkyB in a tuahfel zo ih, a tikcu ah BBC le ITV pawlah thlah ih suah ding a si.

Siangpahrang bawinu ih ṭongkam lakkhumnak cu Buckingham Palace siangpahrang innpi sungah Tlawngkai Ningani 7.12.12, ah an tuah zo.

Kum 86 a si zomi Queen Elizabeth II in a thusim dingmi ah amai Siangpahrang uknak Dimond Jubilee puaipi, 6.2.12, thu le Olympic puaipi, July 25- August 12, thu pawl thupi zetin a simtel ding. Queen Elizabeth II in 1952 ah a hmaisabik X’mas message thu a sim ih 1957 kum X’mas ni ah TV pawlah a thlahsuah dah.

Himi X’mas thusimnak hi Elizabeth II ih a pu George V in 1932 kum ah a simthok ih cumi ihsin sim ringring mi ah a cang. Cumi laiah radio thawn lawng thlahsuah thei a siih Rudyard Kipling in ṭuanvo a laksak.

England siangpahrang innsungsang ih channel cu 2007 ihsin thokin Youtube ah ret a si zoih, Elizabeth II in amai pumpaak Twitter account cu 2009 ah a nei zo. Prince William cun kan dungkum, Kate Middleton thawn an thitawk laiah 3D thawn thusim ding a eel dah ruangah UK siangpahrang pawl lakih a hmaisabik 3D thawn thusimtu sinak cu a co thei nawn lo.

(Visited 99 times, 1 visits today)

Comments

comments

Comments

%d bloggers like this: