EL SAN DING!

November 13
Tlawngkai Ninga

EL SAN DING!

SIAR:
Luka 4:1-13

Jesuh in, “Ca Thianghlim in milai nunnak hi rawl lawngin a si lo, a
ti” tiah a sawn. -Luka 4:4

KUMKHAT SUNG BAIBAL:
–    Ttahhla 1-2
–    Hebru 10:1-18

Hmakhat te ah lungawi dingin in bum theitu cu kan hmuhmi le kan
theihmi cawngia pawl an si. “Kumkhat sung man pek loin kan thil suahmi
lei aw” tivek cawngia pawl hi hmakhat te ih lungawinak a si.
   
Khawsia in Jesuh a hniksak tikah (Luke 4:1-13) hmakhat te ih diriamnak
a pek.  A Pa Pathian rinsan loin amah te a huham hmang dingin a
tukforh.
   
Jesuh cu ni 40 sung rawl ul in a um ih a rilrawn laiah (c. 2) Satan in
lungto kha sang ah canter dingin a tukforh. Jesuh in cutin tuahta bang
sehla amai’ hlawknak hrangah a huham a hmang ah a cang ding.  Asinan
Jesuh in a el.
   
Ziangah leilung tlun ih thuneihnak le lennak hmuahhmuah ka lo pe ding
tiah Satan ih a timi Jesuh in a el (cc. 5-7)? Thinglamtah ih thihnak
khal a hrial thei.  Hmanseh a hrial ahcun thinglamtah parih a nunnak
pek, thawhsaalnak, vancung uknak sungah Pa vorhlam ih to dingin a
hrangah Pathian ih tumtahmi thawn a kalh aw ding.
   
Man olmi hniksaknak pawl raalring aw. Satan in amai’ thiltuah daan
vekih tuah dingah a lo ring. Jesuh in a veithumnak hniksaknak a el
ngah hmanah, caan ttha a ngah saal hlan sung a feh sung men (c. 13).
   
Hmakhatte ah lungawinak a um tikah a lo petu zoh aw.

Bawipa, khawsia ih pekmi thil theithiam ding i bawm aw,
Sual dingih bumnak pawl an si;
Nangmah le Na Ttongkam zoh ringring dingah i bawm aw,
Thlacamnak in ka hna lo tun ning.

Sualforhnak ihsin luatnak tthabik cu Pathian hnenih tlan hi a si.

(Visited 24 times, 1 visits today)

Comments

comments

Comments

%d bloggers like this: