Eisenhower Ih Thinhen Buainak

September 13

Tlawngkai Nikhat 

Eisenhower Ih Thinhen Buainak 

Siar:

Thufim 16:21-32 

Thinsau cu thacahnak hnakin a ttha deuh. Mah le mah uk theinak cu khuapi pawl uk thei hnakin a ttha deuh.      – Thufim 16:32 

Kumkhat Sung Baibal:

–   Thufim 16-18

–   2 Korin. 6 

1944 June 6 ni ah, Mahamik Raalkap Burpi hotu raalbawi Dwight D. Eisenhower cu leilung tlun ih thiltitheinak huham neibik ah a cang. A thuneihnak hnuai ah a tumbikmi ti raalkap le lei raalkap pawl cu Nazi kuttang ih ummi Europe ram pawl luatter dingin an pumkhawm aw. Cumi tluk ih a tummi raalkap burpi cu Eisenhower in ziangti’n a hruai thei? Thulehnak ih tthenkhat cu mi phunphun thawn hna a ttuan thiamnak thawn a pehpar aw thei.      

Anih hi midang thawn rualrem te’n um ringring thiam cu a si lo. A nauhaklai ah tlawng ah kuttum thawn mi a sual ttheu. A thluasuah donmi cu Pathian Ttongkam thawn nun zirh thiamtu nu a nei. Veikhat cu a kut ih hliamhma tuam sak phah in a nu in, “Thinsau cu thacahnak hnakin a ttha deuh. Mah le mah uk theinak cu khuapi pawl uk thei hnakin a ttha deuh,” (Thuf. 16:32) timi thu a sim. Kum reipi hnu ah, “Ka nu ih cuih thu i simlai kha ka nun sungih man neibik caan pakhat vekin ka vun ruat saal ttheu,” tiah ca a ngan. A thinhennak uk daan zir in midang thawn hmual neizet ih hnattuan tlang theitu ah a hung cang.      

Kannih khal thinhengzet caan kan nei ttheu ko ding. Sihmansehla, kan sungah Pathian ih hnattuannak in kan thinhennak uk daan kan zir thei. Thin neemnak thawn mi nehkhuh cu a ttha sawn.      – Dennis Fisher   

Thlarau Pathian, ka thinlung i thlengh hram aw,

Duhnak thar i pe hram aw;

Thlangam daihnak ih ukmi si ka duh,

Thinhennak meisa ih uk lo mi. – K. De Haan 

A thinhennak a neh theitu cun a cakzetmi raal a neh.

 

Comments

comments

Comments

%d bloggers like this: