Ei-in Rawl, Hmeh Bawl Dan (4)

Arti huut
Arti Huut (Steam Egg)

Himi Arti huut hi a thaw zet. A suan khal a ol. Cun harhdam zetmi rawl hmeh(Healthy food) a si. Pitar putar le harhdamnak ruangih hmeh riim ei ngam lo pawl hrangah a hleice in a țha. Cun, hnațuan tam pawl hrang thilsuan ol tluang tak sisi in hmeh thaw zet a si fawn. Ziangahtile amahte suan hlei țul loin buh suan zawngah/ buh hnenih huut cih a theihmi hrimhrim hin meisa tha khal a tlo. Caan khal a heu lo. Cubet ah Arti pumkhat in sungrual hrang a daih fawn. Khale, a suan na duh ko lo maw? Kan zir tlang pei uh.

Arti Huut (Steam Egg)

A Telmi Thilri (Ingredients);

1. Arti Pumkhat
2. Sa sahcipcia (Mince meat) tikle 5 tluk hrawng
3. Kawingiat/ Purawng/ vakzuar (Long bean) pahnih
4. Red carrot a hrek (pakhat pumhlum khal na hmang thei)
5. Cite
6. Tidai khuat khat
7. Sesame oil (for hnih hrawng)
8. Cooking wine haite hrek

A Tuahdan;

1. Mince meat (Sa sahcipcia) dawrih an zuar țheumi punghman pack ih a hrek lawng na hmang ding. Mince meat kha cite, cooking wine le sesame oil thawn na cokrawi hmaisa dingih malte sung na ret lawk ding.

2. Cule long bean(himi Long bean hi kan falam țong rori ah kan kawhdan a bangaw lo tuk. Kawlin ပဲေထာင့္႐ွည္, mirang in long bean an tiih kannih kan khaw țong rori cun Kawingiat kan ti. Falam khawsung mi tam sawn cun Purawng tiin an thei.) le carrot kha a rualin na at ding. Fate deuh nawn in. Cuthluh ah Mince Meat thawn na cokrawi sal ding.

3. Cun, Arti pumkhat na khuai dingih cite malte thawn na cok ciamco ding. Cumi cu sa le bean pawl thawn na cok sal ding. Cumi parah tidai khuat khat na toih dingih veikhat rualten na cok sal ding.

4. Buh thawn na huu cih duh asile rice cooker sungah a dartu na ret dingih cutin na suang cih ding. Na buh hmin cun a rak hmin ve. Buh thawn huu cih loih a dangten na huu duh asile tisa na soh ciami parah thil huutnak thir dar na ret dingih a sin hnget teih na sin hnu 5mins ah ei a theih zo.

By/ Mai Daidim

‪#‎CTrawlsuanzirnak‬

(Visited 440 times, 1 visits today)

Comments

comments

Comments

%d bloggers like this: