Ei-in Rawl, Hmeh Bawl Dan (14)

curry chicken
Curry Chicken (Own created)

Curry Chicken hi rawlhmeh lar zet pakhat a si kan ti thei. Singapore le Malaysia ah tla cun an uar ngaingai ko. Cun, Singapore ih inn hnațuan tam sawn cun an/kan suan țheumi a si. Asinan a tlangpi thu in ready make packed hman a si. Tui’ ka rak tarmi cu sauce ready make si loin own create a si. Ziangahtile ka hnațuannak ka pi hi lenglam zoh cun mi dam zet a bang. Nitin zung a kai thei ko nan sunglam damlonak ruangah thil ei thiamlomi a nei tam hnuaihni. Coconut milk tivek khal a ngaihlomi a rak si. Curry khal a ei ngam tuk lo. A fale in le curry an uar zet ruangah kan zatei’ ei theih dingin spices tel tam lo le coconut milk rawi lo’n hitin ka suannak a si. Hitin ka suan cun kut tongaw surhso’n lungawi zetin rawl kan ei tlang thei. Na suang duh ve maw? Rak suang sin ve aw.

Curry Chicken

A Telmi Thilri;

1. Arsa 1 (1 whole chicken)
2. Sai Aalu 3 (3 American potatoes)
3. Lemongrass ko khat (1 stalk of Lemongrass)
4. Hnakphek sen a saumi 3
5. Khasuan sen 1
6. Khuasuan raang 4
7. Aihre ¼ tea spoon
8. Hnakphek phut ¼ tea spoon
9. Siti 3 table spoons
10. Cite ½ table spoon
11. Tidai 2 cups

Timtuahdan;

A hmaisabik ah Arsa kha na kholh fai thluh ding. A sungril, a thihlang pawl na hlon thluh hnu ah sasem awm-mawi tawkin na can ding. Cutin khengah ret sung aw.

Khasuan sen, khasuan raang a hawng na kheh hnu ah kholh fai aw. Khasuan sen kha faten at aw. Cun, hnakphak sen a sungmu hlon awla kholhfai in faten at thotho. Lemongrass khal kholh fai awla eh khat can teten at aw.

Hngakphek phomnak sum ah khasuan sen, khasuan rang, hnakphek sen le lemongrass a zaten phomh tlang thluh aw. Cip zetin phomh aw.

Aalu a hawng zelh awla Arsa na candan thawn rualaw hrawngin na at ding.

A Suandan;

Thirbel sungah siti na sat ding. Cun, khasuan le hnakphek, lemongrass na phomhmi zaten na thlak ding. Na thlak veten aihre le hnakphek phut khal na thlak cih ve ding. Cun, na cok rero ding. Khasuan pawl ro phiarpho vekin golden color an si in Arsa na thlak ding. Na cok rero thotho ding. Na Arsa thisen a kang thluh, arsa rong a raang phiatphiat ngahin Aalu na thlak ding. Cun, cite thlak awla cok rual aw. Na cawhrual ngahin a sin sin awla 1 min hrawng ret aw. Cok sal awla 1min sung a sin sin sal. Cu thluhin tidai toih awla a so hlurhlo ngahin meisa faten tuah. 10mins sungah a hmin. A hmin cun ei theih si cih. Thildang dang tampi rawi lo’n a thiang zet le a thaw zetmi hmeh a si zo.

‪#‎CTrawlsuanzirnak‬

Comments

comments

Comments

%d bloggers like this: