Dutch Mi Tirhfak pawl

Netherlands ram kan thlen tikah khual hruaitu (tour guide) in, “Dutch miphun pawl cu an tirh a fak ngaingai,” tiah in sim.

A tir ahcun kan zum lawk lo. Ziangahtile Netherlands cu leitlun ram neinung bik lak ih tel a si ruangah a si. Hivek ih a neinung mi ram ih minung pawl ziangtin an tirh a fak thei ding tiah kan ruat. Lehhnu lam ah nuamtetei’ a tak ih kan tonteh hnu lawng in Dutch miphun pawl an tirh a fak taktak ti kan run thei sal.

(1) Air-Con Hman An Hrap A Hria
Ni khat cu Netherlands ram ih Thorn timi khawpi tenau pakhat ah kan feh. Cumi ni ih khawhlum lam cu 36-37 Celcius lai a si. Khua a hlum tuk ruangah kan zate’n kan zaangtluan cu thlan in an ciar thluh. Cu lai ah lamzin sir ih khawfi dawr kan hmu ih kan vung lut. Dawr sung khal a hlum hiamhiam. air-con a um lo. Khual hruaitu cun hitawk lawng hi air-con umlonak hmun a si cuang lo, Netherlands ram ih khawpi tampi khal ah air-con umlonak inn le dawr an tampi tiah in sim. Zan ih kan riahnak ding khualbuk khal ah air-con a um lo ti a si. Zan kan riah tik khal ah air-con a um lo taktak. A thaizing ah khual hruaitui’ hnenah air-con umnak khualbuk ih riak ding in kan dil.

Cutikah khual hruaitu cun in zoh phah in, “Leilungpi a dam lo ti nan thei lo maw? Leitlun dam lo tertu cu kanmah minung pawl kan si. Netherlands rammi pawl cun air-con cu rel hlah, pangka (fan) hman an hmang lo. An hmang a si hman ah a ttul tuk hrat lawng ah a si. Pindan sungih minung an um lo vete’n pangka an phit. Meisa man pek ttul lo mi khualbuk ih an riah khal ah pindan ih minung an um lo cun an phit thotho,” tiah in sim.

(2) Mawttaw Lei An Hriaphria
Netherlands ram hi Europe ram hmuahhmuah lakih thirleng to tambik ram an si. Khawte ah siseh, khawpi ah siseh thirleng totu tampi hmuh ding an um. Khual hruaitu cun Netherlands cozah in thirleng to hi tha a pe tiah in sim. Thirleng to ih hnattuan fehtu pawl cu laksawng pek an si ih, an hnattuan ihsi an ngah mi sumlut siah khal tthumsak an si.

Netherlands ih lamzin pi le lamzin te tinkim ah thirleng totu hlir an khat taktak.

(3) Ti Hlum Hman An Hraphria
Khual hruaitu in, “Ti hlum thawn tidai bual a duh ttheutu pawl Netherlands ram nan thlen cun ralring cuh maw. Netherlands ram cun tidai ih hlumlam hi 45 degree celcius ah rualrante’n a tuah. Himi hi khuarel (nature) kilkhawinak a si tiah Netherlands cozah in a sim,” tiah in ti.

(4) Khengkho Hman An Hraphria
Mahte-lak (self-service) rawl dawr pawl ih kan hmuh mi cu Dutch miphun pawl cun hman zo mi kheng pawl an hmang non rero timi a si. Netherlands cozah in a ram mipi pawl kha “rawl vei khat ei ah kheng pakhat lawng hman ding’ timi cangvaihnak thawn forhfialnak a rak tuah. Khengkho kholhnak tidai, thilri tlengfainak tidai pawl hin tidai le thli nasa zet in an borhbahter. Netherlands ram ahcun an hlon mi tidai kha hman theih sal ding in cet thawn an tuah ih an hmang sal. An hlon mi tidai ah thilri tlengfainak ih hman mi sii pawl an tel asile hman sal theih ding ih tuah a buaithlak cuang ttheu. Cumi ah sumpai, caan, thazang a cem tam sawn ruangah mipi kha kheng hmang mal ding in cozah in a forhfialnak a si.

Khualhruaitu ih sim mi kan theih tikah fimnak kan ngah. Leilungpi hi kanmah minung hmuahhmuah ih kan neih tlang mi inn a si. Minung pakhat lawng asilole ram pakhat lawng in hi leilungpi ngainat le sunsak ding timi cu a cang thei lo. Minung hmuahhmuah in kan ngainat ih kan humhim lawng ah a thianghlim in a harhdam mi kiangkap boruak kan ngah thei ding.

Taktak ahcun Dutch mi tirhfak pawl kan timi cu lungput tlamtling a neitu, thinlung kau a neitu an rak si.

Kiangkap boruak kilkhawinak hi Dutch miphun pawl hrang ahcun an nun sungih a tel mi thil pakhat a si zo. Kiangkap boruak borhbah cun zatlang nun harhdam lo a suahter ih hlei ah, leitlun mithmuh ih ningzah thlak thil hnuaihnung pakhat khal a si.

Kiangkap boruak kilkhawi thu hi thehlarnak thuken le a sim le rel men lawng thawn a tawk lo. Minung hmuahhmuah in a tak ih tel le ttuan ttul mi a si. Kan kiangkap ih thil tenau tete ihsi ttuan thok khal hin kiangkap boruak kilkhawinak a bawm thotho a si.

Ngantu: Wang Jun, Link: http://www.85nian.net/zuowensucai/16209.html
Lehnak: Nine Nine Sanay ih lehmi ihsin leh sawng mi a si.

-Sianglianuk Kianghrol

(Visited 72 times, 1 visits today)

Comments

comments

Comments

%d bloggers like this: