Dunglam Hmu

September 25

Zarhte Ni

Dunglam Hmu

Siar:

Hebru 11:13-16, 23-27

A tlun ih ka simmi zumnak neitu pawl cu an thih tikah zumnak thawn an thi. Pathian ih a kammi pawl cu an co ngah lo nain a hlavaang ihsin an hmu ih an lung a awi.     – Hebru 11:13

Kumkhat Sung Baibal:

–   Solomon Hla 6-8

–    Galati 4

Kan dung tthaal lai ah ka pasal thawn Chicago ihsin Grand Rapids lam ah tlangleng in khual kan tlawng. Dunglam a hoimi tokheng ah kan to ngah ih hmailam kan fehnak ding hmu thei loin kan thlen cianak lawng kan hmu thei. Inn pawl, tili pawl, thingkung pawl cu tlangleng tukvirh ong in zam rero in kan lanta. Himi vek ai-in hmailam ih kan fehnak ding hmuh ka duh sawn.

A caancaan cu kan nunnak khal ah cuvek a si; kan hmailam hmu thei sehla kan duh. Atu ih thil um daan hi ziangti’n a thlengh aw leh dingih Pathian in kan thlacamnak ziangti’n in let ding timi theih kan duh. Asinan kan theih theimi cu a cang ciami pawl lawng an si. Zumnak hrangah cumi cu a si. Cuti’n si lo sehla zumnak hrangah a si thei lo ding.

Thukam Hlun ah mi hrekkhat cu zumnak in hmailam an hmu. Noah, Abraham le Sarah cu Pathian ih a kammi pawl a hlavaang ihsin an hmu. An ruahmi le an ngaimi cu ram ttha deuh sawn, vancung ram a si (Hebru 11:13, 16). Moses khal in zumnak in Jesuh Khrih a hmu (c.27).

Tuih sun nasazet thazaang suah ih kan ttuanmi in ziang a suahpi leh ding kan thei lo nain zumtu cun hmailam ah Jesuh thawn kumkhua kan umnak ding vancung inn kha zumnak in kan hmu thei.     – Anne Cetas

Hmailam thu Bible sungah kan hmu,

Pathian ih in seuhmi theih theinak thawn;

Zumnak in a lang lomi kan hmu thei,

Amah ih timtuahmi sunlawinak. – Hess

In tiamkammi vanram cu kan kumkhua ruahsannak a si.

Comments

comments

Comments

%d bloggers like this: