Dung Sip Hi Nehnak Sawn A Si Maw?

DF-ST-87-12398Salai Uk Lian

Tulai cu keimah ten pitar pol nei bangin “Dung kan sip sawn pei” ti’n ka tlok rero. Dungsip cu dungtolh thawn malte a dangaw deuh. Dungsip cu hmai nornak ding hrang, tha laknak a si ruangah dungsip cu a thupi nasa. Veikhat cu, Ruun lamzin so ah kan mawtaw a taangih taang lo dingin a soh lan theinak dingah a dunglam ah malte a sip lawkih cutin thazang nasaten a lak hnu ah napin a so lan suak thei a si. Malte khal dungsip duh loin a taannak hmun ihsin nawp aw rero hmansehla a so lan suak thei dah lo ding ti cu kan fiang. Curuangah dungsip thiam hi a rak tuul ngaingai asi.

Dungsip thiam hi thil thupizet si cingin dungsip zir ciamco kan um ding ka zum lo. Mawtaw mawng kan zir tik khalah dungsip hnakin hmaizawn te ih mawn kan zir tam deuh. Asinan, dungsip zawngih colh le din thiam cu a rak thupi zet fawn. Leitlun hmunkip thuthang pawl kan theihmi ah nunnak tiang liam ih mawtaw caangsual pawl cu a tlangpithu in, an rinsan aw tawkih ralring duh lo zuri le cak tuk fahran ih an mawn ruangah a si ti kan thei. Dungsip zawng ih mawtaw mawng mi sawh that ciamco thuthang tla theih ding a malsawn riangri, ziangahtile dungsip ding ahcun kan ralring hleice ruangah tla asi thei. Hmailam hla pi fehnak ding hrangah malte dung kan sip lawk theu hi ziangtluk a thupi timi nitin zantin mang thei sehla, malte cu kan phah aw niam thei ding ka zum.

 “Dung tolh ih tolh duh lo pawl, dung sip ih sip duh lo remrem pawl hi ni khat nini ahcun an sirawknak van a dawng ko ding”

Bawhlung naapin sit ding asi ahcun dunglam ah hla deuh sip ih nawpawk ta a tuul ti khal kan thei. Veikhat cu cawleng ka mawng ih caw le leng neitu pa in “Ralring aw ka caw pawl hi dungsip Kawl tong cun “Nauh-sauh” an thiam lo, dung na sip ter le an lo saih ding” in ti. Dungsip an thiam lo ruangah kan fanginn thawn naih aw te ih ding, ding cu kan ding thei lo. Bang hel-hel in fang kan rut ih kan bur zawk rero. Ziangah dungsip timi hitluk ra thupi mi rori dungsip hi kan zir ciamco dah lo tiin ka ruat nasa.Argument

Ralram cu ka feh dah lo nan, ka theih sun mi ahcun dungsip lam hnakin hmai nor ding lam an zirh aw tam in ka thei. Australia ram tla cu dungsip hrimhrim kan thiam lo hmailam zoh ih feh pawl kan si tiin an ram hrangih ramsa sunglawi bikah dungtolh thiam lo kangkaroo an hril suak. Asinan a thupizet mi thil theih ding cun a thupi lemlo mi dungsip ih thupitnak te khal theih a rak tuul a si.  Curuangah ka ruah theu mi cu, tui dung tolh ih tolh duh lo pawl, dung sip ih sip duh lo remrem pawl hi ni khat nini ahcun an sirawknak van a dawng ko ding tin ka ruat. San a thlengaw, hlan ahcun dungtolh le sip lo pawl kha uar ah kan ruat, tu ahcun dungsip thiam pawlin nehnak a phunphun an co ti kan theih a cu ngaingai zo.

 Midang in ruahnak dangdang le hmuhnak dangdang an thlun thiam lai ah kan ruahnak tipi ral kaan lo thupi lengleng ih kan ret hrih asi ahcun hlapi le reipi cu kan feh thei lo ding. 

Anetnak ah ziangvek thu khalah upa le mino pawl kan zaten, ziangkim kan tuahnak ah tuanpi pawl thawn thuhla hmu aw thiam in, a tuul daan ih dungsip thiam, a tuul daan ih hmai nor thiam dingah ruahnak nei in, kau zetih hnatuan dingah kan san in a pe thlang a si. Kan ruahnak lawnglawng thupi zetih kan ret nak ihsin dung sip men hman a tawk nawn lo kan fehsan rori a tuul thlang. Midang in ruahnak dangdang le hmuhnak dangdang an thlun thiam lai ah kan ruahnak tipi ral kaan lo thupi lengleng ih kan ret hrih asi ahcun hlapi le reipi cu kan feh thei lo ding. Hivek ruangah ramleng le ramsung ih kan pawlkom tampi a siat phah ti tiangin ka ruat. Dung sip lawk hi kan sung tinak a si lo. Nehnak sangka sawn a si. Hlapi tiang thleng ding ih thal kan sai ding cun napin kan nawp cu a tuul rori. Vanzam khal sangpi le cakzet ih a zam thei nak dingah cahnak thazang la in a tlan lawk a tul a si.

(Visited 289 times, 1 visits today)

Comments

comments

One Comment

  1. Thazaang ka ngahzet. A ziangtinkim ih thangso/hmasawn theinak dingah dungsiip deuh a tul caan tampi um ngai… a thar rori in ka mang suak saal… thatuk

Comments

%d bloggers like this: