Duhthusam Fala

       Duhthusam Fala

A mithmai le a ruangrai hleihluak zia cu a hmu lotu hnenah ziang tin so ka sim thei ding… Ka veikhat hmuhnak asinan, tuar dam thei lo ding khawp in hmasi ka thinlungah i ret ih, cui mawinak hmuahhmuah thawn khat mi ka duh hleice cu hmu thei sal dingah ka can lawng hmuahhmuah khal ka hmang.

Ka duh ti men khal in a sim fiang thei zik lo, a mawi men khal asilo, a duhnung in mi huatthu rel thiam ding khal a bang lo, a hmutu hmuahhmuah khal ih veikhat lawng an zoh dah lo ding ti cu ka rel ngam a si. Kan tawnawk dan khal a mak in a danglam, training nei dingin Japanih an Hotel pi ahcun kawh in ka um ih, cu mi ni ihsin tuini tiang ah ka mit ka sin tin ten ka hmu lai.. 

Trainingnak ding ni kan thlen cun, keikhal ka neih sun hnipuan mawimawi thawn thuamaw in, thlalang hmaiah rei tawkfang cu ka bihaw ta ih, cuisin mawtaw ka hman dingih in ti mi thawn Concord Hotel lam pan cun ka hei mawngaw phei veih, lamzin tluanih an phah mi hrampi hring depdep pawl zoh phahin, cuini ahcun ka thinlung sangka king tu ding le ka thinlung ihsin ret hloh thei lo ding mi ka tawng ding ti khal cu ka ruat aw lo!!!!!!!! Sangka zawn ka thlen cun ka mawtaw ka din terih, cuisin mawtaw rettu pawl hnen ahcun ka tawh cu ka aap. Sangka kiltu in sangka in vun onsak ciah maw tiah… “I am very Sorry” tiphah in ka bag khai i rawn titlak ruangih ngaithiam dil phah aw cu ka vun thei, mipa aw hnakih nunau aw ngaina, kei vek tlangval hrang ahcun cui aw suahnak lam cuka hawi lo thei lo … ‘Ka rei, ka mit ka thep thei tum nawn ual lo… Singil maw si??? Ziang ti lamlam so, hi minung umnak leitlun ah cuvek Singil cu a rung um thiam???’ Sangka kiltu in, “Sir” ti phah ih ka bag i run pek cun … E khai a, ka rak mualpho zik a si lo sawm??? tiin insung lam ahcun ka lut phei ve. 

Kan Trainingnak can cu a hung thleng ih, tonak ding zawnih ka hmin an ngannak ahcun ka va to ve ih, hramthoknak kan neih hnu ah, Australia pawl in zirhnak hmaisabik cu in hun zirh, cuisin ram dangdang pawl khal in in zirh haiih, tawkfang kan to hnu ahcun suncaw ei a cuu thlangih, rawl thawthaw an retnak hmun lam pan in kan phei hai. Ka rawl ei ding mi ka lak theh cun tonak lam ka pan ih, ka to fel man hlanah, “Na kiangih to rem na ti ahcun ka lungawi zet ding” tiin ka dunglam ihsin aw a rung suak ih, ka hawi cu … ka singil kha a rak si!!!

Comments

comments

Comments

%d bloggers like this: