Duhthu Samah Sam Luat Ti A Um Lo

Duhthu samah sam luat ti a um lo (a luantuk ti a um lo)

Kan Laitlang hi ziangtluk ih tha le mawi ha? Lungman khung thatha pawl Minhla khawlu muitaungih Kahpathir, Pamuanchawng khawlu ih thir phunphun, Lungpi khawlu in Sunthla khaw lu tiang a phah aw mi (Bi-Lat-Me), Tthung,Lungto pawl le Bawi Nu va Ih Diamond an ti pawl (ka nauhaklai thu theih) rel tel lo in, Laitlang mawinak Falam pengih um vial hman hi Pathian in hmanrua ih in hmansak ahcun, kan ei cawk lo sum lut nak a si tin ka hmu.

Kan lung lennak, lentlangtluan khi sum le pai lut nakah cang thluh sehla, Falam ihsin Leng le val an nawmnak Falam phunhra tlawng ta hmuahhmuah lut lo ih phunhra ong le lai khawte lam khal tlunsan mai thei lo ih an feh le thlah awk theu nak Lungpi lungkua (lungpikua) le zawngto tlang pal in Kattaza lamzin tuah zerzer in Thlanrawn le Tal khualu tlang tluan in Zamual khaw lu tlangah, Laihna ti li lam va kel ta in, khua hlanih kan mithi thlarua feh nakih an ngai nak tlang hminthang Zinghmuh tlang kainak ah lamzin hi tuah thluh seh la, Cun rih lam pan dingin, Kan thuanthu roling Hawn Dawh Thang tlang tluan ihsin Kuangte ti ah, Aikawn tlangah Ui kiu tlangtluan in Muship tlang Mi hlim pawl ih damnak tlang an ti mi thluan hrut phei in, phunte khawlu lamah Phei zerzer in Kattaza lam zin in suak thluh sehla cun, Buannel ramdai lungdumtu a hmuzo tu pauhpauh in feh ve lo cu lenlai can tlukih an ngainak hmun kha pal tir phahin, kan tili hminthang Rihli ah lut sehla suk le so um riai lo in kan laitlang falam peng nuamnak kan hmu thluh thei ding.

Ramdang mi khualtlawng (tourist) tampi thlengthei dingin le zohthlak lawlaw dingin, a kar lakih tlang le hmunnuam hmingthang thuanthu nei hmuahhmuah hi colhnak hmunnuamah tuahin zil thlithiang te dawnnakah Inn  mawi tete thawn um tir thluh sehla, mikhual vakvei umnak dingah ti’n Hotel mawi tak tete sak sehla, sumlaknak ah a cang phah ding fawn, cu le a tlangtluanih tuupi pawl ah khin kan inzuat sum hnam le vulh loram ih ramsa phunkim tual len duhnak, tlang le tuupile lenphul pawlah khin ramsa hmuan le Parpar hmuan (National Park) tla hun nei ve sehla maw! a karlak ah khin hmun hminnei (hminthang) pakhat ih sin pakhat lutnak dingah lutman a um vivo kei cun Rihli pi ahkhin lawngmawi te phunphun le Nuamcennak Innpi thlung le dar thawn, Kohhran tin Picnic ih Pathian Biak khawmnak ding Inn pi khan tamtak in sak sehla , Ai ka rai! Paisa, Dollar tiang in, a lut natsat ding zia hi Singapore ti kulh pakhat te a lei ram ih ziang suak lo hmanin khitin an cangkan ah cun kan ni ram hi cu ticawk lo sum le pai lutnak ding ram duhnung te a si hi maw!

Falam peng lawng hin Laitlang pum cawm theinak khawp a rahsuak thei ko ding e. Bawipa in ti nuam zet ih nan um le ka thu nan awi le hi ramih thilsuak nan ei ding a ti kha (Isai. 1:19). Lai tlangah ziang hman a suak lo ziangha kan ei ke kan mahte kan din le ti tu pawl cu Sersiam tu Pathian ih a sersiam mi nautat le Rinnak nei lo vekah ka ruat hai. Lairam kan todelh awkdan ding hi Pathian pek cia ram a hmandan kan thiamdan ih zirin ei cawk lo suaknak ding ramnuam ramtha a si. Hi ka duh thusam hi Bawipan kan mit min laiah ti kim hramsehla maw!

Duhthusamah sam luan a um lo (kan pupa tong)

Rev. Amos Thang

Comments

comments

One Comment

  1. Huiva lenthiam says:

    A va tha ve

Comments

%d bloggers like this: