Duhhril theimi lak ihsin

Duhhril Theimi Lak Ihsin

Siar:

2 Siangpahrang 5:1-3, 9-15 

Atu cun Israel ram ih Pathian siar lo leilung tlun khui tawk hmanah Pathian dang a um lo, ti ka thei zo.

– 2 Siang. 5:15

 Kumkhat Sung Baibal: 

  – Daniel 4-6

 –           Thufim 18:1-12 

Naaman cu hlanlai ih Syria raalkap hotu bawi a si vekin an siangpahrang in a uarzet, a upatzet, huham tla a neizet. Harhdamnak siar lo cu tlaksammi a nei lo. Pharnat a nei  ngelcel (2Siang 5:1-3).           

Asinan an salnu falanu te cu hril ding le huham zianghman a nei lo. Raalkap pawl ih sal kaihmi nunsung sal simen ding a si (c. 2). Asinan amah cu riahsia le thinhar ih ummen ding a siang aw lo. Abawipa hrangah thil tthabik tuahsak a duh.
           
Hih salnu te cun a pu ih pharnat cu Pathian ih hremnak ti’n a hmu lo ih Samaria ram ih Profet khihhmuh ding caan remcaang ah a ruat (c. 3). A duhsaknak in  Naaman cu damnak a ngahter. Naaman in hiti’n thu a than, “Atu cun Israel ram ih Pathian siar lo leilung tlun khuitawk hmanah Pathian dang a um lo ti ka thei zo” a ti (c. 15).
           
Tuih san ah mi tampi cu duhhril ding tampi an nei. Asinan midang cun farahnak, harhdam lonak, kiangkap hnaihnoknak ruangah an duhmi hril thiam loin an um. Harsatnak a rak thlen tikah an duhhril mi pawl a hlo ttheh.
           
Asinan hril ding pakhat te cu a taanglai ringring. Naaman ih salnu te vekin, Pathian hnattuan ding le midang pawl khihhmuh ding cu  ziangvek dinhmun kan thlen hmanah kan hril thei lai a si.

 

Ka thih hmanah himi hi ka hril ding,

Ka nung saal nawn lo hmanah;

Ka lalnak tokham  peek ka duh,

Amah in, i hnuk in i hruai seh. 

Thil harsa kan tonmi in Pathian rinsannak caan ttha in pek.

Comments

comments

Comments

%d bloggers like this: