Duhdawtnak Tumbik

Duhdawtnak Tumbik

Siar:

John 15:9-17

Mi pakhat in a rualpi pawl hrangah duhdawtnak tumbik a neihmi cu
an hrangah a nunnak pek hi a si. – John 15:13

Kumkhat Sung Baibal:

Ezekiel 34:36

Thufim 15:12-21

Australia ram ih Melbourne khuapi cu ram hrangih nun a liamtu pawl sunloihnak le hngilh lonak hrangah dinmi khua a si. Leitlun Raalpi A veikhatnak (WWI) hnu ah dinmi a si ih cuih hnulam ih rampi hrang a ttuantu pawl upat sunloihnak khal ah an hmang.

Khuapi mawi pakhat a si ih raaltthatnak le pumpeknak theihternak hrangah an sakmi innpi sungih lungto parah, “Zohman ih neih lomi duhdawtnak” tiah an ngan. Kumtinte, thla 11 thla (November) ni 11 ni zinglam nazi 11 ah “Duhdawtnak” timi cafang parah thlalang pakhat ihsin nitleu an run kapter. Ram hrangih nun a rak petu pawl hrang ahcun hmual neizetmi a si.

Zalennak hrangih man a rak petu pawl hngilh lo ding cu a thupi in a sunglawizet. Lungto parih canganmi in sullam kaupi a nei. Jesuh in leitlun sualnak hrangah Thinglamtah (Cross) parih a thih ding zaan ah A ttongtaami a si (John 15:13). A thihnak thu cu leilungtlun uk awknak ih thuneihnak ihsin luatnak dingah si loin sualnak ruangih cawhkuan ding ihsin luatnak hrangah a si. A thihnak cu nuntu khuasak daan semrem deuhmi in pek dingah si loin kumkhua nunnak pek dingah a si.
Ram hrangih nunnak a petu pawl hngilh lo ding hi a thupizet ko nain a thi cuahcomi kan leilungpi hrangih thitu Jesuh Khrih sunloih le thangtthat ding hi hngilh hlah uhsi! Thungaite’n kan ti ahcun, hi hnak ih tumsawn duhdawtnak dang a um lo.

Khrih ih in duhdawtnak hnakin tum sawn duhdawtnak a um lo,

Lei ah a rung ttum, milai ah a rung cang;

A thihnak in rundamnak in tuah sak,

Duhdawtnak tumsawn dang a um nawn lo.

Jesuh ih Thinglamtah (Cross) cu Pathian ih duhdawtnak fiangtertu tumbik a si.

Comments

comments

Comments

%d bloggers like this: