Duhdawtnak: Sersuaktu Thazang Pakhat

Šianglianuk Ķianghrol

Na thlennak tinkim ah duhdawtnak zemdarh aw; a hmaisabik ah na innsang ah. Na fanau pawl, na nupi lole na pasal, na venghnen pawl hnenah na duhdawtnak pe aw. Na hnenih ratu hmuahhmuah kha ttha sawn le lungawi sawn lo cun suahter sal hlah. Na hmel, na mit, na hnih-no, na mi hmuah dan tinkim ah zangfah lainatnak nei in, Pathian ih zangfah lainatnak langtertu nung va si aw. (Mother Teresa)

College pakhat ih professor in zatlanphung (sociology) zirtu a tlawngta pawl kha Baltimore khawmpi veng dengkawr (slum) ih um mi mipa nauhak 200 ih nun dinhmun hliakhlai ding in a hruai. Tlawngta pawl kha nauhak pakhat cio ih hmailam nun ding an hmuh dan a nganter. Tlawngta pawl cun nauhak pakhat cio ih hmailam can thuhla ah “Canvo a ngah lo” timi hlir an ngan.

A lehhnu kum 25 a rei tikah zatlanphung professor dang pakhat a ra thleng. A hmaisa ih an rak zirhliahnak kha a run zohfel sal. Curuangah a tlawngta pawl kha cumi nauhak pawl ziangvek dinhmun an thleng timi a hliakhlaiter hai. Cumi nauhak pawl lakah hmun dang ih tthawn le a thi minung 20 siar lo ahcun, a tang lai mi minung 180 sungih 176 cu danthiam, sibawi le ttuanrian neitu dinhmun ah an ding ih, mi zanran hnak in an hlawhtling ti an hmu suak.

Professor cu a mang a bang tuk ih, zirhliah peh vivo ding in thutluknak a tuah.

Vantthat thlak zet in cui’ minung pawl cu cutawk hmun kiangkap ah an um thluh lai. Curuangah pakhat tete’n a va tong ih “Ziangtin hivek hlawhtlinnak na ngah?” tiah a va sut hai. An zate’n an sonnak cu a bangrep thluh: “Zirhtu ka rak nei,” timi hlir a si.

An zirhtunu khal cu a dam lai. Tar thlang hman sehla mi harhvang zet lai a si mi an zirhtunu cu a va hawl hmu. Cutikah, “Khami nauhak pawl kha hlawhtlinnak ngah thei ding in ziangvek dawi kalhmang thawn na rak somdawl?” tiah a va sut.

Zirhtunu ih mit an hung tleu ih, a hmur ah hnih-no nem zet pakhat a hung lang. Cu thluh in, “Thil tluangtlam te a si ko. Khami nauhak pawl kha ka duhdawt si lawm,” tiah a sawn.

#Chicken Soup for the Teenage Soul ih Eric Butterworth ngan mi “Love: The One Creative Force” leh mi a si.

Comments

comments

Comments

%d bloggers like this: