Duhdawtnak Ruangah India Ihsin Europe Tiang Cycle Totu – Mr Mahanandia

_87678208_edited1

PK Mahanandia le Charlotte Von Schedvin

Salai V Bawi Lian

Duhdawtnak ruangah India ihsin Europe ram tiang Mahanandia cun a duhdawt mi ton dingah cycle thawn roriin a feh. Duhdawtnak ruangah ramhla ih dan mi khal tumtahnak thawn a rak pah tlang thei a si hi!

_87678235_e5d2ae6c-326c-4be1-acbd-61f45b57a3cfIndia ih phun nauta tiih an hmuhsuam mi le an zoh niam mi Dalit miphun lak ihsi kutzungthiam, minung lem nganzuk thiam PK Mahanandia cun 1975 kum, December thla, thlatang khawsik lai caan hrawngah Charlotte Von Schedvin cu a hmaisabiknak hrang a rak tong. An rak tonawk hmaisabiknak ah Charlotte Van Schedvin cun a hmailem zuk, nganzuk sak dingin a rak fial.

Hi an tonawk hmaisabiknak hmun hi, Connaught Place timi; tu ahcun leihnuai bazar ah an tuah zonak, New Delhi laili a luun zetnak hmun veng pakhatah a rak si. Von Schedvin hi India ah khualleng pakhat dinhmun ih tlawngvak in a rak leng. Mahanandia hi kutzungthiam; minung zuklem nganzuk thiam a rak siih minute 10 sungah a ngan zuk thei tiin a rak lar zet. Cutik ah hi nu khal cun a zuk ngan ter dingin a rak fial ve mi a si.

_87678210_scan0005A veikhatnak a rak nganzuknak ah Von Schedvin ih lungkim ding ko tiang a hmaizuk cu a rak ngansak theilo. Asinan a thaisun ah zukngansak dingin a ra lala. Khuanui remruat cu a rak siko ding!! Cutiih a lungkim theilonak cu an pahnih hrang thuanthu thar ah cangin an nun zalam tluan ih thuanthu thar cu an ngan thok.

Mahanandia hi India ramthen Orissa ih suak a siih phunhnam nau tiih an nautat zetmi an si ruangah an nauhak ih tlawng an kai nakah hmuhsuamnak nasazet an rak tuar. A nu in mi dang pawl ih an zawmtaihnak le an zohniamnak pawl cu a rak hnem theu. A suah caan, ne le thla pawl cu kuttial zohnak in hitin a rak hnem theu. Ni, nikhat ah ramdang ihsi a ra mi fala, awnmawi thiam thawn nan nei aw leh ding ih cumi ihsin na van thatnak a thok leh ding. Cu nui’ suah ni ih hminsin thla cu Taurus a si ding ih an mahte in ram kaupi neimi an si ding tiin a rak ti theu.

_87678233_9fcd88e6-33fb-44dd-9c01-491398b340b7Mahanandia cun Ms Von Schedvin a ton veten a nu ih a rak sim mi cu a vun mang dukdi cih. Cu tiih a zuk ngansak mi a lungkim lo mi cu a mah le mah hmintisiat ding phang ah lakphak in ding ah a sawm. An thuhla an vun sim awk tikah, Von Schedvin cun Swedish ram ah lo tuumpi an neiih a mah khal awnmawi thiammi (piano) a rak si thu le a suah thla khal Taurus a si thu a rak sim.

Vei khat kan tonawknak ihsin ka thinlung ah biahthliten hinu hi a si tiin thu te hla simtu ka nei tiin Mr Mahannandia in BBC pawl ih an thuhla an rak suhnak a rak sim dah hngehnge. ‘Ziang ruangah lakphak in ding ka sawm ngam ti khal ka thei thiam lo. A duh lo ding rori ah ka rak ruat. Sinan ka ruahnak vek silo lam in in rak let ta riai.’ tiin a ti.

Lakphak an inn thluh hnu ih an titinak ihsin Orissa tlawng dingih a sawmnak cu a rak cohlang ve. An pahnih ih an khual tlawnnak ahcun an rak duhdawt aw ngah ih cutin an khua lam khalah ni rei lote caam in New Delhi lamah an kir sal. Mipa lam ih nu le pa thlawsuahnak thawn kutsihnak tla an nei.

Hi lai san ih khualtlawn hi a rak ollo zet. Ms Von Schedvin hin Delhi thleng dingin, Europe, Turkey, Iran, Afghanistan le Pakistan pawl an rak tan ih, ni 22 sung rori an rak rei. Hmun dangdang ih um ti cu an thenawk a rak tul ih Ms Von khal cun an khua Swedish ram Boras ahcun a rak kir. Kumkhat sung lenglo cu cakuat in an rak pehtlaih aw.

Mahanandia hi harsafa a si ruangah vanzam ticke a rak lei thei lo. Curuangah a thil neih mi hmuahhmuah a zuar thluh ih cycle pakhat a lei ih a duhdawt mi a nupi tong dingin a tiimlaam thok. Tlangleng lampi cu zawh in a khualtlawn cu a thok. January 22, 1977 ni in a feh thok. Hi lai caan ahcun Afghanistan ram rak fehtlang khal a har lo zet ih ram khat hnu ram khat rak feh khal thil har ciamco a rak silo. Visa khal a rak tul ciamco lo.

Ni khat ah peng 44 a feh. A thlennak kip ah a kutzungthiam mi thawn mi dangdang ih zuklem cu a ngan vivo phah ih cutin a ei in ding a tumcop aw vivo. A fehnak tluan ah a cycle ke khal a pop, a ke khal a thling. Asinan a duhdawtmi tong ding le a tum ram thlen ding ih a tumtahnak cu tumruh zet in a dungkir san men lo.

_87678255_57190bd1-dc9d-4930-b9f3-e9b691956d51A netnak ahcun Europe ram cu May 28, 1977 ah a thleng ta riai. Istanbul a thleng ih cutin Vienna ihsin tlangleng thawn Gothenburg lam pan cun a feh. Nunphung dangdang karlak ah harsatnak nasa zet a tuar nan a netnak ahcun a nupi Ms Von Schedvin thawn acozah theihpinak in kutsihnak an rak nei thei.  Sweden a thlen hnu khalah a kutzungthiam cu cawlhsan loin a peh vivo.

Tu ah kum 64 mi siin Sweden ah an tu le fa thawn an khuasa. ‘Tui ni tiang ka tulsamnak tinkim ah in bawm ringring. 1975 kum ih ka rak duhdawtnak vekin tui ni tiang khal ka duhdawt hrih lai tiin Mahanandia cun a sim hngehnge.

Mahanandia cun, mi tampi in Europe tiang cycle to ding hi harsatuk ah ruat in theithiam lo tu tla tampi an um. Ngaingai te ti ahcun ka tuah ding mi ka tuah menmen a si ko. Sumpai ka neilo, ka duhdawt mi ka ton le a tul. Cycle ka tonak san cu duhdawtnak ruangah a si, asinan thungai ti ahcun cycle to cu ka paih lamlam lo. Duhdawtnak ruangah a si.’ tiin a thuhla suhhlamtu pawl hnenah a mah roriin a sim.#

NB: ‘The man who cycled from India to Europe for love’ BBC ih ngan mi a remcang dan ih let mi a si.

(Visited 711 times, 1 visits today)

Comments

comments

Comments

%d bloggers like this: