Duhdawtnak, Rinnak le Ruahsannak

Duhdawtnak, Rinnak le Ruahsannak

Bible Cang: 1Kor. 13:13; 1Sam.18:1-5; 2Sam.15:21; 2Sam.19:24

Timothy Eng

Tuisun ni hi Yangon ih um kan Laimi unau za tawnkhawmnak ni a si hruangah a hleicein kan hrang ni sunglawi a si.  Hotupawlin thusimnak can in pek ruangah ka lungawi.

Tuisunih ka thusim ding cu Bible Hlun sanlaiih Pathian mifelpawlih nunnak thawn thazang ka lo pe duh.  Cuipawl cu Jonathan, Ittai le Miphebosheth tla an si.  Hipawl hmuahhmuah in Kristian nun an hmuhsak thluh, Kristianpawlih Duhdawtnak, Rinnak le Ruahsannak an hmuhsak thu rak ngai tlang uhsi.

Bible sungih hawipi thabik thu kan hmuh mi cu Jonathan le David an si.  Leitlunah an pahnih ai rualtha thu pakhat hman kan hmu nawn lo.  U le nau, sung le khat hnak khalin an duhdaw aw sawn.  An lakah thihnak lo cun zo hman a then theitu an um lo.  Jonathan cun Tuukhaltu David cu a hmuh veten a thinlung zaten a duhdawt.  Curuangah a siangpahrang fapa sinak tiang a pe thluh hngal. Baptistu John in ” Kei cu tumsuk vivo ding ka si, Anih cu kaisang vivo ding a si” tiah John 3:30 sungih a ti vek rori a si.  Siangpahrangpawlih hruk mi angki, taikhap le hnipuan, hrihrual le rangleng tiang a pe thluh hngal. A kaa lawngin ka lo duhdawt a ti lo, a duhdawtzia cu a langtir hngal.  Ziangtlukin a duhdawt tile veikhat cu a pa Saul in David cu a lo theih loih thah a tumtikah David cu a lungphang tuk zo, curuangah Jonathan hnen a feh ih ziangruangah na pa in thah i tum tiah Jonathan mawhthluk nawnin a sut.  Cutikah Jonathan cun “ziangtiti si na duh, i sim aw, na duh vek rori in ka tuah ding” tiah a ti.  A sim duh mi cu na pa va that aw a ti khal le that ding rori in a pe aw hngal tinak a si.  Cutluk lawmmamin a duhdawt a si.  Tuini ah kannih Laimi unaupawl tla kan duhdawt awknak hi kanmai neih mi thil le ri pe suak rori ih duhdawtnak a si a thupi.  Kaa lawngih duhdawtnak cu zumlotupawl ta a si.  Hitawkah a hleicein David cun Jesu Krih a hmuhsak, cun Jonathan cun Kristian a hmuhsak.  Kristianpawlin kan Bawipa Jesu Krih kan duhdawtnak cu Jonathan vek rori a si ding a si.  Anih cu kaisang vivo ding a si ih, kannih cu tumsuk vivo ding kan si.  Amai hminglawng thangsinsin ko seh.

Ittai.  Ittai hi Filistine hnam a si.  David in Goliat a thah lai theifiangtu, Gentel hnam lakih Pathian nung zumtu a si.  Curuangah Ittai hin Krisktianpawlih Rinnak a hmuhsak.  A rinnak ruangah Filistine hnam si hmansehla David in a ralkap bawi ah a tuah, a rinsan zet mi ralbawi a si.  A rinnak hi ziangtin kan hmu tile veikhat cu David Fapa Absolom in a pa David thah a tum laiah David cu tlan ding a si.  Cutikah David cun Ittai nang cu mizanih ra na si, hnam dang mi na si, kirsal aw, ziangahtile kei cu tu hmunhla pi ah ka tlan tlang ding, ka thi ding maw ka thei lo.  In thlun asile lamlakah tla na thi men thei tiah a ti.  Asinan Ittai cu David hnenah Pathian a um ti a theih ruangah, lo thlun i siang ko aw, a pawi lo, na thihnakah ka thi ve ding, ka pum ka pe aw a si tiah a nunnak hmuah cu David hnen a ap ngam.  Hi tluk lawmamih a zumnak cu David in a hmuh tikah a mang  a bang.  Curuangah asile tiah thlun a siang.  Ittai ih rinnak hi leitlun thilah a si lo ti kan hmu thei.  A bawipa cu mi hmuahhmuah in an relsiat laiah, thah an tum laiah, a dungthluntu le a fapa rori khalin thah an tum laiah phatsan loin a bawipa David thawn ningzahnak hmuahhmuah a tuar a si.  Tuiniah Pathian thu ah siseh, kan miphun thu khalah siseh hitivekih rinnak le rinumnak cu kan nuncilh ding mi a si.

Mipheboseth.  Amah hi Saul ih fapa asinan David in thaten a rak zoh mi a si.  Mipheboseth hin Kristianpawlih ruahsannak a hmuhsak.  Absolom in David cu thah a tumlaiah, vanduai tlak takin Mipheboseth cu a thlun thei lo.  A ke pahnih feh thei lo a si ruangah a sal pawlin an tlansan, cubakah David hnenah zual an rak ko.  David hramlakih a tlan sung hmuahhmuah Mipheboseth cun a pu David lawnglawng a ngai.  Nitin David thu lawnglawng a ruat, ziangtikah a ra tlungpei maw ? him le dam ten a ra tlungsal pei maw ? tiih a ruahnakah tidai khal a bual dah lo, a sam khal a met lo.  Cutin David a ngainatzia a langtir.  David cu himten a ra tlunsal tikah Mipheboseth, hitlukin ka lo zoh tha ih ziangah i zahpi tiah a thinheng.  Asinan Mipheboseth cun ziangtlukin a duhdawt ti thu a sim.  Ka bawipa hi himten, damten a ra tlung sal pei maw ? tiah nitin ka lo cuan, nang cu vancung mi vekih mifim nasi, thaten in ruatsak ko aw tiah a ti.  Miphiboseth vekin tuini kannih Kristianpawl tla hi kan Bawipa Jesu Krih cu ziangtikah a ra tumsal ding, ziangtikah in ra lawr ding tiah ruat ringringih nung ding kan si.

Jonathan vekin kan Bawipa Jesu Krih hnenah duhdawtnak zatekih neitu, Ittai vekin Bawipa Jesu Krih zahpi loih Amahah rinnak thukzet a neitu le Miphiboseth vekih nitin kan Bawipa Jesu Krih ih ratsalnak ruattu kan si theinak dingah Pathian in kan zate hrang thlawsuahnak in pe hramseh.

Amen.

Comments

comments

Comments

%d bloggers like this: