Duhdawtnak Mitthli

Duhdawtnak Mitthli

Ka rak thei nan ka rak zum lo
Zum ka tum lo ka ngaisang lo
An sim Online duhdawtnak thu
Nang ka lo ton hlan tiang cu!

Online hring kerkiten nang ka ton zaan
Thinlung ruahnak a danglam thluh
Thunuam relin kan titi tlang
Rualpi ttha tiin kan rak kom aw.

Ni thla kan siar rualpi ihsin
Duhdawtnak hri’n in rak zeel ta!
Duhdawtnak ah mit caw an ti
Kan tongaw maw mit caw le caw.

Online hring loih na thim caanah,
Thinphang zetin khurkhua ka ruat
Na dam lo ding ka thla a vai.

Online ihsin phone line kan ti
Kan biakawk zaan lungtur a rang
Zaan it thei lo’n ka hnathlam ah
A thang camcin na awka neem.

Hnamdang pawlih an uar zetmi
‘Blind date’ ai rin a tlak sawn
Online duhdawtnak teptuih hrangah
Tha thlah loin kaihbet kan tum.

Hmel hmu aw lo kan si ce lo
Santhar thiamnak VZO thawn
Kan zoh awk zaan mitthlam ihsin
A kiang theilo na hmaipan te.

Kum kan siar hnu’n thuh theihlo mi
Kan duhdawtnak lenrual lak le
Sungkhat unau kan theihter caan
Mitthli a for duhdawtnak ruangah.

Online duhnak a theifiangtu
Nang le kei hrang tuar a na hlei
Ti cat an tum kan duhnak hri
Mitthli thawin hmai kan phiah caan……..

Kan tonawk ding hngakhlap zetin
Ruunkhat par tlanh ruahsannak thawn
Kaihhnget tumin duhdawtnak hri
Hmanseh nang cun ti cat na tum!

Online ihsin kan rak thei aw
Online ihsin tthenawk ding cu!
Ruat ngam loin a luang camcin
Duhdawtnak ruangih kan mitthli cu!

Nikhat ni ah lungawinak mitthli
A cang leh leh ding ruahsannak thawn
Luang hrih ko seh kaihnget ko ning
Nahrang ka si ti lungput thawn…..

Hnawiza hnuuk cing’n hmai kan nor ding
Kan tiam awknak pelhsolh lo ding
Khuanui’ hnenah ka ngen tlaitluan
A luangmi duhdawtnak mitthli thawn……

Hms: Online duhdawtnak a teptu pawlih au-aw lawrkhawm ih nganmi a si.

By – Mai Dai Dim

Comments

comments

Comments

%d bloggers like this: