Duhdawtnak in Thlengh

April 13
Tlawngkai Ninga

Duhdawtnak in Thlengh

Maw Pathian, ka lo pekmi thawinak cu a kekkuaimi thinlung a si. A kekkuaimi le suarsir thinlung cu na hnong lo ding.
– Saam 51:17

Bible Siar Ding: Saam 51:1-17

Khrih sungih titer hramhramnak huham in A duhdawtnak cu leitlun ih thil ziangvek thawn khal an bang awk lo zia a lo theihter ding. Ca Thianghlim in cuih duhdawtnak cu “thinlung takteih duhdawtnak (sincere love)” ti’n a ko (1 Pet. 1:22). Himi in sullam thukzet a nei. Khrih huham ih kaihmi na si ruangah nangmai’ duhnak na el-awknak a si. Misual na si hrih cingin Khrih in a lo duhdawt (Rom 5:8) ih na duhdawt ding a lo dil ve. A duhdawtnak cem ni nei lo cun na dinhmun cu sunlawinak ah a lo thlengh sak. Jesuh cu Siangpahrang ih Siangpahrang, le Bawi hmuahhmuah ih Bawi a si ih a uknak cu cem ni a nei lo (Luke 1:33). Bawipa in, “A tuar ding cu keimai’ duhnak a si; a thihnak cu ngaidamnak a thlentertu thawinak a si. Cuticun a tefasin pawl a hmu ding; kum reipi a nungdam dingih amah sungin ka tumtahmi cu a kim ding,” a ti (Isa. 53:10).

Duhdawtmi unau, ziangtluk in so a sunlawi, Khrih duhdawtnak kan neih hi! Amah vek zohman an um lo timi theihter ka lo duh. Tuni ah Amah zoh aw, maw bawmtu nei lo pawl, na nunnak a thlengh aw ding. A huham na sungah a cangvai dingih na thlengh aw ding. Misual pawl ih Pathian, bawmtu nei lo pawl ih Pathian, zaangfahnak ih khat Pathian a si. “Keimah cu na pu le na pa ih Pathian ka si” a timi hi ka duhzet (Suah 3:6). Abraham ih Pathian, Isaac ih Pathian, Jacob ih Pathian a si ih mi hmuahhmuah ih Pathian, kan Pathian a si. Jacob a ton vekin nangmah lo tong duhtu Pathian a si.

Jacob cu mibum hmang pa a rak si. A u Esau ih fa upa sinak ro a bum (Seem 25:29-34). A pu Laban ih rannung co dingin khal a bum (Seem 30:25-43). Khuavang in Jacob cu a hmang; asinan Pathian cu thangtthat in um seh! Ziangahtile Jacob in theih fiangmi thil pakhat a nei: Pathian in a thukammi a famkimter ti a thei. Bethel ah Jacob in van le lei pehtlaitu kaililawn a hmu – ih vancungmi pawl an ttum an kai a hmu (Seem 28:12). Bethel cu thlacamnak hmun a si, dinhmun thlengh awknak le van kainak hmun a si. Pathian in Jacob cu cuih hmun ah a hruai saal, mi vakvaimi a si ko nain. Pathian ih umpinak le thluasuah ngah dingin zaan ih khawvar Pathian a buan.

Pathian in Jacob a tongtham tikah tthatnak nei lo a si zia a thei aw. Vancungmi in i thlah aw a ti tikah Jacob in, “Thluasuah i peklai hlan lo ka lo thlah lo ding,” a ti (Seem 32:26). Thinlung kekkuai ih aunak aw cu Pathain in a theih sak ringring.

Thinlung kekkuai le bawmtu nei lo na si ahcun Bawipa na tong ngah ding.

@ Smith Wigglesworth

(Visited 23 times, 1 visits today)

Comments

comments

Comments

%d bloggers like this: