Dr, Za Hlei Thang, Dr, No Than Kap, Dr, Hre Kio, Fakselnak

Dr, Za Hlei Thang leh CNF.
Dr, No Than Kap leh Chin tlangttong.
Dr, Hre Kio leh CCOC voi 2 nak.

Ttottum thlipi huuk khalin kianzai relni a nei. hithu pawlin kan Chin mipi thinlung leh tlangcabawm a luahkhat laikha a varak tam serser ve aw Saudi Arabia ram Najran nelrawn rampi ih  vunnel lei thatiak teh khahnak in tamcuangce tak kawmaw?

Pathian camsiat mi leitlun ih kanlen sungah mifamkim hi zo umtak kungmaw?  Kan sualnakcu Kalvari tlangih Bawizisu hnaksungih si thisen tivapi luangcun a tlengfai nan  leitlun kan umsungih famkimlo nak cu famkim nak lamzin ih helnak a um cuang tasilo. hi kan mirinsan mi kan upa pawl khalhi leitlun Politics leh Pathian thu lamih kan Chin ram leh mipi in kaihruaitubik leh kan rinsan mibik pawl an siih, kan Chin mi lakah cun cungcuang kutzung siarlakih tel an si. kan Chin miphun  hrangah  harsat nak phun zakip raktuar tu leh mangbangnak tlangza tamtak raklawnliam tu an siih, ram leh miphun hrangih thiltha rotling tamzet siarcawklo an rak bunsuakmi a um laiah  mipi hrekkhatih duhtlinglo lamzin an rakzawhsualmi thilpawlkhal thuhruk hlosak mentheih a si cuanglo ruangah keimah bulpakih ka hmuhdan runthailang hnik sehla Upa kamkau kan tongpang a sikhal le ka hmuhdaan leh ka ruahdaan a si tak famsi.

Thiltha an tuahmi parah cawimawi leh fak kanthiam a tul hrimhrimih an covo khal a siih, thil diklo an tuahmi kan hmuh leh kan theihmi ah  kan sawisel ngamkhal a ttulfawn an ttongkam khathi mipi in hnathongih kan ngaithlak mi leh thil pakhat an tuah mihi mipi in mitngau ih kan zomi upa rinsan mi an si ruangah sawisel nak leh faknak in an tuah dingleh mipi in hruainak  lamzin tha khihhmuhtu a si thei. Mi tampi in milian mifim miropi pawlih tongkam tha leh mithmai tha ngahduh ruangah an an thiltuahmi a dik leh diklo zohfiangsak ngamlo in an diknak thuhlir tarlangsak leh fakih cawimawi duh tu minung kan um theuih, hihi kan hotu pawlin mipi in hruainakdingih an lamzin zawh tummi a dikleh diklo an hmuhtheinak an mit ticawtu a si ruangah keicun ka thil ngainatzawng leh ka thil tuahduh mi zawng a sidahlo ih, miphun leh ram hrangih thiltha rotling an tuahmi cawimawi in ausuah pinak dingah ka dang a hnaanglo ih, an thiltuah diklo ka hmuhmi ngansuak nak dingah ka kutzungzik khal a thir fawnlo. Si hman sehla  tongkam mawileh a siartu mipi ih ngainuam deuhdingih ca nganhi ka tum bikmi leh ka duhbikmi a sinan  Pathian in thlawsuah tamzet inpek milakah tongkam thiamhi in pektel lo ruangah ka tongkam in hi kan hotu pawlih thinlungsungih hriamhma baihlo hramseh tihi Vancung Pathian hneih banpharih ka thlacaam nak a si.

Dr, Za Hlei Thang

Dr, Za Hlei Thang ih hmin a lang hicun thinlung leh mitthlamah kan Chin ram Politics a langcih maiih, Pale Fapa le Thlarau thianghlim an thuhmun tibangih  Za Hlei Thang ti leh Politics tihi a hminsaktu in a kawpin an raksak teh a si ke maw?tiding tlak a si. a ziangkhal sisehla Varung lehDr-Za-Hlei-Thang Lengkawi hmin pahnih nei vate pakhat  vekih danglam theilo leh tthen theihlo  a raksibik kecu.

Chin miphun lakih Chin miphun zate leh Chin ram pengtinkim huap thluh thei ih Policy kauzet  fehpi theitu Politician langsar leh cungcuang kan neihsun Dr, Za Hlei Thang ih hmin hicun kan Chin mipi thinlung leh ram a dengsuakih ram leh miphun hrangih harsat nak phunzakip a raktuarsuakih  Politics buainak tipi thuahza tamzet a rak tankai in leh  mangbang nak tlangza tamtak rak lawnliamtu a siih, tuisun niah mino kum 45 hnuailam thinlung sungah  langsar tuknawnlo hman sehla ram leh miphun hrangih rinsan tlak leh hruaitu thla midik   mi ropi a si ziahi   sawiselnak  phunzakip thimkhaw zingih khuh luailo rero khal sehla   kan Chin mipi thinlung sungih a ropi nakhi khuh hlosak theih a si lo ih, Ziang tlukih  sawiselin relsiat tum rero khal sehla  Ceheeng leh Sakuh zo an ritdeuh tiih cuailung khaitlangih Ceheeng rihter thotho tumvek fang a si ruangah  a ngainatu tongkam thiampai rel uar theihding khal a si cuanglo in a huatu tongkam thiam pawlih a hmin rel vaivuan theih ding khal a silo ih a si nak diktakcu kan Chin mipi thinlungah a langfiang bikding tiahka ruat.

Pathian in kan Chin ram khaisuaktu ding leh finkhawmtu dingleh cawisangtu dingah inpekmi a siding tiah ka zumih, ram leh miphun hrangih a rakpekawk nak tamzet hi hi cahnah farah tesungah cun runngan cawk a silo dingnan  malte runthailang hnik sehla. Kan Chin miphun dinhmun ah Politician tamzet mifim leh mithiam kan neiih, sihman sehla  tuisun nitiang  Chin miphun huapthluh thei Politician kan neihsun mi cu Dr, Za Hlei Thang  pakhat lawnghi a si hrih laiih, a tuah mi leh  a tumtah mi  a keneh mawizet Chin miphun dinsuak nak ding  rotling thuanthu a bun rero mihi kan Chin tthangthar in kan thlunthiam a pawimawh ih, a hleice in kan Chin Upa politician  leh kan MP, kan Minister, pawl khalin Dr, Za Hlei Thang ih miphun leh ram hrangih hna a ttuan dan leh kan mipi hmunkhatih  finkhawm awkter a tumnak hi zohthim cio dingah kan MP, leh Minister pawlkhal ka forh duhhai.

Theihcio vekin  a nihhi kum 1990 kum Burma ram pumpi hrilawknakah  Kan Chinram  Falam peng nitlaknak lam bialah CNLD Party ihsin Member of Parliament (MP) ah hriltlin  asiih, vanduai thlakzetih  ralkap pawlin Cozah nak mipi hnenih an pekduhlo ruangah a mah khal ralkap in kaih an tumih ram lengah a thlengsuakih kan Chin ram mipi cawikan leh khaisuah  leh tundinsuak a tumtah nak Policy tamzet pawlkhal  ti hlawhtling ta manlo in leh a lohma suah ta manlo in a tlansuahih  a pawi ngaingai  Chin mipi kan van a duai kan ti kecu.

Ram dang a thlen hnukhalah  mitling leh mitlak mi rinsan um midik a sizia   Burma ram pumpi ihsi mi dangdang upa  Politician dangdang pawl khalin an theisuak ruangah NCGUB khalah Cabinet Minister dinhmun sangzet a luahban vivoih, leitlun ram tinkim ah tlawngsuak vivo in Burma ram in Democracy a ngah theinakdingih  bawm dingih ram dangdang hruaitu pawl tongin  bawm dingin a sawm vivo haiih, kan  Burma ram sungih Politics lamih a hmuhmi leh a tonmi a tamih a kauhzetzo hleiah leitlun ram dangdang  Cozah dinhmun leh  uk awknak hotu pawlih ram an hruaidan pawl a  thei in a hmu kau vivo tu a siih,Burma ramih miphun dangdang pawl hnen ih hleiah  leitlun ram dangdang hrautu UNO  tiangih kan Chin hmin ti langsar tertu leh kan Chim hmel ti mawitu a siih, Pathian in kan Chin miphun Politics lamih kan harsat nak rualrem thatertu dingah in pekmi a si ding tiah ka ruat.

Tuisun nitiangah Chin miphun in Politician  langsar zetzet  upa mifim ram leh miphun  duhdaw zettu minung tampi kan neiih, thangthar cathian mifim tamzet khal an cawrsuak vivo. Sihman sehla Dr, Za Hlei Thang vekih Chin ram pumpi huapthluhthei Policy neiban hruaitucu Pathian in an pe hrihlo ih , Falam  upa Politician mifin pawlkhalin  ram leh miphun duhdawh nakthawn nunnak tiang liam ngamin  an ttuan konan  tuisun niah kan Politician pawlih fehpi tummi Policy cun Falam hnarleng a lansuak thei hrihlo ih, Cuvek thotho in Halkha, upa Politician pawl khalin an  Halkha hnarleng lansuak thei  Policy fehpi theitu an um hrih cuanglo, Tedim, leh unau pengdangdang khal cu thotho. Cumi laiah Chin miphun huap theithluh Policy fehpi theitu kan neihsun cu Dr, Za Hlei Thang lawnghi a siih, a rorel nak leh a diknak leh a tumtah nak hi  a kaangdahlo mi tipi thuanthum bangin Chin miphun hrangah luang duahdo vivo hramseh.

Huatu zahra duhtu zahra ti a siih, Dr, Za Hlei Thang khalhi  mi tamzetin a Policy an duhih an thlun laiah mi tamzet thungcun an duhlo nasa ih,  a sawiseltu pawlih relsiat nak umsun cu Tongkam a thiamlo hnuanghno tuk ka rinsanlo tihi an sawisel thei nak umsun a siih, A Dik rori ko Tongkam a thiamlo ti mencun a daihlo in keicun ka thei ih a tlangval laiih nupi ding fala a rakbiak ah teh ziangtin ha nupi ding fala a rakbiaksuak thei tihi ruah harsa khawpin tongkam lamcu a tlasamih, Asinan a nupi ding fala khan a tongkam thiam leh thiamlo lam kha rakzohlo in midik rinsan tlak  ram leh miphun pi tiang hruaitu ding hmanah mi rinsan um leh  mitling a si timi a rak hmuh ruangah a tongkam zohlo in a mah a rakzohsawn a si ka zum( ka zum nakmen ) tuisun nitiangah tlangcabawm sung ihsi thehlar awk a duh ruangah ca a ngandah velo ih, thu zum umlo thuphanphan ngan leh aupi rero minung  asi velo ih,a tuah dingmi thilcu a thu menin  aupi lo in a taktak ih tuahtu a siih, a tuahlo ding mi thil leh a silo nak pawl  tuah leh sivek ih relaw mi khal a silo ih, tlangcabawm sungih thu zum umlo  ngan rero mi a si fawnlo a kaa ih a tongsuak micu tuahlo in a um fawnlo curuangah hiti vek mi rinsan um midik hi Chin ram leh mipi in hruaitu dingah kan ttul in kan mamawh.

*** Khah asile Dr, Za Hlei Thang cu kan theihcia vekin  Politics tilipi sungah a zuanglutih CNF Party hmangih  rualremnak tuahih Chin ram leh miphun khaisuak leh tundin tumih a ke a sai rero ticu zapi hmuh leh theih a siko ih,  mipi hmuhdan a dangih ngaihdan khal a dangih, a thluntu zatamtak an si laiah a duhlo tu leh a relsetu mi zatamtak an si ve. hicu leitlun Politics ih kan um sungah ziangram leh ziang miphun khal an   nunpi thluhmi  asiih zohman in kan hrial theidingmi thil a silo.Dr, Za Hlei Thang cu a Policy dodaltu cun tongkam hriam lezum taktak hmangin  demciamco a sikha, Falam phatsanpa, uirepa, miphun leh peng phatsanpa,. Halkha tongkam tha dawipa, mai tohkham tha duhruangih  maipeng zuarpa, ti leh tongkamhriam dangdang ih den a siih, khuaingal bupi hrang in teh inkeu ciamco hai sehla kha hnakin na cuangce ke maw?a mah in ziang tlukin naa a rakti ih a rak tuarna tikhal a mah inle voi khat tehman tlangcabawm sungah ca  ngan duh reureu lo na famcu zoin va theipi hlah

Ziangkhal siseh la Politics ticu mah bulpak duhdan leh ruahdan tha tidan ih fehpi mi thil a si ruangah Dr, Za Hlei Thang khal in CNF Party ah lutih  Chin ram leh miphun khaisuak le tundin a tum nakcu a mah leh  duhnak a tumtah nak a diknak covo a si ruangah zohman in a fehsual vati theih a silo ih, Politics cu dodal tu leh sawiseltu umdan a si vekin,  A sawiseltu pawlih tongkam leh duhdan khalhi  tlakbeu ai vekmen ih ruahsak  thluhding a si cuanglo  ding tiah keicun ka ruat .Dr ‘ Za Hlei  Thang in CNF Party a zawm ruangih  mi tamzetin an sawisel ih an dodal nak leh  mi tamtak in tha an tiih an thlun nak thuah  ziang a dik diklo timi kei hi ca ngantu cun ka uipi tilian thlir rero menih,kan Chin mipi sungah  hi ca ngantu keimah leh keimah vekih theilo mi dang tampi an umve ding ruangah Dr, Za Hlei Thang in CNF Party hmangin Chin ram leh miphun ziangtin khaisuak ih tuahthat tundin a tum timi Point hi theih ka duhih Chin mipi a mahthluntu leh thlunlo tu pawl zapi theihdingah a fehpi tummi Policy hi Fiangten relfiang dingah ka dil. ka ngen. ka fial, ka nawr.

Cun Chin ram sung Surbung tlang Vanzam tumnak ding hmun thuah mipi tampi cun nan theih zomi  asi dingnan keimah himi ca ngantu in fiangten ka theihlo ruangah  Dr, Za Hlei Thang hin insim fiang dingah ka dilih,  CNF leh Burma Cozah biakawk nakah CNF pawlin  Burma ram Cozah hnen ih kan duhmi kan dilmi leh kan thlen mi sungah Chin ram sungah Vanzam tumhmun a malbik pakhat tal tuah tengtengding tiih kan thlen ruangah Burma  Cozah in kan dilnak inpawm sakin Chin ram sungah Van zam tumhun tuah dingin kan relcakih a hmun ah Burma Cozah in Surbung tlang a hril himi hi CNF ih dilsuak mi a si tiah an sallangih, Himi thuah kan duh bikmi cu  Vanzam tumhun  neih a siih  Surbung tlangih an tuah dingcu  kanlung a awituk Burma Cozah in um dingin an hunret a si khal le kan lung a awituk ko ih, cun CNF pawlih dilsuak mi a si khal le kan lungawi tuk thotho ih kan duh bikmi cu Vanzam  tumhmun neihsuak a si.

Asinan  Vanzam tumhmun timicu ram pakhat hrangih rotling hmun thupi pawimawh a si ruangah  zoih dilsuak mi leh tawlrel suakmi a si timi hi Chin mipi in kan theihfiang tengteng a ttulih, lehhnu kan tesin fatiang in an theihfiang a ttul in a pawimawh tiah ka ruat, CNF pawlin an dilsuak mi a rak si taktak a si ah cun  miphun leh ram hrangih thiltha an tuahsuak micu  kan lungawi ih CNF khal kan fakih kan cawimawi ngam a ttulih, an tuahmi thilah kan zohding a si, Cun khat lamah CNF pawlin  himi thuhi Chin ram sung mipi hnen ih  hminthat tumnak leh mipi thinlung sungih an CNF tuumter leh  tthatsuak ter an duhnak ruangih an tilo mipi an ti vekih an sal men mi asi ah cun  kan theifang tengteng a  tulih,  CNF an si emaw zo an si emaw  kan ram hrangih thiltha an tuahsuak a si ah cun thiltha tuahsuak tucu kan duhbikmi an si vivo ko ding ruangah  himi thuhi  Dr, Za Hlei Thang in in simfiang dingah ka dilih a ka ngen. thudik theih ka duh ruangah a si.zohnen ah kan lung a awiding, zohnenah Chin mipi in lungwi thu kan simding timi lungwinak ding kan theifiang a ttul.

Cun CNF pawlin Falam  mipi hnen ah ngaidam dil an tum tiah thuzilthli hrang thawn ka rak theiih, ka hnaset awnthawm a si pang ke maw tiah  rualpi dang ngamtlak  deuhmi pawl ka sutih thuhla  cu a um kha ngaidam kan dil dingih sathi kan luanding an tivek thuhla  aum an ti tiah insimih, ka mang a bangzet. CNF pawlin  Falam pengsung leh mipi parah ziang thilsual tuahsual pangmi an nei maw si? ziangah saw ngaidam dil an tum tiah ka rak ruat rero ih. Laimi kan siih  laimi in ngaidam kan dilawk nakcu thilsual kan tuahpang mi parah ngaidam kan dilaw theu ih, thisual kan tuah hrimmi parah ngaidam kandilawk ka theidahlo, CNF pawlin kum 20 lenglo sung Falam pengram leh a sungih um minung leh lamzin hmun leh ram phunphun siatsuah ih Falam pengsung ro reprep dingih tuah tumih kum 20  hma an la ih  kum 20 theihpa tawp suahih siatbal intum hrimmi parih ngaidam diltum timi cu ka ek i awla a cemin ka luat i aw tithawn danglam nak a umlo. CNF pawlin Falam mipi parah ngaidam dil hai sehla Falam mipi aiawh ih rak ngaidam theitu cu zo an si ding?( theih ka duhzet)

CNF pawlin Chin ram sungah ziangvek in thil an tuah timi kan zoh fiangih an thiltuah mi parah bawmtlak leh thluntlak leh zumtlak ih thil an tuah mi kan hmuhih kan theih a si ah cun kan tlun vivo ko ding ( Ziang an tuah?) kan zoh kecu.

Dr, No Than Kapimages

Dr,Pu No Than Kap hi kan Chin mi lakah cun  Politics lamih micawr note leh thanthazet a si ticu tongkam ih relfiang theilo ding kawpin a Politics boruakin  kan Chin ram leh mipi thinlung dengkawrtiang a luahkhat veih, kan cinban hlanah ram leh miphun hrangah ke tampi a rak karsuak in thlua leh tlang tamzet a rak zut  rero zo dingnan  kum 1988 hlanah lamah cun Politics lamih lamzin a raksial mi leh sul a raksut nak hnuhma  leh thawmvang ringtuk a rak neilo  a bangih, kum 1988 March thla ni 20 ah khan Pu Tial KHal leh a rualpi dang pawlin CNF an rak dinsuak miah a rak zuanglutih mithiam leh mifim tling leh tlak tifamcu a relhlanah CNF Party sungah dinhmun pawimawh zet President, tohkham tiang a hunluah ban theimai ih, kha mi ihsin kan Chin thangthar mino pawlcu Politics lamah kanmit invangterih, a mai hmin khalin kan Chin mipi thinlung sungah khuaram a hunluah kau cak vivo.

Pu No Than Kap hi CNF Party dinhmunihsinkan Chin miphunleh  ram khaisuah nakding lamzin Policy phunphun tamzet timtuah nak a rak nei. Asinan Pathian in CNF Party zawng ihsi kan ram leh miphun khaisuak tu dingah rem a ti saklo a si bik kecu harsat nak phunphun leh lungsiat nak phunphun meiro sumpi zingin an ruan tuam luihlo ih, cui pawlcu tuarsuak ttunto leh paltlang ttento in tuisun niah Pathian in kan Chin Affairs MInister, dinhmun ropizet ah a run khaisang ih alungawi umin ropi ka ti ngaingaiih, ka suangvawrzetih, damcah nak hmuih a nunkhua sauin Pathian in kan peng leh tlang Chin mipi hnemtu leh thlamuantu Pacangtha mihrangah ah runsuah vivo hramseh tiah duhsak nak ka hlan.

Pu No Than Kap tuisun niih kan Chin Affairs Minister dinhmun ih a rungdingsuak hi minung tumtah nak lamcun  zumban ding a silo ih harsat nak leh mangbangnak a raktuarnak pawlhi a rapthlak tukih kum 1996 December ni kulhluan (2+  )ani ka rello ding zanah CNF pawlin a umnak In  ah  an kapih  minung tuartheiding ci silo a awm ihsi a dunglamzaangah  tlangko voi 2 an kapih Sihman sehla Pathian in kan ramleh miphun kilkhawitu dingah a duhlai ruangah a nunnakcemter a sianglo ih, Aizawl Civil Hospital ah ret a siih.  mangbang vansan tuarih thihnun hliahlo ih Sizungih a umnak hmunih dawmtu leh a mangbang laiih a kiangih um dingih minung 3 hmin a salmi lakih raktel leh  a kaptu Tinpeng leh an lamtangpawl  Aizawl ih Intellig pawlthawi kaithluhtu lakih tel ka sia ruangah  a tuarnak pawlhi ka theifiangih  mangbang leh vansan nak tlangsang rak tuarsuakih  tuisun niih Chin Affairs Minister a dinhmun a runluah hi  a hrangah a phuhrimhrim in zohman in thikdingrual khalah ka ngailo Pathian kahlin a partah thawsuah malza a pek mihi a phu hrihmhrim tiah ka ruat.

Pu No Than Kap   ih kaihhruainak  hnuaiah CNA ralkap minung 64 pawlkhan KIA pawlih hnenah Ralthiamnak Training kanva zirih kanzir theh hnu kum 1991  February ni 15 zingah KIA hmunpi Head Quarter Laisen  suahsan in kan Chinram kan rakpanih  Burma ram pumpi cu ke rori in kan fehsuakih ramhnuai tupithim sung leh tlangsang tinkim lawmliamin  ralin in hualih, ralin in dawiih, in kulh ih, rilrawn tihal leh ningtih thlaphangzetih mikeu leh cangvat phunzakim kan tuarsuakih hivekih harsat nak phunphun kan tuarih a harzia cu a tuar velo tu pawlih theihfiang ding khawpih rel dingcun minung tongkam in a daihlo ding   hiti veklai khalah Pu No Than Kap ih parah zumnak leh rinsan nak hngetzet kan rak neiih Pathian in kan Chin miphun cawisangtu leh kan peng leh ram humhim tu dingah a retmi ti rori in kan rak pawmih  tuisun dinhmunah a umnak leh a dinhmun  danglam deuhhman seh la ram leh miphun a duhdawt nak leh a liamcia caan ih ram leh miphun hrang hnattuan nakih  a dungthluntu kan Chin mino pawlhi in manglai ko ding tiah zumnak tumpi khal ka nei.  Pu No Than Kap hi CNF President ihsi hlawn leh  hro nak phunphun a tuar hnuah kah a tuarih cumi hnuah a mai ral a do rero mi kawl Cozah kutsungah kuat thlengleh sal asi ih, sihman sehla Pathian in a nunnak humhim in tuisun niah  kan Chin Affairs Minister ah  a run ret hi ka lungawipi zetih tuihnu lam khalah sivivo hramseh la kan pengleh ram humhim ih cawisangtu ah Pathian in hmang vivo hramseh tihi ka thlaza camnak asi. A mai thlazar hnuai ah  kan Chin mipi thinlunghna ngamten lengtlangin kan Chin Affairs Minister hi cawi sangin sunlawih uhsi Cung vairang mangbawi leh kawl mimang bawi kan ngai ve namaw Pu No Than Kap kan neihi kan lungawi tawk ee.

Eee,, Khai Asile kan Chin Affairs Minister Pu No Than kap khan  Chin tlangtong ih hman dingah  Laizo tong siseh tiah Burma President, Thein Sein ih hnen ah ca a kuat tikha kan mipi thinlung leh kan tlangcabawm sungih kan hlafing tumbik a rak sikha, himi thu khalah hmuhdan a dangih ngaidan khal a dangih mitamzetin  Pu No Than Kap cu a ropi nasa Chin tlangtong ih hman dingah Laizo tong siseh tiah ca  a rakkuat tiah kan lawmi a ropizet. lawmawk thiamhi cinken tlakmi hrimhrim a si.  Cumi laiah khat lamah  mitampi in  Chin tlangtong ih hman dingah Laizo siseh tiih President, Thein Sein hnenih ca a kuatnak thuhla fiangtei finfiahnak zianghman a umlo tlawngcabawm leh kan mipi hnenih a thehlarawk duhnak men a si ding a kuat taktak ka zumlo  US Secretary of State, Hillary Clinton Rangoon a ra tlawn ttumih ka raktong a tivekmen hrawngfangkha a si pang kèmaw? rak titawk khal bolo an sim khamaw!.

Ziangkhal sisehla  Pu No Than Kap in  Hillary Clinton a rak ton leh tonlo thu leh Chin tlangtong ih hman dingih  Laizo tong siseh tiih President, Thein Sein hnenih ca a kuat leh kuatlo thucu himi ca ngantu keicun theihmi zianghman ka neilo ih, Pu No Than Kap in Chin tlangtongih hman dingah Laizo tong siseh tiih President, hnenih ca a rakkuat taktak a si ah cun Pu No Than Kap hin a tuah dingmi diktak thil a tuah tiah ka ruatih, tui dihmun ah himi thu President, hnenih thlentheitu dinhmun ih um kan neihsun micu Pu No Than Kap leh kan Falam  MP pawl Cozah hna virh ongban tupawl lawnghi an siih, himi thu President, hnenih thlentheitu dingah cun Milianzet leh sumpai neihtamzet ruangih thlen theih asilo ih Mifim leh cathiam   ruangih thlen theihkhal sihlah Bantha cah ruangih thlentheih  khal sihlah a thlenthei tucu Cozah lamih thu neitu kan hotu pawlhi ansi ruangah Pu No Than Kap khalhin an tuah dingmi thil ropizet  a tuah ruangah kan bawm theimi leh kan ttanpi theinak lamzin cioah raltha zet leh diknak dinpi in kan ttanpicio a pawimawh tiah ka ruatih, Pathian in himi cakuat a ngannak Pu No Than Kap ih kutzungza khal malzaa sawmhramseh tiah thlaza ka camsak.

Cun himi laiah mipi lamin himi thuah thazaang peknak leh lungawipi nak caphunkim kan ngami karak hmuih, thazaang pekawkhi thiltthabik asiih, tuihnu lam khalah kan thiam vivo a duhumzet. a mahlawngte himi thih  kan cangan danah fimkhur ding thil tamtak kannei ih ka hmuih,  Himi thuhi Miphun  hnuk catthla tertheitu leh miphun  ziamral ter theitu thupawimawh a si ruangah fimkhur te leh ralringzet ih ca ngan leh thurel thiam a pawimawh zet tiha ka ruat. Hi thuhi kut zabeng phah leh kutzung kuai tumphan leh Hawhaw phah menih nawrding thil leh thuhla a silo ih, Tlangtong timi hi khui ihsin a rasuak dingih zozo pawlin tuihlan ihsin tuisun nitiang ziangvekin thil an tuahih thiltuah an tum timi a ratnak hrampi kan hawlsuak thiam hmaisat a pawimawhding mit fiangten kan menthiam  khal a ttul zetih, culo ih Aaa zetih thil kantuah pang asi ah cun mi in fimzetih thil in tuahkheh pangding tihi phan umza ngaingai a si.

Kan unau CNF Halkha pawlin an  tumtah mi thil pakhat nakah Chin tlangtong leh Chin Radio awsuah nakah Halkha tong hman an tumnak hi CNF Party Policy tumbik pakhat ih an retmi a si ticu hi cangantu keimah hi a theifiangbiktu lakih tel ka si ruangah tuihlan ihsin tuisun nitiangah ziang an tumtah timi ruah a ttul ringringih kandung  naite ah Thlantlang MP pakhatin Chin Radio tongih hman dingah Halkha  tonghmangtel dingin Parliament ah putlut a tum tithu a umkha. Khakha a mai bulpak ih tumtah nak maw a si a dunglam ihsin zozo pawlin an nawr titla kanzohfiang a ttul dingih, Tuah CNF leh  Burma Cozah pawlcu biakawknak an nei rero ticu kan theihcio thluhmi a siko ih, himi ah CNF pawlin Burma ram Cozah hnenah  rualrem awknak tuahnak dingah ziangvek thuhla pawl an thlenih an dil timi fiangten kan theilo.

Asinan  CNF leh Burma Cozah cu lehnu khalah beaw rero laiding mi an siih, remawknak thutiam thutluknak an tuahnak ding taktak tikah CNF pawlcu Chin tlangtong leh Radio ih hman dingah Halkha tong siseh ticu an putlut tengteng dingah kei himi ca ngantu cun ka zumdan leh ka hmuhdan a siih, Himi tikah cun Thein Sein ih Cozah khal siseh Aung San Suu Kyi ih Cozah khal siseh Politics thuih Burma ramsung tlangpar mipawl an biakrem  theinak ding leh an lungawiter theinak ding a sia ah cun  Kawl pawlcun ziangvek hmanrua hmanmai khal an el dingah ka zumlo ih, Thein Sein leh Aung San Suu Kyi hin Chin tlangtog ih hmandingah ziangtongkhal duhsak mibik in neih sak ka zumlo.

Falam mipi in Chin Tlangtongih Laizo tonghman kanduhnak thu  tlangcabawm sungih kan ngan mipawlhi Burma ram Cozah thu neitu pawlih hna a thlenglut ban loih, Burma Cozah thu neitu pawlih hna thlenglut leh Burma Cozah in an tongkam an neithlaksak misawncu kan nih hnakin rualrem nak tuahpi an duhmi an biak rero laimi CNF pawl an sisawm ruangah kan duhmaw duhlo maw  himi thuah kan duh tiih hrilnakin umzia neihlo tikcu a thlen leh a phan umzet.

Dr, Za Hlei Thang cu  CNF ah a lutih kan Falam mirinsan zetmi a siko nan  Halkha pawlin Chin tlangtong ih hmandingah Halkha tong siseh tiih Burma thu neitu pawl henih thu an thlenlut tikah DR, Za Hlei Thang cun a duhlo ding ticu theihcia a siko nan  a mah pakhat lawngin  CNF Halkha pawlih thuhi a el neh ke maw? a duhlo zia langter nakah a  baan pahnih leh a ke ke hnih khal pharin a kutzung zate khalin phar khal sehla a mah lawngcun Halkha pawlih duhnak hi a pharthlaksak thei ka zumlo. Himi vek a si ruangah Burma ram Cozah thun neitu hnenih thlentheitu Pu No Than Kap hin himi thuah ralthazet leh dikzetih rinsan tlak zetih in hruai ngam a ttulih, mipi khalin  raltha zetih kan dinpi ngam a ttulfawn.

*** Himi laiah thil riahsiat thlak pakhat ka timi cu Pu No Than Kap hin Chin tlangtong ih hman dingah Laizo tong siseh tiih President, Thei Sein hnenih ca a kuat timi thuhi kan mipi in lungawi zet leh thathozet in kan hmuakih kan lawmih, himi laiah kan u nau Halkha pawlih hnenah Chin tlangtong ih hman dingah Laizo tong siseh tiah Ca ka kuatlo tiih a phatsal nak ca riahsiat thlakzet ka hmu lala ih ka manga bangzet. Pu No Than Kap hin kan Falam mipi henah cun President, hnenih ca ka kuat a timi leh Halkha pawl hnenih a phatsal nak thuhi a pialawk terih thulut lam leh thusuak lam a si ruangah Falam mipi hnenah cun huaisen zetih cakuat ihrel aw siin Ziangah saw Halkha pawl hnenih a tongkam a zuuk salih a thu a suut sal tihi ka sut duhih fiangten felaw fianghram dingah ka Dil in ka ngen.Himi thu President, hnenih ca a kuat timi hi khatlam ah Aw khatlam ah Lo tla a si pangah cun  Tui sunah  Khawthlir pawlin Tio tivapi ah ngahru an vua ih Congtthe pawlin Run tiva ah nga an rakdap tivek a bangpangding. Cu ruangah relfiang dingin ka phutin ka dil, ka ngen.

Cun Chin tlangtong thuah mitinkim bulpak siseh pawlkom siseh kan tuahtheimi cioah kan ttantlangkhawm a ttulih, tuidin hmunih pawlkom kan neihsun micu rinsan umzetmi ICA  a siih, ICA kha a dintirte hrawngah cun a thawmvang a ringtha zetih Solfa thiampawlin a thluktuah hai sehla khuangpi tumih hla ih saktlakin a thawmvanga ringih ICA hin ramsungih kan hotu leh kan mipi harsat nak thlirih  an kut ticaktu sihramseh tihi ka thlacamnak a si.Cun kan Chin Affairs Minister khalhi  kan mipi dinhmun harsat zia leh dinhmun cawisan kan tuulzia thei in ttan a lak rero zomi ih hleiah  ttan a lakbet vivo hram ka duhih, Nuamtawlih vaktawi man a silo ih Chin micu dawmkan leh tuamhlawm ttulzet kan si ruangah kan mipi aiawhtu Minister hi mipi tungdingtu ding a si ruangah Nuamtawlih vaitawi menlo dingih mipi in thlaza kan caansak a ttulih, kan cawimawi leh kan sunlawih dingmi khal a siih, mipi hrangih hnatuan tu an si ruangah sawisel an ttul nak khalah kan sawisel ngam a ttulfawn.

DR, Hre Kio

fddfAw lee,, Saya, Hre Kio  hunti fukfo mai sela Dr, tileh Rev, vunti khalhi an fimnak leh an thiamnak hmin ropi zetcu a si nan  kei Laitlang khawte pa titakah kan nauhak lai ihsi Saya Hre Kio kan rakti theumi a si ruangah a mah khalin in ngaithiam hramsehla Saya, Hre Kio hi leitlun Politics lamah cun  hi cangantu kei mah leh keimah vekih mino thangthar theihbancin ah cun  a hminin kan Chin ramsungah khuaram a luahkaulo ih,a hlan kan cinban hlanah ziangtlukin leitlun Politics ramri a rakpahbal ticu ka theibanlo Kan cinban hnuah cun Saya Hre Kio hin Pathian thulam ihsin kan Chin mipi in khaisuakih thlarau lamih kan pabik a si tiah ka ruatih, a ropi in  a sunglawi ka tizet. kan Chin numi pumsung ihsin a nihvek Pathian thu lamih in hruaisuaktu Bethlehem Arsi hi Pathian in inpe nawn tak kemaw? tiah ka ruatih  Chin mipi hrangah Pathian in duhsak zetih thlawsuah ropizet in pekmi tiah ak ruat.

Kan nauhak lai Bualzawl khua ih kan rak um laiah kan khaw Kohhran upa pawlin Bible Cathianghlim sungih thu Bawizisu in  cutin a ti tiih inraksim  hnakin Falam ihsin Saya, Hre kio in cutin a ti timi kha kanrak zumsawn mileh kan rak ngaipawimawh sawnmi a rak siih, a hleice in kan nih Falam mi tlacun  Siangbawipa tiah kan koih Siangbawipa timi ih umzia hi ziangha a si? ti fiangten ka theilo nan Upat nak leh cawimawi awknak sangbik a si kecu tiah ka ruatih, Siangbawipa tiih kawh hi Saya Hre Kio hin a phu hrimhrim tiah ka ruatih, Bible Cathianghlim thazet tiang in tuahsakih a sunglawiin a ropi ka tituk kan sunlawih ih kan cawimawi dingmi hrimhrim a siih, Saya Hre Kio ih hminhi kan tesin fatiangah a hlohral thei ka zumlo ih a hmin hlohral ter dingkhalah ka sianglo leitlun danin zankhat mitsin a tonga si khallen a hminhi kan Chin mipi thinlungsungah hlo theilo Cafang tumzet ih nganin a umding.

Asilen hitlukih Pathian thulam ih kan Chin mipi in khaisuaktu kan Pabik Siangbawipa hin a thiltuahmi leh a pawlkom dinmi pawl zoh tikah Falam mipi thinlung vaivuan leh thinlung khawruah duurdup  dinhmunah in thlengterih, mipi hmuhdan leh pawmdan khal Sakhi a sukah Cawnkiang a so ah tivekin a pialaw ruriih, hicu leitlun minung kan si sungah zohman in kan hrial theimi a silo. Mi tamzetin Saya Hre Kio cu Pathian thu ttihzahtu  a si ruangah Pathian mithmai zohin leitlun Politics lam thawcun a hnamhnawih awlo ding titu an rak umih hihi thinlung thianghlimzet khawruah nak a siih thilduh umzet khal a si, himi laiih a mahin  a thinlung thupte ih Pathian hmin phawah hmangih leitlun Politics lamih hruailut tumnak thinlung a rak nei a sile a mah leh Pathian karlak asiko ih  cucu zohman in a thinlung thuruk cu va theihpi si hlah.

Himi laiah mi tampi in Pathianthu phawah hmangin fimzet leh tiamzetin leitlunn Politics sungah hruailut in tumnak asi,  Rulpi saphai in teh   mi a dawlhtum zikah voi leh khatah a keu in a dawlh mai lopi a huham in a zeel hmaisa ih cumi hnuah a liaknaal ih cumi hnuah  awlten a dolhmai a si rak titawk an um khamaw! hiti vekin mipi hmuhdan leh ngaihdan a dan ruri ruangah ziang a dik timi cu a mah in a thinlungsungten a thei keuki ko dingih Pathian  hmaiah ziangtin a ruataw ding ticu mai ruahnak thinlungsungih si cuai rakkhai mai a ttul kecu.

Pathian thu thlarau lamah mi fahrah ka siih,  sihman sehla keimai ruahnak ka thinlung ihsi tafung ka tuah mailo cun   zo ih hmuhdan leh ngaihdan lak ka duhfawn silo ruangah Saya Hre Kio in  Global Chin Christian Fellowship(GCCF) a rakdin laiah khan  Pathian ropit nak leh sunlawinak Pathian thuthianghlim ih kan ram a luahkhat ter tumtah nak taktak rak siseh la  Kan Chin miphun tinkim  peng tinkim sawmkhawm awkih Pathian  hnattuan tlangkhawm kha thil harsat nak a um maw? tikha mipi thusuh nak tumbik a rak sikha.  khami vek a si ruangah kan unau Halkha upa pawlin an duhtawkih thuhla an ngaituah famkim thluhhnu ih cumi nemhnget tertu menih pengdang minung vakvai pahnih khat laklut menmi kha Unau Halkha pawlin mi khuhneh leh mi ciimpil an tumnak thangkam mi a si lo maw ? tihi ruahlo theihlo dinhmun ah mi a dingterih a liamcia thu it thatzomi a si ruangah himi thucu tamrel a ttulah ka ruatlo ih hi GCCF ihsin a mah Saya Hre Kio khal a suak hlozo tiah thuzilthli zuang ka theiih,  Saya, Hre Kio hi ka biakban mi minung leh a biaktlakmi minung ka silo ruangah ziangruangah a suahsan sal ti ka theilo, GCCF ih kan thangkam mi miin in theizo kan awklo ding ti theiih suahsan maw  asi theiban hlah, a suahzawngah a thangkam mi thanghri teh a satcat tamaw theihban pi lo nafamcu.

Eee khai Umm,,,.

CCOC-2 thlipi in innuai betsalih kan nihvek thlarau lamih mifarah leh thazaang derdai pawl tlacu a thawmvanagah marpacag zuri bangin kanrak ril rero ih, himi thu khalin kan Falam  mipi hmuhdan leh ngahdan  a tizing luihlo a sikha Airibual ram thlawhlo bawpirul teh ziangce  CCOC-2 hi mi tampi ngaihdan leh ruahdan vekih Pathian thu karhzai nakding a si an cun  a thabik ee Pathian thu karhzaiter duhlo zohman kan umlo.  Saya Hre Kio in CCOC-2 a dintum salnak hi Pathian thu karhzai nakding taktak a si leh silo cu a mah leh Pathian karlak a siih, a mah leh  mah a theiaw tubik khal a si. Asinan himi thu a zumlo tupawlih hmuhdan leh ruahdan khalhi bawrhhlawh bawm tumpi sungih hlawnsak theihmai a sivecuanglo dingih, CCOC -2 hi a dunglamah ziangthil leh ziangthu a um CCOC -2 hi khuitawk ihsin  a rasuak  timi ruahttha dingah a thuin mi  a fialih a feh danding lamzin zohfiang ttul dinhmunah mi  a dingter fawn.

CCOC cu ZBC ih rakdinsuah mi a siih Chin ramsungih Chin ram sungih Pathian thuthangtha an phuan hnuah ZBC ih kharnak a tuahsal ticu mitin theih a siko ih, Himi thu ah keicun Saya Hre kio hi ka biak banmi minung a silo ih a mah in hmuhdan leh ruahdantla a danglam asi thei Saya Hre Kio khan ZBC kha rakron sehla Pathian ropit nak leh ram kauhnak duh taktak asi ah cun kan Falam  mipi thinlung buai luihlo kha a sutkiandan a rak um nahman maw! Himi thuah a tir ihsin ZBC leh Pengdang uanu pawl rawnduhlo ih Halkha Upa pawlin  an duhtawkih thuhla an relkhawm zomi hnu a si ruangah thil thianghlimlo a um ticu Saya Hre Kio khalin a thinlung sungten a phat ka zumlo.

CCOC-2 thu relkhawm dingin USA ah tonkhawm awknak an tuahtum thu  Saya Hre Kio in nganmi ka rak hmuih Halkha ihsin minung 12, pengdang ihsin minung 2 maw 1 maw hrawng an telding thu  a nganih Falam ihsin palai telding an um lo a timi ka hmu, Hihi  thil tharhlan leh danglam thar a silo ih unau Halkha pawlin thilti dan kelte an suahmi a siih pengdang thawi thurel tlang hnakin an mahte relfelih cumi hnuah pengdang unau a thunun  theimi leh an thuthluntheitu  pawl an sawm leh saltheu hihi cu thil thar danglam a silo Halkha pawlih titheumi a siko.

Saya Hre Kio cu kan Falam mipi in kan rinsan tukmi a siih, Curuangah Saya Hre Kio hmangin a dunglam puanzar phennihsin  zopawlin ziangtin thil an tuahtum  timi kan zohfiang a ttulih, kan Unau Halkha upa pawlin Saya Hre kio  hmangih an kehlam kutih sasem inpek mihi an vorhlam kutin  an dunglamah ziang an keng sobul maw thingtan an hum ti fiangten kanzoh  a ttulih, Saya Hre Kio in dunglam puandum zarmi pate phenah zo an ding timi kan zohfianglo a silen  kan covcu Mangkhawng hnuaiih Zianghnam thlacan thawn kan bangawleh ding.

  • Dr, Za Hlei Thang    Kan Chin mipi hruaisuak dingah raltha zetin tho aw la feh aw.
  • Dr, No Than Kap     Kan peng leh mipi khaisuak tu dingah raltha zetin tho aw la feh aw.
  • DR, Hre Kio            Kan Chin mipi Pathian  thuthangtha thawn in khaisuak vivo hramaw.                                          

Khuang Lian Sum

(Visited 409 times, 1 visits today)

Comments

comments

9 Comments

  1. Respected, Khuang Lian Sum tiah ka lo ko lawk ding.. U tin maw Pa tin sawn, lole Pu tivek talih vun lo kawh ve ding ka si. In ngai thiam aw ka lo theifiang ciah lo ruangah sawn si.

    Na comment mi pawl pakhat te hman hrelh loin catluan pakhat hnu pakhat rori in ka siar cerhco. Tulai ih ka thinlung in ti buaibik tu cu na ngan mi pawl rori an si. Thu thei zet le comment thiam zet tla na si ka lo thei fiang.

    Chin Literature, Chin & Ministry, Chin Politic pawl hi ruah lo theih lo rori asi. Tlang cabawm siar cawk ding siloin a um tam nasa. Apoi ka ti bik mi cu “Pumpi khapkhat cawmnak ding hrangah kiangkap zoh an thiam nawn lo theu” cu poi ka ti zet. Laimi thangso kan duh tuk nak ah le Freedom ih kan um thei nak dingah mah le ti thei tawk in an zuam mi pawl cu “Mix” an hmang tuk. Mipi theih ah Ministry kan si an ti, dunglam ah cun Politic in a thlun, lole Chin Slang (Dialect) a thanso thei nak dingah tiah an zuam rero mi pawl cu Ministry lamin an tuan ciamco lala fawn. Hi pawl tla hi a pial aw tam zet mi pawl an si.

    Na cangan mi ah ruah ding in nei tam ter ih theih bet ding mi a tam zet.

    Lungawi

  2. Na cangan mi cu tha law law.Hmailam khal ah in rak ngan sak aw.A siar ka khawp thei lo.

  3. na ca ngan cu aw!!!! mi lung thianglo taktak na rak si hi…

  4. Pu No Than Kap um lo seh la falam mi hi
    halkha pawl ih lung a va awi zik em
    si nan Pu No
    Than kap an rih tuyk le tan a lak nak kan Pathian nih in theih pi ih falam mi kan lungawi..

    Pathian in mai miphun hrangih tuan ngam lo cu a hna tuan tu takrtak ah a duh pei maw????

  5. Pu No Than Kap Pathian nih malsawm vingvo seh na lam ah mipi tam pi ka um rih hrimhrim hlah aw…zahleithang cu hnih suak men aw..mai in sang nun hman ngam lo cun ram le miphun hrang kawhhran hramngah buai nak men a si aw eeeeeeeeee…

  6. Kanpa PaThian in mi thu t’hensak dingah in phut mi a si loih cu hnak sawnih t’ha mi nehnak  cu Cross parah kan bawipa Zisuhkhrih in nehnak inpekzo a si,tlang t’ong thu ah kan Falam unau
    Kanthla a t’em kanning a t’ih khawtleu/vang ding hngak hlapin kankhur ziang ruangah saw kanning a t’ih kanthla a t’em Pathian kanrinsan tak2lo mi zokhal kantuh mi vekin kan at salding khaw ruah har mangbang in um hlah uh Pathian rinsan in thlacam ring2cio uhsi kan unau Halkha le Thantlang pawl hrangah a hlei cein kanti thei tawk thlacam nakin t’an pi sawn uhsi hi lei tlunih nehtu si cu zocio khalin kanduh t’heh kan Pathian hnenah nehnak famkim a um…

  7. nan ca tial mi atha ngai myone dang i ca tial mi zong hi i rel piak ve kho hna u sih a tha tuk hnga

  8. Thian Piang says:

    Ka Chin common language ah Halkha le Falam pawl lawng ih sung phit thei mi tla asi lo. Chin ti mi mi phun hi kan tam tuk, Cuih kan mi phun za te ih hman theih mi le lung kim mi Chin tlang tong (common language) ding cu buai pi rero khal aw la kan bang lak men ko ding.Halkha in tla si seh Falam in tla si seh.. Cu hnak in kan Chin mi pawl hrang ih a tul bik mi sawn cu Pathian tih zah ih nung ding hi , kan chin mi hrang ah a thu pi bik mi le kan than so nak ding lam pi asi bik.

  9. A si rori.

Comments

%d bloggers like this: