Burma Ram Feh Dan Ding Part 109

Falam Khua Hmun Ram A Rak Tha Zet!

Falam khaw hmun a tha lo,a hrap tuk tiin rak rel zawk rero tu ah kei tla ka tel ve.A si nan tui kum June  thla ih Delhi saklam ih um Shimla khawpi ih zan 15 ka riah hnu lawngah cun Falam khua cun hmun ram tha a rak nei na sa ti ka theih phah.
Shimla ( tuhlan ah cun Simla an ti ) hi kum 1860 in 1947 tiang  Britiah pawl ih India rampi an rak uk lai ih summer capital ih an rak hman nak hmun a si ih feet 6000 ai ih sang ih um tlangpar khua a si.British pawl ih khalai ih India,Pakistan,Bangladesh le Burma pawl an rak uk nak a  si ruang ah office pawl cu tha tuk tuk in an sak.
Cucu thudang,tui ka sim duh mi cu,Shimla hmun cu a hrap tuk nan sum an  neih ruang ah le thiamnak an neih ruang ah hmun tha tuk in an tuah.Thuthimnak ah ,The Ridge an ti ih Anglican ( tu-ah cun Church of North India ) biakin Christ Church umnak cun tual rawn a nei ih,a tualrawn cu a za te cun Falam bualrawn hnak in a tum in a kau ke.A si nan a mak nak cu a tual rawn hmuah hmuah ih then thum then ih then khat cu tuah cop,do cop,dawl cop a si ih camera in thla ka zuk thluh.A tlun lam ih si cun hmunrawn pi pakhat a si mai.Hitawk ah mipi tla an pungkhawm theu ih,an chief minister thar an lak ni ah mi 15,000 an pung khawm aw.Kei ka thlen zan ah summer festival an rak tuah ih mi 3000 lai zan ah an hlim nuam.
Cuvek tho tho in an motor zin hmuah hmuah ih 33% ( one third ) cu tuah cop,dawl cop tho tho a si.An inn saknak  pawl khal ah an inn pawl ih tual rawn pawl cu tuah cop,do cop,dawl cop lawng lzawng an si.
An Himachal Pradesh state ih office pi secretariat pi ah ka feh ih  building  thar lam ah ka kai.Office pi cu thuah 5 lai ih sang a si.A saklam cu innpi ih a phen ruang ah a cang ( wall ) hi fet ziang zat in a sang ti ka thei lo.A tualrawn  cu feet 100 by 40 hrawng a si ih car parking in a khat thluh.Hinah hin a mak mi cu cui an tualrawn car parking hmun cu tuah cop a  si.Cuvek ih hmun rawn neih nak ding ah a thanglam ih cang cu feet 40 lai in  a sang.Cumi lawng hman a si lo,a thlang lam ah motor pi 3 lai a rual ih feh thei khawp ih kau lam zin pi a um lai.
Falam ah teh
Shimla ka ruah tikah Falam cu hmun a rak tha tuk.Shimla vek in a thlang lam ah feet 25 ih sang,a sak lam ah feet 20-25 ih sang cang kan dawl ve ding a si ah cun Falam biakinn pi ih si Vankau tlang feh nak ah feet 100 by feet 100 ih kau,inn pi,hotel pi sak nak ding hmun 3 hmun 4 cu a um teng eng ding.

Falam Tourist Centre ah

Falam khua tuah that dan ding a phun phun ka ngan zo vi,ngan leh ding ah museum le park tha zet tla kan ngan leh ding.Kan dung ih Surbung tlang ah vanzam fate tumnak kan tuah ding tiin Burma a cozah ih an simnak ah khan Falam cu Rihli zohnak ding ih colhnak a si ding an ti.A dik tuk.Falam khua khal zohtlak in kan tuah ding ih,Rih feh duh le Haka khawpi zoh duh hrang khal ah Surbung ah tum in maw,cu lo khal le Mongywa ih sin zin a that cun nazi 8 ah Falam an theng thei mai ding.
Shimla ka um lai ah ka kawm zet mi Baptist pastor Ajay in i sim ih,The Mall timi dawr tluan,India ih dawr tluan mawi bik,motor zin ah motor pi 3 feh tlang thei nan motor feh an sian lo nak hmun,ziang tik lai khal ih milai feh a za a za ih hmuh thei mi dawr tluan ih um pawl hi 70 % cu mikhual tourist nan si ,tiin pastor pa in i ti.Falam khal tourist center ah kan tuah leh ko ding.

Khuahlan In Pawl Kan Kil Tha Ding

Falam ah British san lai ih sak mi inn 15 lai cu a um hmang ding.Tu hlan ah cun inn hlun 5 lai lawng kan zuah ding ih a dang cu a thar sak nak dingah kan bal thluh ding ka ti theu.Shimla ka feh hnu cun a hlun hmuah hmuah tha ten kan zuah ding ih nghet sin le mawi sin in kan kil khawi ding.Innthar saknak ding cu cang sang ih kan dawl thei tla ah cun Baptist biak inn pi ih sin OPD sizung hlun kar lak hman ah inn hmun tha 10 tlun a um ding a si si ka ti fam teh.
%d bloggers like this: