Burma Ram Feh Dan Ding Part 98

                                Kohhran Hnatuan Tu Pawl le Politic

Kan Burma ram khal democracy a si vivo.A lungawi um zet.A cozah hna tuan tu pawl ih lakkha khal a thang vivo ti a si.Tu ah a mal bik ah Ks.80,000 lai mawsi an nghah thei zo.Hiti lai hi pastor pawl ih hlawh khal malte cu a kai nan Ks.60,000 tiang hrawng tla a si hmang.Ka sim ring ring vek in ram a rung that ngai ngai cun a cozah hnatuan nak le  business ah hlawh a tha tuk ding ih,cumi tikah cun leitlun dan ih zoh cun pastor tuan cu a hlawk nawn lo ding.

Kan dung kum 15 lai ah khan maw si tum khat tla ah cun ei ruknak tel lo cio cio ah a cozah hna tuanhnak in pastor tuan a hlawk sawn ti kha kan thei sal ding.Tui hnu cun pastor pawl hnak in midang hlawh a tha thlang ding.Cu tikah cun pastor hna cu Pathian thu ih um ngai ngai pawl lawng in an tuan ding.Pastor pawl mal deuh seh la,cu le kohhran in tha ten kan zoh law law ding ih,an hlawh a tam ciam co lo hman ah thil dang in kan zoh tha ke cu.

Tui tum ih ka ngan duh  mi sawh cu pastor le politic ti hi a si ding.Mizoram khi kan zoh tik ah,an society pawl sawh cu a siat nak khal a  tam zet ding nan an pastor pawl ( Presbyterian le Baptist tal ) cu an fel zet a si.Cumi an fel zet nak pakhat cu politic ih an tel lo leh an lang lo khi a si.

Kohrhan kil tu pawl,a hlei ce in hlawh nei ih Pathian hnen ih tiamkamaw ih Pathian hna tuan pawl hrang ah cun leitlun party politic ih lang tak ih tan an neih hi a mawi lo law law.1994 ah khan a si hmang Saya Hrang Kip Zul hnen ah ” Kei cu party politic ka ti khal le i duhdaw tu pastor pawl cun leng lam ah a lang ciam co cun in tan uh hlah,thla in rak camsak ih nan sung te nan unau ih in tan ding ih nan ti ah cun a tawk mai ” ka rak ti a si.Pastor pawl  ah cu cun cumi a tan,cu mi hrang ah a campaign ciamco ti theih hi a hrehum tuk.

1998 lai ah khan Mizoram ah India MP cuhnak a um ih Congress party cun Pathian mi zet Upa Rokamlova candidate ah an ret.Pu Ro hi Lai Christian Fellowship tla ah Pathian thu in sim theu.Kan ngaina zet.Vawi khat cu hrilawk hlan te ah an nu Pi Buangi cun ” Pu Run,In kohhran ( LCF )ah vote nei engzat nge awm ang ” i ti ih, ti duhsan cu ka thei mai.Kei cun ” Pi Buang,Pu Ro kan hmangaih ti i hre tho,kan LCF ah tu tu nge Congree vote ang ti hrait tum suh ” ka ti ih ziang khal a  tong ngam nawn lo.Kei cu Pu Ro kha ka rak tan nan anmah ruang ah LCF kan buai ka duh lo.

Kan ram politic kan thiam vivo ding ih ka cahawk duh mi cu Pathain hna tuan pawl cun zawi party hrang hman ah au koi lovi,Jesuh Khrih hrang lawng lawng ih nan tuan hin Laimi mi phun a tihim bik ding a si.

(Visited 43 times, 1 visits today)
%d bloggers like this: