Burma Ram Feh Dan Ding Part 96

Cerhmun Model Village ah Kan Tuah Ding


Ka khua hi Cerhmun khua a si ih,Falam ihsin peng 13 in a hla.Kan khua hrang ih sum le pai ih ka rak tuan hmasak bik cu Ratu,Mizoram ih high school ih teacher ka tuan lai ah vawi khat cu petromac khawnvar ka leisak ih vawi khat leh cun biakinn sak nak ah rangva lei nak ah sum ziangmaw zat maw si ka kuat.Kum 30 lai a rei zo.Kha lai ah inn 60 lai an si hi tu ah cun 40 hman an kim nawn lo.Planning kum 5 hnu ah inn 60 si sal tum bang seh la.

Cerhmun 5 year planning kan tuah ding ih,cumi ah cun ramdang ih um kan khawsuak  pawl an thupi zet.USA ih sin Pu Fung Dun pawl tla in nasa zet ih in bom a tul ding.

Hnakum 2014 in kan thok ding ih,kum 5 sung ah kan khua kan tidanglam rori ding.Kan dung lam kum 7 lai ah Canada ih um Thlantlang Farrawn mi pakhat thawn Delhi ah thu kan rel ih,hitin i sim.Kan khaw pawl an mah te in an rak tuan zet ih cui tlun ah ram dang um pawl in sum kan theih tawk in kan kuat.Kum 3 hnu ah ka va tlung ih kan khua cu a rak danglam rori i ti,Ka daw nasa.Anni vek in kum 3 ah ka ti ngam lovi Cerhmun planning  kum 5 ah ka ti a si.

Tui kan khua ih hydro electric khawl te hi a hlan ah cun Rev.NgunHlei Thang tei nupa in ramdang ih an rualpi pawl hnen ih bomnak an dil mi ihsin tuah a si ih,chui hnu kum 4 lai ah maw si a siat thlang ih ka pu Khaw Nei Luai ih fa le tu pawl in tha sawn in an runtuah.A bomtu pawl tlun ah lungawi thu ka sim duh.Hihi kilowatt 20 tal pe thei khawl ah  kan can tir a tul ding.Electric kum 2 sung ih kan tithat cun thanso nak a ra mai ding ti cu kan thei thluh ding.Cule tidai thu ah UNICEF ih bomnak ih lak a si ih,a khawlnak a fa te ih a khawlnak hi kum 2 sung ah let li hrawng ih tum kan tuah ding ih,cu cun kan khaw kiangkap terrace lo acre 7 tiang lai fur ah ti a pe thei ding.

Kum 5 sung ih a hmaisa kum 2 ah electric khawl le tidai ih tlun ah kan khaw tlawng te kan upgrade ding.Phun 4 tlawng ah saya 2 kan nei ih,saya 4 tal neih thei kan tum ding ih,pakhat cu B.Th. tal ong a si teng teng ding.Cuti cun kan khaw tlawng ah English tla tha ten kan zirh ding.

Harhdam nak lam ah.tu khal ah Capt. Taithio Memorial Fund (CTMF) ti fa te zet kan nei ih ka nau le in sum an thawh ih kan khaw pawl hnen ah sii a man a hrek in an zuar.Cule a kil tu pawl in hlawh malte an rak ngah.Himi fund khal za te tang tlang in kan ti tum ding ih,kan khaw mi mi farah Falam sizung ih um tul vek tla cu za pi in kan zoh tlang ding.

Cangdawl lo lam tuah.thanso nak le cicin,ran vulh,tractor fate pawl hman ih thilphurhnak a  phun phun pawl ngan ding a tam tuk ih kan ngan cawk lo ding.

Ziang tin kan tuah ding ti lawng ngan leh seh la.Tui kum ah kan khaw ah thlacam khawm nak an nei ih kan khua vaihsan zo pawl 200 tlun maw si an hung tel..Cumi hrang ah third country ih um kan khaw pawl in $ 4000 lai an thawh.Kan khaw model khua ih tuah nak ah an duh ah cun kum tin $ 4000 cu an thawh thei ko.Cule NGO,UNDP,World Vision ti vek tla in sum tampi kan dil thei ding.Himi sum hi kan khua thanso nak ah a hmun ih um pawl in taimak nak an thawh ih,sum hmansual nak um lo thawi  kan tuan tlan cun kum 5 sung  ah cun mak zet in a thangso ding a si mai.

Kei cu kan khaw hrang ah kum khat ah tum 3 maw tum 4 maw ka tlung ding ih ka tlun tum ah a tul dan ih zir ih zan 3 in sin zan 7 tla ka riak ding.Ka tikcu dang pawl cu Lai ram kan tuah nak ah,mah le mah cawmawk nak ah,Falam thanso nak ah,Rangoon ih Falam pawl hrang hnatuan nak ah ka hmang thei tho tho ding  a si.

%d bloggers like this: