Burma Ram Feh Dan Ding Part 93

President le Prime Minister pawl ih thusim hi a rin tlak maw?


1986 kum kha Mizoram ih MNF le India a cozah pawl ih an kahawk an titawp kum a si ih,cumi run lawmpi ding in khalai ih Prime Minister Rajiv Gandhi cu Aizawl ah a ra .Kan rak hmuak nasa.Press mi ka si vek in Tuirial airfield ah ka tel ve thei ih,Rajiv,Sonia le an fate 2 ih thla tla ka zuk ih tu tiang ka album ah a um.Khami tum ih kan rak hmuah dan kha lehhnu ih hlasak thiam Ruut Mawi an hmuah dan thawn khui a thupi deuh ke ti ka thei lo.

Ka sim duhmi sawn cu hihi a si.Kha tawk ah  Rajiv Gandhi khan Aizawl khawpi laifang ih um Assam Rifle  hi kan lo thawn sak ding  ti in mipi 15,000 hmaiah a sim.PM Rajiv ih tong nanana cu an run ti ngai ngai ding ti in ka rak zum zet.AR hmun hi Mizo mipi in an secretariat ( minister pawl ih zung ) ti vek sak  nak ah an duh zet.Hrilawk zik pawl ah party pawl in kan ngah le AR kan thawn ding an ti theu.Tu kum 27 lai a rei leh zo vi,AR cu an thawn ta lo.

1998 ah khan MNF pawl an tling ih a cozah an tuan.Hrilawk hlan ih an thutum pakhat cu kan tlin le AR kan thawn ding ti a si.Kei le khami hlan kum 12 ih Rajiv Gandhi ih thutiam an ti suak lo rak thei keu keu cun MNF pawl hin an ti lo ding,an ti thei lo ding ti cu ka thei nasa.Ka Hnehtu daily  editorial ahMNF in a thawn thei lo ding ka ti ngam lo.Hitin ka ngan.AR field thawn hi kum 2 khal ah a  si thei,kum 20 hnu khal ah a si thei.Himi thawn hlan khal ah tui MNF a cozah hin Aizawl Treasury sq. le Dawrpi Bungkawn kar lak hi AR officer pawl thawn relkhawm sehla,feet 6 tal cu zin a kau tir thei ding ka ti.Tu ah 1998 ihsin kum 15 tlun a rei leh zo,AR zo hma in an thawn thei lo,ka thuron lamzin ti kauh tal tum seh la a tha zet nan fam teh.

2008 Mizoram hrilawk ah khan PM Manmohan Singh le Sonia Gandhi pawl in Aizawl ah Congress nan hril le New Land Use Policy ih sin Congres vote tu pawl cu Rs.ting 1 ciar kan lo pe ding an ti.Congress cu an tling ko.Malte lai cu sum an pe ko.A si nan khami pawl kha Central a cozah ihsin a dang ten an ngahmi sung ihsin si lovin acozah Dept. pawl ih development hrang ih hman ding sum an sawk khawm ruang ah kan dung kum 5 sung ah a cozah hna tuan pawl in an hlawh dik tei an hmuah thei lo tawk a tam pi ih,cui tlunah Mizoram ih thanso nak in an tuar phah a si.Prime Minister rori ih thusim a si nan cu tluk in a rin tlak ta lo.

Kan ram khalah a tikcu ih zir leh an phur dan ih zir in Lairam hrang khal ah President Theih Sein pawl,Sagaing Division PM Taa Aye leh Chin Chief Minister Hung Ngai pawl in ziang ziang maw kan lo tuah sak ding an ti theu ding.Vawi tam pi ah cun hi VVIP pawl ih an sim mi hi an mah khal in a thaisun mai ah an nghilh ding ti ka zum.

Cui ruang ah cun Parliament ih pass mi le Cabinet ih rel rori mi pawl hman an ti leh lo theu nak khawvel ah kan President le kan prime minister pawl ih thu sim a paing hi a rin tlak lem lo a si ti hi kan run ngan duh a si e.

(Visited 223 times, 1 visits today)
%d bloggers like this: