Burma Ram Feh Dan Ding Part 91

Pu Thawm Hlei Mang Zuam Sin Sin Seh


Burma Ram Feh Dan Ding hi tu-ah Part 91 kan thleng zo.Kan dung te ah khan Norway ihsin Pu Lal Biak Khum ( Laltha pa ) in a tawp mai ding ti ka phang ho khaw a run ti.A hmasa bik ah cun Part 80 nak ih ti tawp tum kha ka si ih,cui hnu ah ngan ding a tam tuk lai ruang ah Part 100 in titawp kung,cumi hnu cu Rangoon ih Pastor Caleb Lal Tin Hrem in ca uk in in rak tuah sak seh kan ti a si kha.A si nan tu ah cun Laltha pa’i ngen nak in a mal bik ah 5 tal cu ka ti sau a si ke cu,kan mah kan thu thu lo ziang.

Si le tui tum ah cun Switzerland ih um Pu Thawm Hlei Mang in kan Laitlang,kan Lai rawn ,kan Falam peng pawl thanso nak ah in zuam sak sin sin seh,ti thu hi kan ngan ding.

Kan dung lam kum 12 sung lai ah hin kan Falam Laimi pawl ih thanso nak ding ah thu hla le sum le pai ih in run bom tu ah Pa Thawm ih in bomnak hi a tam bik ding ti seh la ka ti sual lo ding.2003 ih Delhi  a rung tlawn tum ah khan Delhi ih a mah khal ih secy. a rak tuannak DBCF kohhran hrang ah $ 300 in rak pek thu kan dung te secy. bu hlun pawl ka kau nak ah ka hmu leh.Cui tlun ah khami tum khal ah Falam Union hrang khal ah ziang maw zat in bom ih,Delhi ih Laimi pawl hrang ih in bommi hi khami tum hman ah $ 800 hnak ih mal lo a si ding.

Anih ih mi a bomnak pawl hi a hrek cu a mai sum rori,a hrek cu a rualpi pawl hnen ih a dilmi leh a hrek cu a  telnak pawl (organization ) ih ta pawl a si ding.Laimi pawl in rak bommi ih langsar zet pakhat,Pu Ni Li Lian leh hotu dang pawl thawi an tuan mi cu English Chin dictionary kha a si ding.An nih pawl in sum le thurawn thawn an cang ih Saya Van Kyi pawl,Saya Zung Luai,Tial Dum,Lailiandal leh midang pawl in cangan thiamnak lam in an cang.Lungawi a um nasa.

Cule Pi Lian Kim,kei,Saya Khaw Nei Khuai leh Aiawl LCF pawl ih kan rak dinmi Falam ih Nazareth Children Home hrang ah hin  Pu Thawm hin kum 10 lai maw si bomnak in hawl sak zo. A titha tuk.Himi bomnak in hmuhsak mi hi a tam nasa.

Tahan lam khal ah Laimi pawl ih zirnak ding pawl,pumcawmnak lam thil pawl,thiamnak lam pawl tla tunai te ah  tampi in tuah sak.Himi pawl ihsin Laimi tampi in thansonak le pumcawmawknak kan hmu vivo ko ding.Falam khua hrang khal ah zirnak a phun phun  in tawlrel sak ding tiin ruat phawt sehla.

Dr.Do Sian Thang ih Lailun project tla ah Pu Thawm Hlei Mang hi tuhlan khuapi ihsin sum le pai le thurawn lam in a rak tel ti tla cu tunai te lawng ah a si ka theih.Himi project hrang khal ah thiltampi tisak  bet a tum ti tla kan thei ih kan hna a ngam zet a si.

Tui tum ih Burma ram ih a tlawn tum khal ah Rangoon lam ih kan Falam organization pawl a nghilh cuang lo.

Anih vek ih kan Laimi ramdang ihsi bomtu kan neih hi kan vantha zet a si.Dam saunak Pathian in pe hram seh la,ram a that tla cun a tar zawng tal ah a ra tlung leh duh tla a si thei ih,tu ah cun tuihnu lam kum 10 lai khal Switzerland ah um tho tho in in bom ring ring seh la,hiti hin Laimi hrang ah in tuansak ring  ring thei seh la,a duh um zet tho tho a si.

(Visited 45 times, 1 visits today)
%d bloggers like this: