Burma Ram Feh Dan Ding Part 90

Laimi Lakih Zohthim Tlak Zet Mi 2


Tui tum ah Laimi lak ih zohthim tlak zet mi 2 tiin Saya Sui Lian Mang leh Dr.Than Bil Luai ih thu ka run ngan.

Tui hlan kum 3 hrawng ah khan maw si interview nak ah zoh so rawngbawl tu lak ih na ngaihsan bik tiin in rak sut dah in kei cun Saya Sui Lian Mang ka rak ti a si.Tu khalah  Pathian hna tuan lak ah cun a mah ka ti tho tho ding.

Ziang ruang ah ti le Saya Sui hi a nau hak lai,teenager a si lai ih si Pathian hna theih tawk in a rak tuan.Zirnak sang zet tiang in a run zir.Midang pawl bom thei tawk a bom.Kan Lai tong in Bible a let rero lai ih tlun ah Laica in ca uk tampi a ngan zo.Tikcu hman a thiam ih,mdiang zawn a ruat.A taima ih sum le thil ten ren khal a thiam.Cui tlun ah hmin siat nak pipa a neih pakhat hman ka thei dah lo.

Kan Laimi ah midang a mah hnak ih Pathian duh le thlun sawn khal an um men ding nan thil dang hmuh hmuh zoh thluh ah cun a nih hi zohthim tlak famkim bik ah ka ruat ding.


Dr.Than Bil Luai


Dr.Than Bil Luai hi kan thei cio.Mi tha tak,Pathian tihmi,mi phun khat le phun khat karlak ih huatawknak um ding duh lo tu,cathiam sang,tikcu hman thiam zet,a theih tawk ih midang zangfah ih mi bom tu a si.Calai lam khal ah theih tawk ih hna tuan tu a si.Sum le pai ah maw,thlil dang ah maw hmin siat nak tumpi a neih ka thei dah lo.Kan dung ih ka ngan zo vek in thla khat ah vawi khat ;zan khat ah nazi 7 in kan mipi pawl hrang ah pe aw thei sin sin seh la cu kan miphun thanso nak in tuan sak nasa  tu a si  sin sin ding . A taimak dan leh tikcu a hman thiam dan tla cu a thei pawl in an fak thluh.

Pu Sa Tin Thawng khan Pu Than hi mithianghlim ah kan ngai ih ,pawl te nau vek ah cun um lo ding in sim aw i ti sap bai,ka sim ngam lam lam lo,a tuah mi pawl a tuah that ring ring ah cun pawl te nau ih a um pang khal le ziang so poi ka ti men ke maw ka thei lo,Pu Thawng ih timi mithianghlim a  si a ti lawng te ka pom law law,Pu Thawng in a duh dan cu  amah in  Pu Than  hnen ah sim mai seh.

Pu Than hi nikum ih Delhi ih a rat ah khan politic ah teh na lut leh lo ding maw ka ti ih a nih cun ka luh ih ka tlin pang ah cun part time ih MP tuan ding hman in kum khat ah thla 3-4 lai Tahan suahsan a tul ding ih ka sizung in a tuar ding a ti.A si ngan ngai, MP a cuh lo khal le Laimi hrang ah hna tuan tam pi a tuan thei ko.

Kan hotu 2 pawl kan neih hi Falam pawl kan van  that zet nak khal a si,Pathian in dam rei nak pe hram seh la,kan mipi pawl in kil khawi thei ring ring seh ti hi kan duh nak bik a si ke cu.

Annih pahnih Lai khawte ih si hi ti vek ih mi ropi an si thuhla hi cauk tha zet ah ngan seh la,siar a nuam zet ding.

%d bloggers like this: