Burma Ram Feh Dan Ding Part 89

Aizawl LCF Biakinn Kan Rak Remthat Dan


Ka autobiography/biography ka ngan tikih ka ngan ding tho tho a si ih,tu ah a siar duh pawl ih nan rak siar nak ding ah himi article hi ka run ngan a si.

1999 January thla ni 31 tlai ah ka pa in Aizawl ih ka inn sanmi ah i thisan.Cumi hnu zarh hnih hrawng ah Aizawl ih Lai Christian Fellowship ih kan khawmawk nak Pu Sang Ci ih inn,first floor,tet deuh ih kan to tla cun mi 500 lai kan tlem thei nak cu man pe ih san mi kan si nan a neitu Pu Sang in thildang ah hman ka duh,hmundang ah nan thawn a tul in ti ta ria.Hmun dang kan hmuh hlan cu Pu Sang ih inn tho tho,LCF kan rak din tum ih kan khawmawk nak mi 220 lai lawng tlem nak ah kan khawm aw aw.Cu khal cu a man pek ih san tho tho kan si.Cutawk ah cun kan tlem awk lo tik ah a khawm kan mal phah nasa ih thawhhlawm khal a tum nasa.

Kei LCF president vek in ka thin a har zet ih,khawmnak ding inn hawl in ni tampi ka can ka pe.Laimi pawl kan khawmawk thei nak ding hmun Aizawl hmun laili cu ka dap thluh.Cui pawl lak ah Electric veng biakinn pi kawt ih Pi Khaw Tinni inn thuahli nak tla ka zoh,Cu le Highlander English paper editor Pu Lal Khaw Lian ih inn,Electric veng tuikhur lam tla ka zoh.A sak lam ah MacDonald tlang ih inn pawl khal ka zoh.Hmun 22 ka zoh in ka thei.Cule a rem bik ding mi Canteen kual ih tu tiang ih LCF biakinn an run hman nak inn museum ih an rak hman mi,zinpi ih vasuh a thuah hnihnak khal ka zoh.Himi cu a neitu pa inn in san duh mai.  A si nan problem a um ta.Cucu a phar pawl kha an rak bal thluh ih,sum an neih lo ruang ah sak thei lovi an rak um mi a si.LCF in le sum kan nei si lo.

Himi fang ah Zuatit ( Hmuntha ) mi,ka phun pi,India ralkap baang Pa Ngun in a pension Rs.1 lakh ( Rs. ting 1 ) i rak ret sak aw i ti.Himi sum hi LCF biakinn sak nak ah ka hai mai.Kei cun sum ka neih lovi tlun ah ka neih sun sun cu Falam ih ka innsak nak ih ka kuat lai fang a si.Pa Ngun hnen ah cun a thang 3% in biakinn sak nak ah in cawih aw la,a thang ka kuan ding ih kei mah in mawhphurhnak ka la  ding ka ti.Cuti cun biakinn sak kan thok.Biakinn sak sung thla 4 sung lai cu nitin in ka va feh ih mistir pawl ka va zoh.A tulmi thilri ka lei.

Biakinn sak nak ah hi ka sum cawimi hmuah hmuah a zate hi vawi leh khat ih hman a theih cuang lo.A thang keimai rulh ka tiam mi le thla tin a pung.Cumi lai fang ah Aizawl ih Pu Lian No Thang in Zuangftui ih ka inn cu Rs.70,000 ih lei i dil.Hihi Rs.150,000 lai cemih ka rak lei le sak mi a si.Kei cu ka nu le ka pa ih kut thlak nak a  um ih tlun ah thuthangca tla tuah thei nawn lo pang seh la,ka um  nak ah ti in ka rak siang lo.

Cule Pa Ngun ih sum cu thla 3 lai ah cun Rs.30,000 lai cu biakinn saknakah kan hmang ke.LCF member pawl khal in biak inn sak nak ah nuam te ten sum an thawh zawk rero.Ka sum cawi mi cu a um um pek sal ding ti le a neitu pa Burma ih um a si ih tlun ah a za tei pek lo cun a duh si lo.Cunah cun a sum  Rs.70,000 lai cu Zuangtui ah caw inn,step pawl,ka inn kauh nak le vawk inn ,ar inn pawl saknakah   ka hmang thluh ih,ka sum ka bet mi thawn a za te cu Rs.150,000 lai ka cem bet ding.

Biakinn cu kan theh hlan ihsin kan luah ih,kan luah hnu thla 2 lai ah maw si on nak Dawrpi pastor le Upa Pu Rokamlova pawl in in run tuahsak.
Biakinn sak nak ah LCF mipi in Rs.200,000 lai an thawh.Kan hotu pawl,Pu Tial Kulh Thang,Lian No Thang,Pi Tha Nei Kil pawl khal in Rs.5000-7000  ciar lai  an thawh thluh.Cuti cun biakinn cu tha zet inn kan hmang thei.

Keimah thung ah cun 1999 kum ihsi hin kan newspaper business a siat thok ih,cui tlun ah biakinn hrang ih ka rak cawi mi ah a thang lawng lawng  ih Rs.60,000   le a capital cu  ka nau Sui Thawn ih a rualpi hnen ihsi a cawimi in kum 2000 kum tawp ah Pa Ngun cu kan pe.Ka nau cun Rs.100,000 kha a thang tam sawn 5% thang ih a cawi mi a si.Cule Delhi ka um hnu ah Zuangtui ih ka hmun a thang siar lo hman ih Rs.300,000 tlun ka cem mi cu Rs.150000 lawng in an run zuar thei.

Hinah hin a tir khan biakinn sak nak ding ah Rs.30,000 lawng rak cawi seh la,a thang thla khat ih Rs.900 cu awl ten ka kuan thei ding nan.cu le Zuangtui ih inn sak that bet cu rel hlah,Pa No hnen ah rak zuar seh la cu Aizawl ihsi Delhi ka vaih ah khan Rs.200,000 lai cu ka keng thei ke.tu cu Rs.200,000 lai leiba thawn ka feh sawn ih,ka leiba Rs.100,000 lai tla cu ka nau  Tha Nei Luai le Mang Hlei Sawn pawl in in kuan sak.Kei khal Delhi ah himi tum ih ka rak ruah sual ruang ah kum 8 lai cu ka run zawnzai phah.Delhi ka vaih lai ah sum cu nei seh la cu ka thlen kum 2002 ih sin zirnak tha tha ka rak zir ding ih ka nun a nuam tuan ko ding.Thuthimnak ah 2002 ka thlen kum ih British Concil ih special Englsih traning tla Rs.5000 pek a tul ruang ah ka rak kai thei lo.British Council ka kai thok nak hi 2006 lawng ah a si.

Hiti vek in ka run tuar ko nan LCF member pawl thawn tangtlang in baikinn kau pi tu tiang kan run neih thei ruang ah Pathian ka thangthat tho tho.

%d bloggers like this: