Burma Ram Feh Dan Ding Part 88

Falam Hi Ka Khua A Si. Falam Is My Home Town


Kum 2007 ah khan Pathian thusimtu Saya Za Lawr kha Delhi ah a ra ih BCRC hall ah crusade a nei.Cutawk ih thu a simmi pakhat cu,tuhlan ih ziang hman ih kan siar lomi Thlan Tlang khua cu tu ah cun kan bang lam lam nawn lo a ti.Cule nikum maw kum hmaisa ah khan maw si Pathian thusim pakhat Delhi ah a ra ih cu tawk ah cun hitin a ti.Thlantlang ah Pathian thu sim in kan feh ih kan thlennak kiang ah inn tha tuk pakhat a um a ti.Cumi thu cu a khaw mi pawl in hitin in sim a ti.Inn neitu pa bik ih fale pawl cu  ram dang ah an um.A fa le pawl in sum tampi an kuat ih a pa cu inn an sak tir.Cutawk ah cun a pa in,kan vaih duh pang ah hi tluk ih inn tha kan zuar thei ding sawm,a lei ngam an um ding sawm tiin a fale cu a sut.A fa le in “Ka pa,zuar ding i kan sak a si lo,Thlantlang khua mawi zet seh tinak  ih kan sak a si ” tiin an run ti.Fak an tlak nasa.

Ziang ruang ah Falm ka khua a si ka ti nak run ngan ve seh la.Kei cu Cerhmun khaw suak ka si ih Cerhmun khal ah ka pa ih i rohta mi kan inn pi ka nei ko.A sinan tu ah cun Falam ka khua ka ti thlang.Ziang ah ti le Falam ah sum ka kuat ruang ih ka nu ih i sak sak mi inn pakhat tlun ah kan sung kua inn pakhat kan nei.Khami inn ka sak hnak in Rangoon ah maw Tahan ah maw inn sak sehla tuhnak in let 5 lai in man a nei ding ti khal ka rak thei ko.Cui tlun ah Falam ah ka nu le ka pai thlan a um ih,ka nau le 3 ih thlan tla a um.Delhi ah kum 3 lai a rei zo hmang ih,Zarhte ni DBCF  thla cam nak ah “Kei cu khui tawk khal ih Pathian ih i kawh khal le Falam ih ka nu le ka pai thlan kiing ah in re ding ” tiin ka ti dah.

Haka ah Saya Rev. Van Bik timi tulai nonawn cun nan thei lo ding ih,cu cun ” Haka khua ka suahsan thiang lo,kan Laimi hnamdang pawl in in hleih pang ding ” a ti.Himi thu ka ngannak ah hin Saya Van Bik ka zuam a si lo,a nih ka tluk lam lam lo.1980 ih Haka ka tlawn tum khal ah rawl ei i sawm ve,ka ti duh mi sawn cu kei khal tlak lo cing in Falm ka suah san a thiang lo tiin ka puang aw ve ke.Tuikum kum cem lam i ka tlun hnu cun Falam khua hrang ah theih tawk ka ruat thlang ding.Kum 30 tlun Falam ka pal nawn lovi,tui hnu cun ka dam sung ah Falam ah a mal bik kum khat ah thla 3 ka um thlang ding.Falam ih um ka ti ah hin Kalemyo,Cerhmun le Haka pawl cu a tel ding ih.

Kan dung ah ka ngan zo.MP kan si hnu lawng ih ram hrang ih hna kan tuan ding ah cun kan dam sung ah hin kan tuan dah lo tla a si men ding.Cui ruang ah Falam khua nu le khua pa pawl,Falam township acozah ho tu pawl le kan Lami milian pawl,ramdang ih um Laimi pawl thawn thuan tlang in 2015 kum cem hlan ih tuansuak ding pawl tla kan ruah tlang a tul ding.Thuthimnak ah computer training centre tla ,cu le kum khat sung ih feh ring ring ding man malte lawng kuan ih English zir thei nak hmun tla,cumi lo ah thuthim nak ah Falam Dawrhlun Dobhi Chawng ihsin Cinmual lam fehnak leilawn tla,cule hnakum lam ih si a cozah ih private college on thei nak tla an on cun phun 12 tiang tal ih Falam college tuah nak tla kan tawl rel tlang a tul.Zo zo khal kan poimawh thluh.Falam Target 2025 planning cu thudang si hrih sehla.

Falam ih  inn kan sak  lovi Falam ih phumawk kan tiamawk lo hman ah Falam le kan Laimi hrang ah a phun phun kan tuan thei ih tuantlang uh sih ti kan  sawm aw duh.Falam hrang ah ka tuan ding ka ti ruang ah High Khawl Cekan hrang,Haka Matupi le Tonzang hrang ka tuan lo ding ka ti lo.Cui pawl khal cu kan si nak ih zir ih kan tuan cio ding a si ko.

%d bloggers like this: