Burma Ram Feh Dan Ding Part 87

Dr.Than Bil Luai Hnen ih Ngennak


Dear Pu Than,

Hi thu hi tu hlan kum 3 lai ihsin ka rak ruat zovi,cule nikum ih Delhi ih  nan rat hlan leh nan rat hnu ah hiti vek ih ngan ka tum nan ka lo ti buai pang ke,ti ka phan ruang ah ka ngan leh lo.Ziang mawti cun ka ngan ti na thei ko ding.Tu cu ka lo rinsan tuk ruang ah le na hnen ihsi beiseinak sang tuk ka neih ruang ah  le kan mipi pawl ih thanso nak ka duh tuk ruang ah ngan lovin ka um thei lovi,ka run ngan a si.Na ngaihdan a si lo pang ah cun i ngaidam aw tiin ka lo dil hmaisa.

Tibual ih hna an tuan lai ah khan na inn ah 1981 hrawng kha a si hmang ka thleng dah ih,cutawk lai khal ah mipi hrang ih that hnem nak ding in tiin lo neih lam le tilva vulh lam ah mipi na rak kai hruai ti a tak in ka thei.Tu cu kum 32 lai  a rei leh zo.Khalai hnak in kum 32 lai in na run upa nan thansonak a phun phun le mi thatnak a phun phun na run tuah ih,taksa lam thanso nak khal ah Laimi ah cun a sang bik lam na si.

Awle,sim aw tlang law law seh la,Lairawn ih um kan Falam Laimi 60,000 lai hrang ih a phun phun ih thanso nak tuah thei tu na si ruang ah himi pawl ka run ngan ih kan mipi pawl hrang ah hi vek in in rak tuansak hram aw tiin ka lo ngen ta a si.

Na buai zet kar lak ah thla khat ah tlai khat,nazi 7 lai te can pe in khawte 2 kawp in thu  sim thei awla,thuthimnak ah tlai nazi 5 in Tahan nan suahsan ding ih,minute 20 lai  maw na rei hnu ah Min Hla tla na va thleng ding.Mi 30 lai in an lo kawm ding ih cumi pawl hnen ah thanso nak a phun phun na sim ding.Agriculture lam,tenren nak lam,taimak nak lam,diknak lam,harhdamnak lam le zirnak lam tla a si ding. Na simmi a tam sawn hi an theih zomi cu a si ding nan nangmah rori ih na sim sal tikah an thinlung ah a lut deuh ding..Nangmah rori hman harsa zet ih tlawng na kai in sibawi rori na si dan vek tla na sim ding..Thu tla tampi an lo sut ding ih na sang ding.Cule tuah tlang theih ding pawl a um a si le na tawlrel sak ding.Cutawk ah sum le pai a tul ding tla a si le a khawmi pawl khal ih an suah ih tlun ah ramdang ih kan Laimi pawl hnen ah na dil sak ding.

Cumi zan nazi 8-30 lai ah zanriah nan ei ding ih cuihnu ah Aung Zua tla ah cuti vek tho tho in na zirh ding.Cule  nazi 11 hrawng ah maw nan party cu Tahan ah nan tlung ding ih,nazi 12 hrawng ah cun nan itthat thei ding.Hiti in thla khat ah khaw 2,a tikcu zawng in nazi 7 na pek thei ah cun maw,kum 3 ah cun Kawlrawn ( Lairawn ) ih kan Laimi pawl cun ziang maw tiin an thanso phah nasa ding.Na tikcu pek mi cu thla khat ih ni 30 , nazi 720 lai ah   1 % lawng na pe ding nan  cumi te cu a thupi nasa ding.Cuti cun kum khat ah khaw 24 lai na tuam thei ding.

Himi tidan hi mi dang cun kan ti thei lo ding.Thu thimnak ah keimah in rel seh la.Pakhat nak ah nang cu mi rinsan,mi tihzah sibawi na si ih,na thu kan nih hnak in an lung ding.A pahnihnak ah nang cu Tahan ih um na si ih,na hna tuan dang thawn na cem thei phah.

Dr.Ro Uk ih Matu pawl a tithansonak khal an khua ah kum 30 lai um in sizung compound pawl a sak that thluh ih tlun ah Matu family pawl fawrh fialnak kum sawm tlun  a sim ih ca an zuam phahih medical,engineer tlawngta tla an tam phah zet ah a cang.
Dr.Do Sian Thang in Falam ZTC compound sung ah kum 20 lai um in thansonak a tuah zawk rero tik ah cun Falam khaw titha tu bik ah a cang a si.

Kan Burma ram a farah tuk ih tlun ah kan Laimi sin sin kan hnufual tuk ih,Lairawn ih Falam pawl tithangso thei tu bik na si ruang ah himi cakuat hi ka ngan a si.

Nangmah lo rinsan le lo ngaisang tu,    Pu Run

(Visited 33 times, 1 visits today)
%d bloggers like this: