Burma Ram Feh Dan Ding Part 86

Rev Hrang Kip Zul Thawi Kan  Biakawk Dan


1994 lam ah daih a si ih, Aizawl Canteen kual ih ka inn san mi ah a  si. Khami ni ah khan Saya Hrang Kip Zul thawn rei zet kan be aw aw in ka thei.Khati lai kha Rangoon ah Pi Suu Kyi house arrest in an suah zovi, cui tlun ah ralkap a cozah ih national convention an tuah lai fang a si.Mi tampi in danpi um mai ding ah an neih ih,cunah hrilawknak um mai ding ah an ruat. Falam towship ih NLD vice president rak tuan dah Pu Ral Sai Lo Aizawl ih a ra tlawn lai a si ih,kei tla NLD hmin in MP cuh ding in tongkam tha in i sawm ve.A si nan kei cun a cu hrih lo ka ti.

Saya Zul thawn kan biakawk ni ah cun a nih khal in midang vek in Burma ram ih hrilawk ding um mai ding a ruah ve ruang ah hitin i sut.A si le,U Run,tui tum hrilawknak ah maw na tel ding,mawi a vawi hnih nak ah i ti.Kei cun “Saya Zul,ram le miphun hrang ih hna tuan nak ding ah hin ka hrang ah MP cuh teng teng hi a thupi bik a si lo.Ram ah democracy um phawt seh la, MP si lo cing hman in hnatuan ding hi ka thei tam tuk ” ka ti.

Cumi Saya Zul thawi kan biakawk nak ihsin kum 19 lai a  rei leh zo.Cutawk ih ka relmi vek tho tho tui sun khal ah ka ruah nak a si.Ram le miphun kan duhdawt ah cun ziang ti zawng tal in maw hna kan tuan ding a si ih kan tuan thei ding mi khal tampi a um ding.Tui netabik part 85 kan ngan nak ah Falam khaw hrang ih hna tuan tha bik Dr.Do Sian Thang ih thu kan ngan zo.MP a cuh lo pi.Political party hman ah a lut lo.A si nan Laimi hrang ah hna tam pi a tuan.

1972 ah Institute of Economic,Rangoon ihsin B.Econ. degree la in ka graduate ih,Co-oparative  Dept. ah officer tenau te ihsi thawk ih hna tuan mai ding kha ka si nan ka pa thu hman lung lovin 1974 in danpi hmang ih mai miphun hrang tuan tum in a  cozah hna tla ka rak tuan lo.Cucu kum 40 tlun a rei leh zo.Saya Zul thawn kan biakawk khal kum 19 rori a rei leh zo.

Cui ruang ah tui kum kum tawp lam ih tlun ih kan Chin mi,kan Burma ram hrang ih ziang maw ti zawng in simaw hna  tuan ka tum thlang nak a si.Hna tuan thei ding cun political power neih maw,cu lo leh sum le pai tampi neih maw a tul ko.Ziang hman kei cun ka nei lo.Kan ram duhdaw nak thinlung lawng ka nei.

Rangoon ih college kan kai lai khal ah ka theih tawk in kan miphun hrang ah ka rak tuan ih,Falam peng khal ah Khuangli ah ka feh paih lo cing khal in Lami hrang ah tiin Affiliated middle school head master ah kum khat ka rak tuan.Mizoram ihsi khal ih Mizo pawl hrang ah theih kau nak nasa zet tuan phah in Chin mi hrang khal ah mal te  te ka rak tuan ih Delhi ih kum 10 tlun ka um nak khalah thil tum pi tuan thei ka nei lo nanChin mi hrang ah mal te te cu ka tuan ring ring.Tu cu ka tuan tam le mal cu thu dang,tuan tul nak ngai ngai,tuan theinak um nak Rangoon ,Haka,Falam le Kalemyo ka pan a cu thlang ah ka ruat.

%d bloggers like this: